Te fifi rahi o Maggy e ta ˈu haamaitairaa

Mahana piti 2 no Me 1995, o te taio mahana ïa i fanauhia ˈi ta ˈu tamahine e i pohe ai ta ˈu vahine. Aita râ hoi o Maggy i ite noa ˈˈe i ta ˈna aiû. To ˈu tiaturiraa i teie nei, o te faaiteraa ˈtu ïa ia Tamara i to ˈna mama ia faatiahia mai oia.

I MURI aˈe i to mâua faaipoiporaa 16 matahiti te maoro, ua parau te taote i ta ˈu vahine ra o Maggy e ua tupuhia o ˈna i te mariri ai taata o te titi, e e tau avaˈe noa to ˈna e toe ra. A pae matahiti atura ïa i teie nei. Auaa râ, ua nehenehe o Maggy e ora mai tei matauhia i taua mau matahiti hopea ra o to ˈna oraraa. I te pae hopea noa te rahi-roa-raa te mauiui.

No te mea ua rahi to ˈna mariri ai taata, ua parau te mau taote e eita paha oia e hapû. A feruri na ïa i to mâua hitimahuta i te taime o te hoê hiˈopoaraa matauhia no te ite i te aanoraa o te oru o te mariri ai taata, ua ite ratou i te hoê aiû i roto i to ˈna opu! E tamahine. E maha avaˈe e te afa to Maggy. Ua oaoa roa oia i to ˈna neheneheraa e riro ei mama no te taime matamua.

Ua rave o Maggy i te mau mea atoa o ta ˈna e nehenehe, ia fanau mai oia i te hoê aiû oraora maitai. Ua haapao maitai o ˈna i ta ˈna maa, e i na hebedoma hopea e piti atoa o to ˈna oraraa i te puai-roa-raa te mauiui, ua rave oia i te mau raau tamǎrû i te taime noa eita ta ˈna e nehenehe faahou e faaoromai.

Haamaitaihia ma te hoê aiû oraora maitai

I te Mahana maa 29 no Eperera, ua otuitui te mafatu o Maggy e ua parau oia e: “Ia manaˈo vau e e pohe au.” Ua faaea vau i pihai iho ia ˈna i te hopea hebedoma taatoa. I muri aˈe i te taniuniuraahia te taote i te Monire, ua faahoro oioi atura vau ia ˈna i te fare maˈi no Montreal, i Kanada, e ere i te mea atea i to mâua fare i St. Jérôme.

I te area hora 5 e te afa i te poipoi i muri iho, ua haere atu te hoê tuati vahine na pihai iho i te uputa o te piha o Maggy, e ua ite atura oia e te fifihia ra o ˈna. E au ra e te tupuhia ra oia i te maˈi mafatu. Ua titau-oioi-hia te hoê taote mai te piha i pihai iho mai. Noa ˈtu e ua pohe o Maggy, ua nehenehe râ te mau taote e faaora mai i ta mâua aiû. Aita i naeahia te avaˈe o Tamara i to ˈna fanauraahia mai, e piti avaˈe e te afa e toe ra, e e 1,1 kilo to ˈna.

I te mea e tei raro roa te faito toto o Tamara, ua hinaaro te mau taote e pâmu i te toto i roto ia ˈna. Tera râ, ua faaitoitohia ratou ia faaohipa i te oromona érythropoïétine hamanihia. Ua na reira ˈtura ratou, e i te mea e ua maraa to ˈna faito toto maoti te faaohiparaahia taua oromona ra, ua na ô atura te hoê tuati vahine e: “No te aha ratou e ore ai e faaohipa i te reira i nia i te mau aiû atoa?”

Ua roo-atoa-hia o Tamara i te tahi atu mau fifi no to ˈna fanau-oioi-raahia mai, ua afaro pauroa râ. Inaha, i to te Taote Watters, taote uaua uira, hiˈopoaraa ia ˈna i muri iho, na ô atura oia i te tuati vahine e: “Ia manaˈo vau, ua hape oe i te aiû no te hiˈopoa; e au ra e mea maitai roa o ˈna.”

Te faarururaa i te pohe e te faaoromairaa i muri iho

Ua riro mau ei fifi no ˈu ia hiˈo ia Maggy ia pohe. Ua peapea roa vau. E mea fifi roa ia paraparau no nia i te poheraa o Maggy. Ua na reira râ vau i to te mau taeae e te mau tuahine kerisetiano haereraa mai i te fare maˈi. Ua iti mǎrû noa te mauiui rahi noa ˈtu vau i te paraparau i te reira. I te mau taime atoa vau e taio ai i te hoê tumu parau o Te Pare Tiairaa aore ra A ara mai na! o te haaputapû iho â ia ˈu, e tuu na vau i te reira i te hiti i roto i te hoê vahi iti na ˈu iho o ta ˈu vairaa buka e e rave mai e e taio ia hinaaro anaˈe au.

