No te aha e tia ˈi ia tae atu outou i te tairururaa mataeinaa ra “Te Paieti”

E toru mahana faufaa mau i te pae no te haapiiraa bibilia te tiai maira ia outou i te tairururaa mataeinaa “Te paieti” ta te mau Ite o Iehova e faatupu nei mai teie atu nei avae. E rave rau mau aˈoraa bibilia faufaa roa te horoahia mai na roto i te mau oreroraa parau, te mau uiuiraa manaˈo e te hoê hautiraa taata ora faahiahia roa no ta tatou haapiiraa. Ia tae atu ïa outou i reira i te poipoi mahana pae mai te 20 minuti mairi i te hora 10, e haamata hoi te tairururaa na roto i te upaupa.

I roto i te porotarama no te poipoi mahana pae, te vai ra te oreroraa parau ra “Ia ore na tatou e faaroo i te parau haavare” e oia atoa te hoê faataaraa parau no nia i te tumu o te haapiiraa no nia i te Torutahi. I te avatea, e aˈohia ˈtu te mau metua ia haapao ratou i te hoê hopoia i te pae morare, oia hoi: te horoaraa ˈtu i te hoê faufaa pae varua na ta ratou mau tamarii. I muri aˈe, e faaitoitohia ˈtu te mau taurearea ia faariro ratou i te Mesia ei hiˈoraa na ratou e ia pee maite atu i te parau mau. E faaoti te rururaa no taua mahana ra na roto i te faaiteraahia mai te hoê taoˈa faufaa roa i faaineine-taa-ê-hia no te tauturu i te mau taurearea.

E riro te mahana maa ei mahana haapiiraa apî faahiahia mau. E vauvauhia mai te oreroraa parau bapetizoraa i te poipoi, e i te avatea ra, e horoahia mai te mau oreroraa parau taa ê mau no nia i te Tino aratai kerisetiano e o te faaite e nafea tatou e nehenehe ai e tahoê maite atu ia ˈna i to tatou nei mahana. E hope te rururaa no te avatea na roto i teie oreroraa parau faufaa mau ra “Te Bibilia: E Parau na te Atua aore ra na te taata”.

I te poipoi sabati, e faaara mai te tahi mau faaueraa tano maitai ia tatou no nia i “te taata hara ra” e no nia i te ati o te haapao-ore-raa i te pae no te amu e te inu, te huru faanehenehe e te mau faaanaanataeraa (Tesalonia 2, 2:3). I muri iho, e tupu te hoê hautiraa taata ora no teie nei tau o te haamatara mai i te faufaaraa ia auraro tatou i te Atua. I muri iho, eita ïa tatou e hinaaro e mairi i te oreroraa parau huiraatira ra “Ua fatata roa te faaoraraa no te feia paieti”.

I te mau avae tiurai e atete, ua faanahohia e piti tairururaa i roto i to tatou nei fenua, hoê i Raiatea e hoê i Tahiti. A ani atu i te mau Ite o Iehova no to outou vahi i te mau taio mahana e te vahi i reira te tairururaa fatata roa ˈˈe i to outou vahi nohoraa, e tupu ai.

[Hohoˈa i te api 32]

Tairururaa mataeinaa i tupu i Vérone (Italia)