“Te feia e arue i te Atua ma te oaoa”—Tairururaa mataeinaa a te mau Ite no Iehova

E toru na mahana haapiiraa bibilia faufaa mau to mua ia outou. I te mea e e faanahohia e 180 tairururaa i te mau Hau Amui no Marite anaˈe, e tupu atoa te hoê tairururaa i pihai iho i to outou vahi nohoraa. Ia tae mai outou ia haamata te porotarama na roto i te upaupa i te 9H40 i te mahana pae poipoi.

E hohorahia mai i roto i te porotarama o te poipoi mahana pae te tahi mau parau manava tae noa ˈtu i te oreroraa parau faufaa ra, “Faataa-ê-hia ei feia e arue i te Atua ma te oaoa na te ao nei.” I roto i te porotarama o te avatea, e hutihia te ara-maite-raa i nia i te mau taurearea, te mau metua, e te haapiiraa. “Ua ineine anei au no te faaipoiporaa?” o te hoê ïa oreroraa parau o ta te mau taurearea e ore e hinaaro e mairi. E tia i te mau metua ia faaroo maite i te oreroraa parau “Te mau metua e oaoa ra no ta ratou mau tamarii.” E faaoti te porotarama o te avatea na roto i te oreroraa parau “Te haapiiraa—A faaohipa te reira no te arue ia Iehova.” E tauturu te mau parau i vauvauhia mai ia manuïa te mau taurearea i roto i ta ratou mau tutavaraa no te haere â i mua i te fare haapiiraa.

E hohorahia i roto i te porotarama o te mahana maa poipoi te oreroraa parau o te bapetizoraa, e e taime tano ïa te reira no te feia e faaî ra i te mau titauraa ia bapetizohia. I te avatea e hohora-tahaa-hia mai te hoê oreroraa parau faaiteraa e mea nafea o Satani i te faaohiparaa i te hinaaro taatiraa i te pae tino i mutaa ihora no te faahema i te mau taata. E vauvau-atoa-hia te oreroraa parau puai mau ra “A ara i te mau marei a te Diabolo.” E hope te porotarama o taua mahana ra na roto i te oreroraa parau faufaa “No te aha te huitaata e hinaaro ai i te ite no ǒ mai i te Atua.”

I te sabati poipoi, e huti te oreroraa parau tatuhaahia “Te feia e arue i te Atua ma te oaoa i te hopea o te amuiraa o te mau mea nei” i te ara-maite-raa i nia i te mau tupuraa o te faaaueue ra i te ao nei e o ta tatou e fatata ra i te faaruru. E haamatara te reira i te titauraa ru e haapeepee i te imi i te ora hou a haamata ˈi te “ati rahi” ta Iesu i faahiti na, mai tei papaihia i roto i te Mataio 24:21.

E faaoti te porotarama o te sabati poipoi na roto i te darama faufaa roa “Te faaturaraa i tei au ia faaturahia i roto i to ratou mau matahiti ruhiruhia.” I muri iho, i te avatea, e horoahia te oreroraa parau huiraatira ra, “E arue anaˈe i te Arii mure ore!” O te tahi ïa tuhaa faufaa roa o te tairururaa.

A faanaho ia outou i teie nei no te tae atu. No te ite e teihea roa te tairururaa fatata roa ˈˈe i to outou vahi faaearaa, a ani atu i te Piha no te Basileia a te mau Ite no Iehova no to outou vahi, aore ra a papai i te feia nenei i teie nei vea.