Ua haapii te mau taote i te fatataraa vau i te pohe

I TE afaraa o te avaˈe me 1991, ua faaitehia mai ia mâua e te tiai ra mâua i te maharaa o ta mâua tamarii. E iva matahiti to Mikael, ta mâa tamarii apî aˈe, e e 13 to ta mâua maehaa tamahine, o Maria e o Sara. Noa ˈtu e aitâ i faanahohia, ua oioi mâua i te manaˈo e fanau mai i te tahi atu aiû.

I te hoê po e toru avaˈe hapû to ˈu, ua mauiui taue noa vau i roto i to ˈu mahaha. I te mahana i muri iho aita vau i nehenehe e haere maitai. Ua parau mai te taote vahine e e maˈi mahaha to ˈu, e ua horoa mai o ˈna na ˈu i te hoê raau tupohe bateria tei piihia te pénicilline. Ua maitai mai râ vau e piti mahana i muri iho, e mea paruparu rii râ vau. Ua tupu taue te mauiui i roto i te tahi mahaha, e ua rave-faahou-hia taua noâ huru faanahoraa ra.

I te mau mahana i muri iho, aita vau i nehenehe e tiraha no te fifi o te hutiraa aho. A mairi ai hoê hebedoma i muri iho i te mauiui matamua, ua ninamuhia to ˈu avae e ua oru. I reira to ˈu tapearaahia i te fare maˈi. Ua faaara mai te taote ia ˈu e aita to ˈu e maˈi mahaha maoti râ e toto putua. Ua parau atoa mai o ˈna ia ˈu e ua putua atoa te toto i roto i to ˈu tapa. Ua faaroo vau e o te toto putua te tumu rahi roa ˈˈe o te pohe o te mau vahine hapû i Tuete. Tau mahana i muri iho, ua afaihia vau i te Fare maˈi Karolinska Sjukhuset i Stockholm, te hoê fare maˈi taa ê no te mau vahine hapû i roto i te fifi.

Ua opua te mau taote i te rapaau ia ˈu e te raau faatahe i te toto putua. Ua haapapu mai ratou ia ˈu e mea iti te fifi ia tahe anaˈe te toto no te raau ia faaauhia i te fifi atâta e putua faahou te toto i roto i te mau mahaha. I muri aˈe e piti hebedoma, ua maitai au no te hoˈi i te fare. Ua ite au i te oaoa mahanahana, uˈana i te oraraa mai e te hoê aiû ora e paari maira i roto i to ˈu opu.

Taime fanauraa

Ua ravehia te faaotiraa e faafanau ia ˈu, na mua ˈˈe a ravehia ˈi te mau faanahoraa, ua ite au i te mauiui i raro aˈe mai i te opu. Ua haavitiviti atura vau i te haere i te fare maˈi. Aita râ te mau taote i ite i te tahi fifi.

I te po i muri iho ua oru roa to ˈu opu, e aita te mauiui i iti mai. I te tuiraa po, ua hiˈopoa te hoê taote ia ˈu e ua ite oia e ua fatata roa vau i te fanau. I te mahana i muri iho ua oru roa ˈtu â to ˈu opu, e ua uˈana roa te mauiui. Ua peapea te taote e ua ani mai e teihea taime hopea to te aiû hautiraa. Ua taa oioi ia ˈu e mea maoro aita oia i hautiuti.

Ua faahoro-oioi-hia vau i te piha fanauraa. Ua nehenehe au e faaroo i te paraparauraa a te feia rave ohipa. “Eita o ˈna e farii i te pâmuraa toto,” o ta te tahi taata ïa i parau. Ua tapiri mai te hoê tuati vahine e ua parau ma te reo puai: “Ua ite oe ua pohe ta oe aiû, aita anei?” E au e te patia maira te hoê taata i te hoê tipi i roto i to ˈu mafatu.—Maseli 12:18.

Patoiraa papu i te pâmuraa toto

Haere oioi mai nei to ˈu taote e ua parau mai e mea ino roa vau. Ua ani mai o ˈna e te hinaaro mau noa ra anei au e tapea maite i ta ˈu faaotiraa e patoi i te pâmuraa toto. Ua faaite papu vau ia ˈna e te reira iho â, aita râ vau e haamanaˈo faahou ra i te mea i tupu i muri iho. Teie râ, ua haamaramarama maitai au i to ˈu taote e ua faauehia te mau kerisetiano ia haapae i te toto e te hinaaro nei au e auraro i te ture a te Atua.—Ohipa 15:28, 29; 21:25.

