A haere i te tairururaa mataeinaa “Te mǎtaˈu paieti”!
Ua rave anei outou i te tahi mau faanahoraa no te haere i te tairururaa mataeinaa a te mau Ite no Iehova “Te mǎtaˈu paieti” no te matahiti 1994? Papu maitai, e maitaihia outou i te taeraa ˈtu i na mahana e toru atoa ra! Maoti e 165 tairururaa i faanahohia no te mau Hau amui no Marite anaˈe, eita e ore e e tupu te hoê tairururaa i pihai iho i to outou vahi faaearaa.
I te mea e e nehenehe te tahi mǎtaˈu e haaparuparu i te itoito e e faaino i te tiaturiraa, e faataa te oreroraa parau a te peretiteni i te poipoi mahana pae i te paieti a te Atua e e tatara mai oia i ta ˈna mau haamaitairaa e rave rahi. Oia mau, e haamatara te porotarama taatoa o te tairururaa i teie mau haamaitairaa.
I te mahana pae i te avatea, e faaroo outou e mea nafea te mǎtaˈu paieti e nehenehe ai e haapuai i te faaipoiporaa e te oraraa utuafare, e tae noa ˈtu nafea oia ia tauturu i te mau taurearea ia mau maite i roto i to ratou taiva-ore-raa i te Atua. E hope te rururaa no te avatea na roto i te oreroraa parau tamahanahana mau “Te tamǎrûraa no te feia e oto ra.” E haafaufaa outou i te mau haamaramaramaraa papu e horoahia mai i roto i teie oreroraa parau no te tauturu i te feia o tei erehia i te feia herehia i roto i te pohe.
E faaite te porotarama no te mahana maa e mea nafea te mǎtaˈu paieti ia haapuai i to tatou pee-maite-raa i te aratairaa a Iehova no nia i te amuiraa e ta tatou taviniraa. I roto i te oreroraa parau “A taio i te Parau a te Atua, te Bibilia Moˈa, i te mau mahana atoa,” e fanaˈo te feia i ruru mai i te mau manaˈo tauturu papu no te taioraa e no te tuatapaparaa i te Bibilia. E hope te porotarama o te mahana maa na roto i te oreroraa parau e te upoo parau anaanatae roa “Ua fatata roa mai te mahana riaria mau o Iehova.”
Hoê tuhaa o te porotarama no te sabati, o te oreroraa parau ïa “E tupu te tia-faahou-raa o te feia parau-tia.” I roto i te oreroraa parau i muri iho, “Faaorahia i roto i te ati rahi,” e horoahia mai te hoê tatararaa no nia i te parau tǎpǔ faahiahia a Iesu no nia i te feia o te ore roa ˈtu e pohe.—Ioane 11:26.
E hope te rururaa o te poipoi sabati na roto i te hoê darama haaputapû i te manaˈo e 40 minuti oia hoi Te mau maitiraa e vai nei i mua ia tatou. E faahaamanaˈohia te feia mataitai i te tau o Iosua e e ite ratou e ia faahohoˈahia mai to ˈna hinaaro papu e tavini ia Iehova. E ite atoa ratou i te tamataraa maoti te auahi i te tau o Elia, e e hutihia mai te mau haapiiraa o na tupuraa e piti nei o te tauturu i te feia i ruru mai ia faaite i te mǎtaˈu paieti i teie mahana. I te avatea, e riro te oreroraa parau huiraatira, “No te aha e mǎtaˈu ai i te Atua mau i teie nei,” ei tuhaa faufaa roa o te tairururaa.
A faanaho ia outou i teie nei no te tae atu. No te ite e teihea roa te tairururaa fatata roa ˈˈe i to outou vahi faaearaa, a ani atu i te Piha no te Basileia a te mau Ite no Iehova no to outou vahi aore ra a papai i te feia nenei i teie nei vea.
[Faaiteraa i te fatu o te hohoˈa i te api 32]
T. Rosenthal/SUPERSTOCK