“Ua haapao vau i te faaroo”

IA AU I TE FAAITERAA A TE MAU HOA O BRUNELLA INCONDITI

“UA RIRO te mahana maa ei mahana tei ore i oti oioi e te moemoe mau. O vau anaˈe i roto i te piha, ma te manaˈo e aita e ravea. Mai te huru ra e te haere ra vau na roto i te hoê vahi poiri. Mea maitai roa te mau ohipa atoa, e ma te taue, ua turai mai te hoê taata i te opani i nia ia ˈu, e aita e uputa no te haere i rapae, noa ˈtu eaha te ravea puai ta ˈu i tamata.”

Mea teimaha mau â te hoê hepohepo rahi i roto i te mafatu o Brunella Inconditi e 15 matahiti to ˈna. Ua hemo ê te mahana faufaa roa ˈˈe o to ˈna oraraa apî. I te omuaraa o taua matahiti ra, ua turai to ˈna here rahi no Iehova e no te Bibilia ia ˈna ia pûpû i to ˈna ora no ˈna. I te avae tiurai 1990, e bapetizohia o ˈna i te tairururaa mataeinaa “Te reo viivii ore” a te mau Ite no Iehova i Montreal, Kanada. Maoti râ hoi, ua tia ia Brunella ia faaruru i te hoê tamataraa o to ˈna faaroo o te vai mai i te toea o to ˈna oraraa.

E piti mahana na mua oia e faataipe ai i te pûpûraa o to ˈna ora na roto i te bapetizoraa i roto i te pape, ua ite o Brunella e ua roohia oia i te mariri ai taata o te toto. Ua hinaaro te mau taote no te fare maˈi a te tamarii o taua vahi ra e haamata oioi i te rapaauraa, no reira o Brunella i faaea ˈi i te fare maˈi.

Ua haaputapû ta ˈna iho mau parau i te mau taote

Ua ite o Brunella e mea moˈa te toto i mua i te aro o te Atua ra o Iehova. (Levitiko 17:11) Ua haapapu to ˈna mau metua ra o Edmondo e o Nicoletta, e eiaha roa e faaohipa i te toto i roto i te rapaauraa i ta raua tamahine. “Ua hinaaro o Brunella e ia faaroo te mau taote i te reira mai roto atoa i to ˈna vaha, noa ˈtu e aitâ i naea ˈtura i to ˈna matahiti,” ta to ˈna metua tane e haamanaˈo ra. “Ua parau papu atu oia ia ratou e aita oia e hinaaro ra i te hoê rapaauraa o te ofati i te ture a te Bibilia ‘ia haapae i te toto’”.—Ohipa 15:20.

I te 10 no tuirai 1990, ua farerei e toru taote e te hoê vahine turuutaa i te mau metua o Brunella e e piti tavini no roto i te amuiraa a te mau Ite no Iehova no taua vahi ra. Ua haapapu te mau hiˈopoaraa e ua roohia o Brunella i te maraaraa tano ore o te mau taoˈa tahi ora o te pape toto. Ua faataa mai te mau taote i ta ratou opuaraa no te aro i te maˈi. Ua faataa mǎrû noa mai ratou e mea fifi mau ia rapaau. “Ua putapû roa râ te mau taote e te vahine turuutaa i te haerea o Brunella e to ˈna hinaaro papu e auraro i te Atua. Ua maere roa ratou i te here o to ˈna mau metua e te turu o te mau hoa o te amuiraa kerisetiano. Ua au atoa ratou i to matou faaiteraa e te taa ra e te faatura nei matou i to ratou tiaraa,” ta te hoê matahiapo o te amuiraa e haamanaˈo ra.

Ua tamata te mau taote i te arai i te pâmuraa toto. E horoahia na Brunella i te ravea rapaauraa o te faaore roa i te mau vaehaa i tupuhia i te maˈi, aita râ i faarahi roa ia au i tei matauhia. E faaiti mai te reira i te mau fifi i nia i te mau taoˈa tahi ora o te toto e faatupuhia e te rapaauraa. “Ua haapao te mau taote i te mau hinaaro i te pae tino, i te pae o te mau manaˈo hohonu e i te pae varua o Brunella,” o ta Nicoletta ïa e faataa ra. “I to matou aniraa ia haere e hiˈo i te hoê taote aravihi o te ore e faaohipa ra i te toto, no te rapaauraa i te mau tamarii i roohia i te mariri ai taata o te toto, ua farii ratou.” Ua tupu i rotopu ia Brunella e te feia rave ohipa o te fare maˈi i te hoê taairaa here mahanahana mau.

Te mau tapao i te pae varua

Noa ˈtu e ua faatupu te rapaauraa matamua i te tahi mau faahopearaa maitatai, no haamata noa ˈtura ïa te tamataraa o Brunella. I te avae novema, ua iti mai to ˈna maˈi, no reira ma te ore e tiai ua bapetizohia ˈtura oia. Ma te feruri hohonu i nia i na avae matamua, ua farii o Brunella e: “E ere roa ˈtu i te mea ohie. E titauhia i te puai rahi, e e tia atoa ia feruri i nia i te mau mea maitatai. . . . Ua tamatahia to ˈu faaroo, ua mau papu râ vau, e ua opua noa vau e riro ei pionie tamau [tavini i te taime taatoa].”

