Ua haamanaˈo mai teie kudu

NA TE PAPAI VEA A A ARA MAI NA! I AFIRIKA APATOA

IA PAARI mai te kudu oni haviti, te hoê animala parauhia antilope ma te mau tara rahi oviriviri e te mau tariˈa taa maitai, fatata 1,50 metera ïa to ˈna roa i te tapono ra. Mea taa ê atoa te ufa, noa ˈtu e aita to ˈna e tara, maoti to ˈna nau tariˈa aano. E animala mamahu te kudu, e vai ara noa ra e e oioi oia i te horo e tapuni. No reira, e mea faahiahia roa te ohipa i farereihia e Karen i Zimbabwe.

Mai tei faatiahia i roto i te vea ra African Wildlife, ua iteahia mai te hoê fanauˈa kudu ufa o tei tafifi i roto i te hoê aua niuniu, ua tatarahia mai oia e ua horoahia na Karen, o tei faaamu ia ˈna e te mohina titi e tau hebedoma te maoro. Ua rahi roa mai oia e ua faaea noa e ati aˈe te vahi hamaniraa û, i reira hoi o Karen e to ˈna utuafare e faaea ˈi, e pinepine oia i te hauti e te mau tamarii e te mau urî. Teie râ, ua hoˈi noa ˈtu oia i roto i te uruaihere e ua hoˈi faahou mai e, i to ˈna fatata-roa-raa i te paari, aita o ˈna i ite-faahou-hia na pihai iho i te vahi faaamuraa animala.

Fatata e piti matahiti i muri iho, a tere ai oia na nia i te purumu o te vahi faaamuraa animala, ua maere o Karen i te iteraa e aita te hoê kudu ufa hapû i horo i te piriraa ˈtu to ˈna pereoo. Aita atoa oia i horo i to ˈna haereraa ˈtu ia ˈna ra. I taua taime ra, ite atura oia e o tauâ animala ra o ta ˈna iho i faaamu e te mohina titi, ua paraparau mǎrû atura oia ia ˈna a tapiri noa ˈtu ai o ˈna i pihai iho ma te ru ore. Ua ite atoa mai te kudu ufa ia ˈna, ua tuu atura oia i to ˈna afii i raro e hoˈihoˈi mai nei ia ˈna, a vaiiho noa ˈi o ˈna ia tapeapea o Karen ia ˈna!

Tau avaˈe i muri iho, ua haere faahou mai te kudu ufa i te pae purumu—i teie râ taime, e ta ˈna fanauˈa iti. Ua manaˈo o Karen e te faaiteite haere ra te kudu ufa ma te teoteo i ta ˈna fanauˈa e ua faatia faahou oia ia tapeapeahia o ˈna. Ua tupu te hoê â ohipa tau hebedoma i muri iho, e au ra e te tiai mau ra te kudu ufa ia Karen.

E piti avaˈe ê atu tei mairi, e ua parau te tahi mau rave ohipa i te faaamuraa animala ra, e ua ite ratou i taua kudu ufa ra e te hoê taura i nia i to ˈna arapoa. Ua tamata ratou i te haafatata ˈtu i te kudu ufa ra no te tatara i te taura, ua horo râ oia. No reira, haere atura Karen e imi ia ˈna i roto i te uruaihere, a pii noa ˈi a haere noa ˈi oia. Aita i maoro roa, ua haere maira te kudu na mua mai ia ˈna. Ua manaˈo iho â o Karen e afai mai i te tahi tâpû faraoa, e mea au roa hoi na te kudu ufa, e a horoa ˈi oia i teie faraoa au roa, ua tâpû ihora te tane a Karen i te taura e haafifi ra.

Ua faatupu rahi te taairaa papu maitai o tei vai maoro i rotopu i te taata e te animala, i te oaoa i roto i teie utuafare.