Te Bibilia: te aratai i pûpûhia mai e te Atua na te mau taata atoa
1 Te manaˈohia ra e maha miria Bibilia tei neneihia na roto hau atu i te 2 100 reo tumu e vetahi atu mau reo, e nehenehe ai hau atu i te 90 % o te huiraatira na te ao nei e fanaˈo i te Parau a te Atua. Tera râ, te tupu nei na te ao nei te hoê oˈe ‘i te faaroo i te parau a Iehova.’ (Amo. 8:11) E rave rahi e Bibilia ta ratou, e aita e taio nei aore ra aita e taa ra i te auraa o taua buka ra. Nafea tatou e nehenehe ai e turai ia ratou ia vaiiho i te Bibilia ia aratai papu i to ratou oraraa?
2 I teie avaˈe Titema, e pûpû tatou i te buka ra Te Bibilia—Parau na te Atua aore ra na te taata? E nehenehe atoa tatou e pûpû i te feia e anaanatae, i te iritiraa Farani o te Bibilia o ta tatou e fanaˈo nei e 34 matahiti i teie nei: te Tatararaa a te Ao Apî. No reira, e haamatara tatou i to ˈna reo maramarama no teie nei tau. Mai te peu e ma te aau tae, e tauturu tatou ia vetahi ê ia faariro i te Bibilia ei aratai i pûpûhia mai e te Atua na te mau taata atoa, e faaite ïa tatou i to tatou mauruuru hohonu no teie ô a Iehova.
3 E nehenehe tatou e haamata i te aparauraa e te api parau iti ra “No te aha e tiaturi ai i te Bibilia,” ma te parau e:
◼ “Hau atu i te 90 % o te huiraatira na te ao nei, e Bibilia ta ratou, tera râ, mea iti roa te taio tamau nei i te reira. Ua ite anei oe e no te aha?” A taio i na paratarapha matamua e piti o te api parau iti e te Timoteo 2, 3:16. A pûpû atu i te buka ra Parau na te Atua. Mai te peu e eita o ˈna e rave i te buka, a vaiiho atu ïa i te api parau iti ia hope ia ˈna i te taio, ma te huti i to ˈna ara-maite-raa i nia i te upoo parau iti hopea, “Te tohu nei te Bibilia i te mea e tupu a muri aˈe.”
4 Ia hoˈi faahou tatou e hiˈo i te feia i rave i te api parau iti ra “No te aha e tiaturi ai i te Bibilia,” e nehenehe tatou e tamata i teie raveraa:
◼ I muri aˈe i te faahaamanaˈoraa i ta tatou aparauraa na mua ˈtu, e taio tatou i na paratarapha hopea o te api parau iti. A ani i te taata e ua feruri aˈena anei o ˈna e e nehenehe anei e ora e a muri noa ˈtu i nia i te fenua nei. A faaroo i ta ˈna pahonoraa, e a parau e: “Ua papu i te mau Ite no Iehova e e tupu te mau parau tohu atoa a te Bibilia, e tae noa ˈtu i te mau tohu e faaite ra i te hoê oraraa nehenehe no a muri aˈe no te feia e fariihia e te Atua.” A faaite i te hohoˈa i te api 13 o te vea iti ra Titau. No te haamata i te haapiiraa, a hiˈo atu i te haapiiraa 5 e a ani atu e e hiˈopoa outou i te mau pahonoraa o te mau uiraa e uihia ra.
5 I roto i te mau tuhaa fenua e mea faaroo roa te taata, e nehenehe tatou e tamata i teie omuaraa parau:
◼ “Te faaitoito nei matou e ia faatura-rahi-hia ˈtu â te Bibilia. E Bibilia ta te mau utuafare e rave rahi, tera râ, mea iti o te taio nei ia faaruru anaˈe ratou i te mau fifi. Ua ite atoa anei oe i te reira? [A faaroo i te pahonoraa.] Te manaˈo nei paha te taata e buka tahito te Bibilia. Te horoa ra teie buka, Te Bibilia—Parau na te Atua aore ra na te taata?, i te mau haapapuraa putapû e mea mau te Bibilia i te pae ite aivanaa, e te pûpû nei oia i te mau ravea ohie no te faaafaro i te mau fifi rahi ta tatou e farerei nei i teie mahana.” A haamatara i te tahi mau manaˈo o te mau pene 8 aore ra 12 o te buka, e a pûpû atu i te taata.
6 Ia hoˈi faahou tatou e hiˈo i te hoê taata i rave i te buka ra “Parau na te Atua,” e nehenehe tatou e parau e:
◼ “I te taime i mairi aˈenei, ua ite tâua e nafea te Bibilia ia tauturu mai ia tatou ia faaafaro i te mau fifi rahi e tupu nei i to tatou nei tau. Te tauturu atoa ra oia i te feia e farii e e Parau na te Atua oia, ia ora i te hoê oraraa oaoa aˈe e te mauruuru aˈe. Te hinaaro nei au e faaite ia oe i te hoê faaueraa tumu Bibilia ohie i roto i te buka o ta ˈu i vaiiho atu na oe.” A tauaparau i nia i te hoê faaueraa tumu a te mau Papai i faahitihia i te mau par. 3-6 o te pene 12, e a faaoti na roto i te taioraa i te par. 7. Mai te peu e e anaanatae te taata, a pûpû atu ia ˈna i te hoê haapiiraa i nia i te buka ra Te ite aore ra te vea iti ra Titau.
7 E nehenehe te feia ruhiruhia e anaanatae i te tumu parau aparauraa i muri nei:
◼ “I te hoê tau, e taiohia na te Bibilia i roto i te rahiraa o te mau utuafare e na ta ˈna mau faaueraa tumu i aratai na i te oraraa utuafare. Mai te reira atoa anei i ǒ oe nei? [A faaroo i te pahonoraa.] I teie mahana, e au ra e aita e taime faahou to te taata e rave rahi no te taio i te Bibilia, aore ra te manaˈo nei ratou e mau faaueraa tumu tahito i te pae morare to roto i te Bibilia. Te faahiti ra te pene 13 o teie buka, Te Bibilia—Parau na te Atua aore ra na te taata?, i te tupuraa o e toru taata o tei nehenehe, i muri aˈe i te haapiiraa i te Bibilia, e taui i to ratou oraraa. Mai te peu e e hinaaro oe e taio e mea nafea te mana o te Parau a te Atua i te tautururaa ia ratou, e oaoa ïa vau i te vaiiho i teie buka na oe.”
8 Ia hoˈi atu tatou e hiˈo ia ˈna, e nehenehe tatou e parau e:
◼ “I te taime i mairi aˈenei, ua farii tâua e aita te totaiete taata i teie nei tau e tâuˈa ra i te mau faaueraa tumu Bibilia i te pae morare. I to oe manaˈoraa, e tia anei ia tatou ia tapitapi no te reira? [A faaroo i te pahonoraa.] Ua faataa o Iesu Mesia e mea faufaa roa ia haapii i te ite i te Atua.” A taio i te Ioane 17:3. A iriti i muri iho i te buka ra Te ite i te pene 1, e a tauaparau i nia i te par. 5. A faaite atu i ta tatou porotarama haapiiraa Bibilia tamoni ore, e a ani atu i te taata e e faaite atu outou e nafea ia haapii.
9 E pure anaˈe ia Iehova ia haamaitai mai i ta tatou mau tutavaraa atoa no te huti i te ara-maite-raa o te taata i nia i te Bibilia, te aratai ta ˈna i pûpû mai na te mau taata atoa!