E atuatu anaˈe i te anaanatae tei faaarahia
1 Ia poro anaˈe tatou i tera e tera fare, i roto i te rahiraa o te tupuraa ua taotiahia to tatou taime no te tauaparau e te hoê taata e anaanatae ra i te poroi. I te rahiraa o te taime, te ravehia nei te ohipa haapiiraa ia faatupu tatou i te mau hoˈi-faahou-raa e farerei e ia aratai tatou i te mau haapiiraa bibilia (Mat. 28:19, 20). No te haapii ma te aravihi i roto i te hoê hoˈi-faahou-raa e farerei, e tia ia tatou ia haamanaˈo i te aparauraa i mairi aˈenei, e i muri iho ia faaineine ia tatou no te faahaere â i te aparauraa i mua.
2 Mai te peu e ua tauaparau tatou no nia i te aueueraa o te oraraa utuafare, e nehenehe tatou e faaohipa i te mau tumu parau o te pene 29 o te buka E ora e a muri noa ˈtu e e parau e:
◼ “I te taime i mairi aˈenei, ua ite na tâua e mea paari ia pee i te mau aˈoraa a te Bibilia ia oaoa te oraraa o te utuafare. I to oe manaˈoraa, na te aha e tahoê i te mau utuafare fetii i teie mahana?” E vaiiho tatou i te taata ia pahono. E faaite tatou i te paratarapha 27 i te api 247 e e taio i te Kolosa 3:12-14. E horoa anaˈe i te tahi mau manaˈo hau o te faaite ra e nehenehe te hoê here mau e tapiri i te mau utuafare fetii. E faataa tatou e nehenehe te hoê haapiiraa tamau o te buka ra E ora e a muri noa ˈtu e tauturu ia ˈna ia faaafaro i to ˈna mau fifi.
3 Mai te peu e, i to tatou farereiraa matamua, ua tauaparau tatou no nia i te ino-roa-raa o te mau huru tupuraa o te ao nei, e nehenehe tatou e faahaere i te aparauraa i mua ma te parau e:
◼ “Ua papu ia ˈu e farii oe ia parau e e mea faufaa te mau tauiraa rahi mai te peu e e hinaaro tatou e ora i te hoê mahana i roto i te hau. Te faaite ra te Bibilia e o Satani te tumu matamua o to tatou nei mau fifi. Te uiui nei e rave rahi e no te aha te Atua e faatia ˈi ia vai noa te reira e mea maoro i teie nei. Eaha to oe manaˈo?” E vaiiho tatou i te taata ia pahono. E hohora tatou i te buka E ora e a muri noa ˈtu i te mau api 20 e 21, mau paratarapha 14 e te 15, e e faataa tatou e no te aha aitâ Satani i haamouhia ˈtura. I muri iho e taio tatou i te Roma 16:20, o te faaite ra e eaha te oraraa no a muri aˈe e fatata maira.
4 Mai te peu e ua tauaparau tatou no nia i te mau haamaitairaa ta tatou e fanaˈo i raro aˈe i te faatereraa a te Basileia, e nehenehe ïa tatou e parau i roto i te hoˈi-faahou-raa e farerei:
◼ “E faatae mai te Basileia o te Atua i te mau haamaitairaa faahiahia roa i nia i te fenua nei e no te huitaata. Te faahohoˈa-maitai-hia ra taua mau haamaitairaa ra i roto i te buka, i te mau api 12 e te 13. Eaha te mea faahiahia roa ta oe e ite ra i nia i teie hohoˈa? [A vaiiho ia pahono.] A manaˈonaˈo na eaha mau na te huru o te oraraa i roto i te hoê ao mai teie te huru!” E taio tatou i te paratarapha 12. Mai te peu e e anaanatae te taata, e horoa tatou i te uiraa o te paratarapha 13 e e aparau anaˈe i nia i te pahonoraa. E faaite tatou e te faahiti ra taua pene ra i te tahi atu â mau uiraa no nia i te mau haamaitairaa a te Basileia e e oaoa tatou i te tauaparau e o ˈna i te farereiraa i mua nei.
5 E nehenehe e haamata i te hoê haapiiraa bibilia ma te parau e:
◼ “E rave rahi taata tei ite i te mau pahonoraa a te Bibilia no nia i ta ratou iho mau uiraa maoti teie buka.” E hohora tatou i te buka i te tabula o te mau tumu parau, e e ani tatou i te taata e: “Eaha te tumu parau ta ˈna e anaanatae rahi?” E vaiiho tatou ia ˈna ia pahono, e rave mai tatou i te pene ta ˈna e anaanatae ra e e taio tatou i te paratarapha matamua. E faataa tatou ia ˈna e te haamatara nei te mau uiraa i raro i te mau api atoa i te mau manaˈo matamua o te paratarapha tataitahi. E faaite tatou ia ˈna i te reira na roto i te tauaparauraa hoê aore ra e piti paratarapha hau, i muri iho e rave tatou i te mau faanahoraa no te hoˈi faahou mai.
6 Ma te atuatu i te anaanatae faaarahia no te buka ra E ora e a muri noa ˈtu, e faaite ïa tatou e te hinaaro mau nei tatou e rave faahope roa i ta tatou taviniraa (Tim. 2, 4:5). E nehenehe tatou e tauturu i te feia e faaroo ra ia tatou ia titau i te ora mure ore.—Ioane 17:3.