Te hoê hiˈoraa ia pee-maite-hia
1 Papu maitai, o Iesu te taata rahi roa ˈˈe i ora aˈenei. Ua vaiiho mai o ˈna i te hoê hiˈoraa tia roa no ta ˈna mau pǐpǐ. Noa ˈtu e eita tatou e nehenehe e apee atu i to ˈna huru tia roa, te titauhia nei tatou ia ‘pee maite i to ˈna taahiraa avae’. (Petero 1, 2:21.) E hinaaro tatou e pee rahi atu â ia Iesu, na roto iho â râ i te tauaparauraa ma te itoito no nia i te parau mau ia vetahi ê.
2 Ua hau aˈe Iesu i te hoê taata poro noa: e orometua taa ê mau o ˈna. ‘Ua maere te taata atoa i te huru o ta ˈna parau.’ (Mat. 7:28). No te aha e taata aravihi roa oia? E hiˈo maite anaˈe i “te huru o ta ˈna parau”.
3 Nafea ia pee ia Iesu: Ua haapiihia Iesu e to ˈna Metua (Ioane 8:28). To ˈna hinaaro o te faahanahanaraa ïa ia Iehova e te faaiteraa i to ˈna iˈoa (Ioane 17:4, 26). Na te hinaaro e faahanahana ia Iehova e eiaha râ te tuuraa ia tatou na mua e turai ia tatou ia apiti i roto i te pororaa e te ohipa haapiiraa.
4 Ua niuhia te mau mea atoa haapiihia e Iesu i nia i te Parau a te Atua. Ua faahiti o ˈna i te mau Papai ma te tuutuu ore (Mat. 4:4, 7; 19:4; 22:31). Te hinaaro nei tatou e huti i te ara-maite-raa o te mau taata i nia i te Bibilia. E ite ïa ratou e te niuhia ra te mea ta tatou e poro ra e e haapii ra i nia i te mana teitei roa ˈˈe.
5 Ua faaohipa Iesu i te mau parau poto, ohie e te faaau ohie. Ei hiˈoraa, i to ˈna faataaraa i ta ˈna mau pǐpǐ e nafea te Atua e faaore ai i ta ratou hara, ua faaitoito o ˈna ia ratou ia faaore atoa i ta vetahi ê ra hara (Mat. 6:14, 15). E tia ia tatou ia tutava no te faaite i te poroi no nia i te Basileia na roto i te mau parau maramarama ohie.
6 Ua faaohipa Iesu ma te aravihi i te mau faahohoˈaraa e te mau uiraa no te haaferuri i te mau taata e faaroo ra ia ˈna (Mat. 13:34, 35; 22:20-22). E nehenehe te mau faahohoˈaraa no nia i te parau apî e tauturu i te mau taata ia taa i te tahi mau haapiiraa fifi o te Bibilia. E tia ia tatou ia horoa i te mau uiraa o te haaferuri ia ratou. E nehenehe te mau uiraa faatanohia e aratai ia ratou ia huti i te mau faaotiraa maitatai.
7 Ua rave Iesu i te taime no te faataa i te mau tumu parau fifi i te feia tei hinaaro e ite hau atu â. O te feia tei anaanatae mau i te reira, mai ta ˈna mau pǐpǐ, tei taa i te auraa o te haapiiraa a Iesu (Mat. 13:36). Ia ineine atoa tatou i te pahono i te mau uiraa a te mau taata ma te aau rotahi. Mai te peu e aita tatou i ite i te pahonoraa o te tahi mau uiraa, e rave ïa tatou i te mau maimiraa e e hoˈi faahou i muri iho e te mau haamaramaramaraa titauhia.
8 Ua haapii atoa Iesu na roto i te horoaraa i te hiˈoraa. Ua horoi hoi o ˈna i te avae o ta ˈna mau pǐpǐ, o o ˈna to ratou Fatu (Ioane 13:2-16). Mai te peu e e feruriraa haehaa to tatou, e turaihia te mau taata o ta tatou e haapii ra ia faaohipa i te mea ta ratou e haapii ra.
9 Ua haaputapû Iesu i te mafatu o te mau taata e i to ratou here no te parau-tia. Te hinaaro atoa nei tatou e haaputapû i te mafatu. E tamata tatou i te faaara i roto ia ratou i te hinaaro ru o te mau taata atoa ia haamori i te hoê taata teitei roa ˈˈe e ia ora e to ˈna taata-tupu ma te hau e te oaoa.
10 I te avaˈe titema, e taime to tatou no te tauaparau i te mea ta tatou i haapii no nia ia Iesu ma te pûpû i te buka Te taata rahi roa ˈˈe i ora aˈenei. Ia pee anaˈe tatou i te aravihi o te haapiiraa a Iesu, e turai ïa tatou i te mau taata aau rotahi ia haapao maite i ta ˈna haapiiraa.—Mat. 10:40.