I te hoê â taime ua pii ratou i te tahi atu taote, Barbro Larson, e taote tâpû aravihi. Ua tae oioi mai o ˈna e ua tâpû oioi. I to ratou tâpûraa i to ˈu opu, ite atura ratou e ua pau e toru litera toto tei tahe na roto ia ˈu. Ua auraro râ te taote Larson i ta ˈu faaotiraa no nia i te pâmuraa toto.

I muri iho, ua parau te tahi atu taote e i roto noa maa minuti e e pohe iho â vau. “Aita vau i ite e ora anei o ˈna i teie nei,” o ta ˈna ïa i parau. I muri iho ua faaroo vau e aita te mau taote i ite i te tumu o te taheraa toto, e no reira ratou i tuu ai i te hoê ahu tapiri i roto i to ˈu opu. Aita roa ˈtu e tiaturiraa i horoahia mai e te mau taote e te mau tuati e ora mai anei au.

I te taeraa mai ta ˈu mau tamarii i te fare maˈi e to ratou iteraa i to ˈu fifi, ua parau mai te hoê e te fatata maira o Aramagedo e i muri iho e e faatia-faahou-hia mai au. Auê ïa faanahoraa nehenehe e te tia te tia-faahou-raa!—Ioane 5:28, 29; 11:17-44; Ohipa 24:15; Apokalupo 21:3, 4.

Te ora i nia i te faito

Ua topa mai to ˈu faito taoˈa peni toto e 4 tarama i te 0,1 litera, e au râ e ua mau te taheraa toto. I te omuaraa ua tuu vau i te hoê A ara mai na! no te 8 no novema 1991 i roto i ta ˈu haapueraa parau i te pae rapaauraa. Ua ite te taote Larson i te reira e ua taio i te tumu parau ra “Te aperaa e te arairaa i te mau taheraa toto ma te ore e faaohipa i te pâmuraa toto.” Ua hinaaro uˈana oia e hiˈopoa i te reira no te ite te vai ra anei te tahi ohipa o ta ˈna e nehenehe e faaohipa no te tauturu ia ˈu ia ora mai. Ua tapao oia i te taˈo ra “érythropoïétine,” e raau teie o te faaitoito i te tino ia hamani i te toropuru uteute. O ta ˈna ïa e faaohipa ra i teie nei. Te titau nei râ te rapaauraa i te taime no te horoa mai i te mau faahopearaa. Teie ïa te uiraa, E ohipa oioi anei te érythropoïétine?

I te mahana i muri iho ua topa to ˈu faito taoˈa peni toto e 2,9. I to ˈu araraa mai e to ˈu iteraa i to ˈu utuafare taatoa i pihai i to ˈu roˈi, ua uiui au e eaha te ohipa i tupu. Aita vau i nehenehe e paraparau no te matini hutiraa aho. Fatata roa vau i te iriti no te mauiui, aita râ vau i taˈi. Ua parau mai te taatoaraa ia ˈu ia tapea i to ˈu puai no te ora mai.

Te mahana i muri iho ua fivahia vau no te mea ua ama to ˈu opu no te ahu tapiri tei tuuhia i roto i to ˈu opu. Ua topa to ˈu faito taoˈa peni toto e 2,7. Noa ˈtu e e mea atâta i te faataoto i te hoê taata i roto i teie huru tupuraa, ua faataa te taote Larson e noa ˈtu teie fifi, e tia ia ratou ia tâpû faahou no te iriti mai i te ahu tapiri.

Na mua ˈˈe i te tâpûraa ua faatiahia te mau tamarii ia tomo mai e ia haere mai e farerei ia ˈu. Ua manaˈo te mau taata atoa e e aroharaa hopea teie. E rave rahi taata rave ohipa i te fare maˈi tei taˈi. Aita ratou i tiaturi e e ora mai au. Ua puai mau râ ta mâua mau tamarii e ua tamǎrû e ua turai ia ˈu ia tapea i te tiaturiraa.

