Eiaha e mairi i te tairururaa mataeinaa “Te feia e arue i te Atua ma te oaoa”

E toru na mahana haapiiraa bibilia faufaa mau to mua ia outou. Ia tae mai outou ia haamata te porotarama e te upaupa i te 9H40 i te mahana pae poipoi. Ia oaoa outou i te oreroraa parau haamataraa, “Manava, ia outou te feia e arue ra ia Iehova ma te oaoa!,” e te oreroraa parau faufaa, “Faataa-ê-hia ei feia e arue i te Atua ma te oaoa na te ao nei.”

E huti te porotarama o te mahana pae avatea i te ara-maite-raa i nia i te mau taurearea, to ratou mau metua e te haapiiraa. “Ua ineine anei au no te faaipoiporaa?” o te hoê ïa oreroraa parau ta te rahiraa e hinaaro e faaroo. E tia i te mau metua ia faaroo maite i te oreroraa parau “Te mau metua e oaoa ra no ta ratou mau tamarii.” E faaoti te porotarama o te avatea na roto i te oreroraa parau “Te haapiiraa—A faaohipa no te arue ia Iehova.” E tauturu tei vauvauhia ia manuïa te mau taurearea i roto i ta ratou mau tutavaraa no te haere â i mua i te fare haapiiraa.

E faaitoito te oreroraa parau tatuhaahia i te mahana maa poipoi, “A pahono i te piiraa e arue ia Iehova,” e rave rahi taata. E faaoti te rururaa o te poipoi na roto i te oreroraa parau o te bapetizoraa. I te avatea, e hohora-tahaa-hia te hoê oreroraa parau faaiteraa e nafea o Satani i te faaohiparaa i te hinaaro taatiraa i te pae tino i mutaa ihora no te faahema i te mau taata. E faaoti te porotarama o taua mahana ra na roto i te hohoraraa i te haamaramaramaraa o te faaineine i te nunaa o te Atua ia faatupu i ta ratou taviniraa ma te aravihi atu â.

E haafaufaa te porotarama o te sabati poipoi i te haamaramaramaraa anaanatae na roto i te hutiraa i te ara-maite-raa i nia i te titauraa ru e haapeepee i te imi i te ora ma te ore e haamarirau hou te “ati rahi.” (Mataio 24:21) E faaoti te rururaa na roto i te hoê darama faufaa “Te faaturaraa i tei au ia faaturahia i roto i to ratou mau matahiti ruhiruhia.” I te avatea, te oreroraa parau huiraatira ra “E arue anaˈe i te Arii mure ore!” o te tahi atu ïa tuhaa faufaa o te tairururaa.

I te mea hoi e e faanahohia e 180 tairururaa i te mau Hau Amui no Marite anaˈe, e tupu atoa te hoê tairururaa i pihai iho i to outou vahi nohoraa. A ani i te mau Ite no Iehova no to outou vahi te taime e te vahi o te hoê tairururaa fatata roa ˈˈe no outou.