I te omuaraa o te matahiti 1991, ua faura faahou mai te maˈi o Brunella. Fatata o ˈna i te pohe, a horoahia ˈi i te rapaauraa ma te faaore i te mau vaehaa i maˈihia, i te maereraa e te oaoaraa o te taatoaraa, ua ora mai oia. I te avae atete, ua maitai tano noa oia no te rave i te hoê avae i roto i te pororaa ei pionie tauturu. Ua faarahi faahou mai to ˈna maˈi, e i te avae novema 1991 e rave rahi vahi o to ˈna tino tei roohia i te mariri ai taata. Ua haamata te tahi atu pǔpǔ taote no te tahi atu fare maˈi i te rapaau ia ˈna e te ravea topitaraa i te hihi.

Noa ˈtu taua huru ohipa fifi mau ra, ua mau papu noa o Brunella e ua tuu oia i te tahi mau tapao i te pae varua i mua ia ˈna. I to ˈna iteraa e to ˈna maˈi o te mariri ai taata o te toto, ua parauhia e e ora noa paha oia e ono avae. I teie nei, fatata i te hoê matahiti e te afa i muri aˈe, te faatupu noa ra o Brunella i te mau opuaraa no a muri aˈe. “Aita oia i haamâuˈa i to ˈna taime no te mau ohipa o te patoi i ta ˈna mau fa,” i tapaohia e te hoê matahiapo o te amuiraa. “Ua turu te faaroo o Brunella i roto i te Paradaiso i tâpûhia e te Atua ia ˈna i roto i ta ˈna tamataraa. Ua tupu oia i te paari kerisetiano noa ˈtu e mea apî â oia. Ua faaitoito to ˈna haerea e to ˈna huru i te amuiraa e ua haaputapû oia i te mafatu o te feia i matau ia ˈna, oia atoa te feia rave ohipa i te fare maˈi.” Te haamanaˈo ra to ˈna metua vahine e: “Eita oia e autâ. Ia ani mai te hoê taata e eaha to ˈna huru, e pahono oia e, ‘Mea maitai roa’ aore ra, ‘E ere i te mea ino, e o oe?’”

Te hoê oraraa hau mau no a muri aˈe

Ua faanaho o Brunella e haere i te tairururaa mataeinaa “Te feia amo i te maramarama” a te mau Ite no Iehova i te avae tiurai 1992. A tiai noa ˈi i te tairururaa, ua tapea-noa-hia râ o Brunella i te fare maˈi, e te faarue mǎrû noa râ to ˈna ora. Teie râ, ua tae atu oia i te tairururaa i roto i te hoê parahiraa huira, ma te hinaaro e hiˈo i te darama A rave i te mea tia i mua i te aro o Iehova.

Ua hoˈi oia i pihai iho i to ˈna utuafare no te mau taime hopea o to ˈna oraraa. “Tae roa ˈtu i te hopea, ua haapao rahi aˈe oia ia vetahi ê i te haapaoraa ia ˈna iho,” o ta Nicoletta ïa i parau. “Ua faaitoito oia ia ratou ia haapii i te Bibilia, ma te parau ia ratou e, ‘E farerei faahou tatou i roto i te Paradaiso.’”

Ua pohe o Brunella i te 27 no tiurai 1992, ma te tapea maite i to ˈna tiaturiraa i roto i te tia-faahou-raa no te ora i roto i te Paradaiso i nia i te fenua nei. Ua haamata noa oia i te tapapa i ta ˈna mau opuaraa, ua faanaho râ oia e tamau â i ta ˈna euhe no te hororaa i muri aˈe i to ˈna tia-faahou-raa. Tau mahana noa na mua ˈˈe i to ˈna poheraa, ua papai o Brunella i teie rata i muri nei, o tei taiohia i te taime hunaraa.

“E to ˈu mau hoa here e:

“Mauruuru no to outou taeraa mai. E auraa rahi to to outou taeraa mai no to ˈu utuafare.

“No te feia i tei vai piri noa i pihai iho ia ˈu—ua faaruru tatou e rave rahi mau ohipa. Ua ite tatou e rave rahi mau taime fifi mau, e ua farerei atoa râ i te mau taime arearea. Ua riro ei aroraa fifi e te roa mau, aita râ vau i manaˈo e ua hiˈa vau. Mai tei parauhia i roto i te mau Papai, ‘Ua aro au i te aroraa nehenehe, Ua horo vau i te hororaa tae roa i te hopea, Ua haapao vau i te faaroo.’—Timoteo 2, 4:7.

“E rave rahi atoa ta ˈu i haapii, e ua paari roa vau e ua ite to ˈu mau hoa e te feia i pihai iho ia ˈu i te tauiraa. Te hinaaro nei au e haamauruuru te feia atoa o tei turu mai ia ˈu.

“Outou o te tiaturi nei i roto i te faanahonahoraa apî e ia Iehova, ua ite outou e te vai ra te hoê tia-faahou-raa, mai tei faahitihia i roto i te Ioane 5:28, 29. No reira, a vai aueue ore noa i roto i te parau mau, e e nehenehe atu ai tatou e farerei faahou te tahi e te tahi.

“Te hinaaro nei au e haamauruuru te feia o tei ite i ta ˈu i faaruru. Te apa rahi atu nei au ia outou paatoa. Te here nei au ia outou pauroa.”

Aita o Brunella i vaiiho i to ˈna apîraa aore ra i to ˈna maˈi ia faataime i to ˈna pûpûraa ia ˈna no te Atua. Ua faaitoito to ˈna hiˈoraa i te pae faaroo e te tiaraa papu i te feia apî e te feia ruhiruhia e ora nei ia tatara i te mau mea atoa o te faataere ia ratou i roto i to ratou hororaa no te ora.—Hebera 12:1.