Te pahono nei te ite no ǒ mai i te Atua ra i te mau uiraa e rave rahi
1 Hou i noaa mai ai ia tatou te hoê ite papu no nia i te parau mau, ua uiui noa na paha tatou e rave rahi mau uiraa no nia i te oraraa, aita râ e pahonoraa. Auê te oaoa e i te horoaraahia mai te mau pahonoraa i niuhia i nia i te Bibilia! I teie nei mahana, e nehenehe tatou e tauturu atoa i te tahi atu mau taata ia pahono i teie mau uiraa. (Hiˈo i te Timoteo 2, 2:2.) E nehenehe tatou e faaite atu ia ratou i te ite o te Atua e aratai i te ora mure ore. (Ioa. 17:3) Tera râ, nafea tatou ia tauturu i te hoê taata ia papu i te faufaaraa mau o teie nei ite? Na roto ïa i te feruriraa i te mau pahonoraa o ta tatou iho i fanaˈo na auaa te parau mau. Ia haamanaˈo tatou i te reira, e mea ohie aˈe ïa no tatou ia pûpû i te buka ra Te ite e aratai i te ora mure ore. E nehenehe te mau manaˈo e horoahia ra i muri nei e tauturu ia tatou ia faaineine no te pororaa i te avaˈe Tiunu.
2 No te mea e e rave rahi mau taata o te aniani nei e no te aha te mauiui i rahi roa ˈi i roto i te ao nei, e nehenehe te huru raveraa i muri nei e faatupu i te mau aparauraa anaanatae:
◼ “Ia tupu anaˈe te hoê ati aore ra ia rahi roa anaˈe te mau ohipa haavî e te mau hamani-ino-raa, e pinepine te taata i te aniani e no te aha râ teie mau ohipa e tupu ai. Eaha te pahonoraa o ta oe e faataa ˈtu?” A faaroo maitai i te pahonoraa e i muri iho, a iriti i te buka ra Te ite i te pene 8 e a faaite i te parau e faahitihia ra i te par. 2. A faataa e te vauvau ra teie buka i te tatararaa a te Bibilia no nia i te ino, e a parau atu e: “Mai te peu e e taio mau oe i teie nei buka, e oaoa roa vau i te vaiiho mai i teie na oe.”
3 Ia hoˈi atu tatou e farerei i te taata i rave i te buka ra “Te ite,” e nehenehe tatou e parau atu e:
◼ “E anaanatae roa vau i te iteraa i to oe manaˈo no nia i te tumu i rahi roa ˈi te mauiui i roto i te ao nei. Te farii ra anei oe i te pahonoraa a te Bibilia e vauvauhia i roto i teie nei buka?” A vaiiho i te taata ia pahono. A taio i te par. 17 i te api 77 o te buka ra Te ite e a ani i te taata ia taio i te Roma 9:14 i roto i ta ˈna iho Bibilia. I muri iho, a parau atu e: “Te parau oaoa oia hoi, e ere na Iehova i faatupu i te mau mauiui tia ore. Ua tǎpǔ mai oia e horoa mai i te ora mure ore i roto i te hau e te oaoa. Teie te pene matamua o teie buka, ‘E nehenehe oe e fanaˈo i te hoê oraraa oaoa no a muri aˈe!’ Te hinaaro nei au e faaite ia oe e nafea o oe iho e te feia o ta oe i here ia fanaˈo i te reira.” A rave i te pene 1 e a faaite e nafea tatou ia faatere i te hoê haapiiraa. A tuatapapa i te rahiraa paratarapha e nehenehe i roto i teie pene.
4 E maiti paha tatou i te mau omuaraa parau e vai ra i te api 6 o te vea iti ra “Nafea ia haamata e ia tamau â i te mau aparauraa bibilia” i raro aˈe i te upoo parau ra “Ruhiruhiaraa/Pohe”:
◼ “Aita anei oe i uiui aˈenei e no te aha tatou e ruau ai e e pohe ai? [A vaiiho i te taata ia faaite i to ˈna manaˈo.] Te pahono ra te mau Papai i te mau uiraa atoa ta tatou e nehenehe e uiui no nia i taua tumu parau ra. [A taio i te Koheleta 9:5, 10.] Te faaite-atoa-hia ra e te vai ra te hoê tiaturiraa mau no te feia e faaohipa ra i te faaroo. [A rave i te par. 13 i te api 84 o te buka ra Te ite; a taio e a faataa ˈtu i te mau parau a Iesu i roto i te Ioane 11:25.] Te pahono ra te pene taatoa i te uiraa ra: ‘Eaha te tupu i nia i te feia pohe herehia e tatou?’ Mai te peu e e hinaaro oe e taio i teie pene, e nehenehe au e vaiiho mai i teie buka na oe.”
5 I te hoˈi-faahou-raa e farerei, e nehenehe tatou e haamata i te aparauraa ma te parau e:
◼ “I tera mahana ra, ua paraparau tâua no nia i te ohipa e tupu ia pohe anaˈe. E rave rahi mau taata te tiaturi nei e, te ora i muri aˈe i te pohe, tei nia ïa i te raˈi aore ra i roto i te po auahi. Tera râ, ua feruri aˈena anei oe e e nehenehe te feia pohe e hoˈi mai i ǒ nei, i nia i te fenua nei? [A vaiiho i te taata ia faaite i to ˈna manaˈo.] Ia au i te Bibilia, i rotopu i te feia haehaa e parahi i nia i te fenua, te vai atoa ra te feia e faatiahia mai. [A taio i te Salamo 37:11, 29, e a faataa i te par. 20 i te api 88 o te buka ra Te ite.] Ua tamǎrû teie tiaturiraa i te mau mirioni taata i ora na ma te mǎtaˈu i te pohe. E tauturu teie buka ia oe ia papu maitai aˈe i teie nei tumu parau. E nehenehe anei au e faaite ia oe e nafea râ?”
6 Mai te peu e mea au aˈe na tatou te hoê faaiteraa ohie aˈe, e nehenehe tatou e tamata i teie:
◼ “Te hinaaro nei au e faaite ia oe i te hoê hohoˈa i roto i teie nei buka, Te ite e aratai i te ora mure ore. E hohoˈa nehenehe mau, e ere anei?” A hohora maitai i te buka ia nehenehe te taata e ite i te mau api 4 e te 5. A vaiiho i te taata ia pahono, e a taio atu i tei papaihia i te api 5. A faahope ma te parau atu e: “E nehenehe au e vaiiho mai i teie buka na oe ia nehenehe oe ia taio.” Mai te peu e ua anaanatae te taata, a ani e afea râ tatou e nehenehe ai e hoˈi mai e farerei ia ˈna.
7 Ua noaa ia tatou te ite no ǒ mai i te Atua ra, o te pahono nei i te mau uiraa faufaa roa e rave rahi no nia i to tatou nei oraraa. E faaineine maitai anaˈe ia tatou e e haamaitai mai ïa o Iehova i ta tatou mau tutavaraa no te tufa i teie poroi faaora na te feia e imi nei i te parau mau.