No te mea eita i te mea puai roa te raau faataoto, ua nehenehe au e faaroo i te tahi mau taime eaha ta te mau taote e te mau tuati e parau ra. Ua paraparau vetahi no nia ia ˈu mai te huru ra e ua pohe aˈena vau. I muri iho, i to ˈu faatia-faahou-raa i te mea o ta ˈu i faaroo i te roaraa o te tâpûraa, ua tatarahapa mai te hoê tuati. Ua parau râ o ˈna e ua tiaturi o ˈna e e pohe iho â vau e aita o ˈna i taa e mea nafea to ˈu oraraa mai.

I te mahana i muri iho ua maitai mai au. Ua maraa to ˈu faito taoˈa peni toto e 2,9 e e 9 te faito o te rahiraa taoˈa peni toto. Ua haere to ˈu mau taeae e mau tuahine kerisetiano e farerei i to ˈu utuafare, ma te afai atu i te maa e te taofe. Ua mauruuru roa matou no to ratou here e te aroha. I te po e mea fifi noâ to ˈu maˈi e aita i taui, e ua faahorohia vau i roto i te tahi atu fare maˈi.

Te haapii ra te mau taote

E rave rahi feia rave ohipa i te fare maˈi tei hinaaro e ite no nia ia ˈu, e mea maitai te rahiraa. Teie ta te hoê tuati vahine i parau: “Ua faaora mau â to oe Atua ia oe.” Ua haere atoa mai te hoê taote no te tahi atu fare maˈi e teie ta ˈna i parau: “Te hinaaro noa ra vau e ite e eaha te huru o te hoê taata ia topa anaˈe to ˈna faito o te taoˈa peni toto. Aita vau e taa ra e nafea to oe oraoraraa mai.”

Te mahana i muri iho, noa ˈtu e aita to ˈu taote e rave i te ohipa i taua mahana ra, ua haere mai râ o ˈna e hiˈo ia ˈu. Ua parau mai o ˈna ia ˈu e ua haama o ˈna no te ohipa i tupu. Mai te peu e e ora roa mai au, o ta ˈna ïa i parau, e rave ratou i te mau maimiraa apî no nia i te mau ravea monoraa i te pâmuraa toto i nia i te feia maˈi.

E mea maere mau â to ˈu oraraa mai. E piti hebedoma e te afa i muri iho i to ˈu fanauraa fifi, ua maraa to ˈu faito taoˈa peni toto hau rii i te 8. No reira ua matara mai au i rapae i te fare maˈi. E toru mahana i muri iho ua tupu ta matou tairururaa haaati o te matahiti hoê a te mau Ite no Iehova, e ua tae au. Auê ïa faaitoitoraa ia farerei faahou i to tatou mau taeae e mau tuahine kerisetiano o tei turu mai i roto i to matou fifi!—Maseli 17:17.

Mai ta te taote Larson i tǎpǔ, ua neneihia i muri iho te hoê faatiaraa no nia i to ˈu aamu tei piihia “Te mono ra te érythropoïétine i te pâmuraa toto,” i roto i te vea i te pae rapaauraa Läkartidningen no Tuete. Teie tei parauhia: “Te mauiui nei te hoê vahine Ite no Iehova e 35 matahiti, i te hoê taheraa toto puai o te fanauraa. Ua patoi o ˈna i te pâmuraa toto ua farii râ o ˈna i te ravea rapaauraa érythropoïétine. I muri iho e iva mahana rapaauraa i muri aˈe i te tâpûraa e te mau faito teitei érythropoïétine, ua maraa te faito taoˈa peni toto mai 2,9 i e 8,2 tarama i te 0,1 litera ma te fifi ore i muri iho.”

Teie te faaotiraa o te tumu parau: “I te haamataraa e mea paruparu roa te taata maˈi, ua ora oioi mai râ o ˈna. Hau atu â, aita roa ˈtu e fifi i tupu i muri aˈe i te tâpûraa. Ua matara te taata maˈi mai te fare maˈi e piti hebedoma i muri iho.”

Noa ˈtu e e mea fifi e te peapea teie aamu no tatou, te oaoa nei tatou e i te pae hopea, ua haapii hau atu â te tahi mau taote no nia i te mau ravea monoraa i te pâmuraa toto. Ma te manaˈo maitai, ua ineine ratou no te tamata i te mau ravea rapaauraa tei manuïa.—Faatiahia e Ann Yipsiotis.

[Hohoˈa i te api 29]

E to ˈu taote tâpû tauturu