Te tahi atu fifi, oia hoi te hoˈiraa i te fare e aita e taata. E mea fifi roa ia haapaiuma i te moemoe. Te hoˈi noa maira teie huru, noa ˈtu e te faaitoito maira te mau hoa kerisetiano ia ˈu. Ua matau noa mâua Maggy e rave amui i te ohipa, e ua tauaparau mâua no nia i te fifi o te moemoe o ta ˈu e farerei. Ua hinaaro o ˈna ia faaipoipo faahou vau. E ere râ i te mea ohie.

Te turu a te mau hoa kerisetiano

Aita vau i ite e eaha ta ˈu e rave ahiri e aita te Tomite Tuatiraa e te Fare maˈi (CLH na roto i te reo Farani) a te mau Ite no Iehova i turu mai. I te poipoi i pohe ai o Maggy, ua haere mai te hoê Ite aravihi a te CLH i te fare maˈi e ua horoa mai oia i te tauturu o ta ˈu i hinaaro.

Ua maere te mau rave ohipa o te fare maˈi i te tauturu o ta ˈu i fanaˈo no ǒ mai i ta mâua amuiraa kerisetiano no St. Jérôme, e te tahi atu mau amuiraa atoa no reira. I te po i faaitehia ˈi te poheraa o Maggy i ta matou putuputuraa kerisetiano, hau atu i te 20 mau hoa here i pûpû mai i ta ratou tauturu. E mea rahi mau â te turu.

Ua tunu te mau hoa i te maa na ˈu; ua î roa ta ˈu faatoetoeraa i te maa no e rave rahi avaˈe. Ua haapao atoa to ˈu mau fetii, te mau taeae e te mau tuahine kerisetiano i te ahu no ta ˈu tamahine. Ua horoa mai ratou e rave rahi hoi taoˈa e aita e navai te vahi no te haaputu i te reira.

Mau oaoaraa i teie nei e te mau haamaitairaa no a muri aˈe

Te tauturu maira o Tamara ia ˈu ia ore au ia manaˈonaˈo noa i to ˈu moemoe. Ua here roa vau ia ˈna. I te mau mahana atoa ia aroha vau ia ˈna ma te oaoa e “iaorana,” e ata mai o ˈna, e haamata o ˈna i te “paraparau,” e hautiuti oia i to ˈna rima e to ˈna avae, ma te ieie.

Mai te hoê taata mea au na ˈna te tuatapaparaa i te reva teitei, te tiai nei au i te taime e tapea ˈi au ia Tamara i nia i to ˈu turi e e mataitai ai o ˈna na roto i te hiˈo fetia i te mau mea faahiahia roa o te raˈi a to tatou Poiete Rahi ra o Iehova. Ua riro mau â te manaˈonaˈoraa i te oraraa mure ore i roto i te Paradaiso i nia i te fenua nei ei pu no te tamahanahanaraa. E te iteraa e tera te haamaitairaa i mua ia Tamara, ua rahi atu ïa to ˈu oaoa.—Salamo 37:9-11, 29.

Ia haamanaˈo faahou vau i te mau ohipa i tupu i na matahiti e pae i mairi aˈenei, e nehenehe au e faataa maitai atu â i te reira ei mau tupuraa mauiui e te oaoa. Ua haapii hau atu â vau no nia ia ˈu iho e no nia i te oraraa. Te tiai ru nei au i te tau a muri aˈe, mai ta te Bibilia e faataa ra, “e ore roa te pohe, e te oto, e te mihi, e te mauiui, e ore atoa.”—Apokalupo 21:3, 4.

No reira, ia faatiahia mai o Maggy, e nehenehe oia e hutihuti maitai roa i te aho ma te mauiui ore. Hau atu â, to ˈu tiaturi e to ˈu hinaaro papu, o te taeraa ïa i reira no te faaite atu ia Tamara ia Maggy, ia nehenehe hoi oia e ite i te tamahine iti o ta ˈna i atuatu rahi.—Faatiahia e Lorne Wilkins.

[Hohoˈa i te api 24]

Mâua ta ˈu vahine

[Hohoˈa i te api 24]

Ta mâua tamahine ra o Tamara