O vai te nehenehe e riro mai ei hiˈoraa maitai no ˈu?

“Ia faaruru vau i te fifi i te fare haapiiraa, te mea e tauturu ia ˈu o te haamanaˈoraa ïa i te hoê taata ta ˈu e au roa o tei faaruru i te hoê â tupuraa. E tutava ïa vau i te pee i to ˈna hiˈoraa. Mea ohie aˈe ïa no ˈu ia ite eaha te rave i mua i te fifi.”—Haley.

E tauturu te hoê hiˈoraa maitai ia ore oe e fifihia e ia naeahia ta oe mau fa. Mea faufaa râ ia maiti oe i te hoê hiˈoraa maitai.

• No te aha mea faufaa ia maiti maitai oe?

• E nafea oe ia maiti?

• To ratou manaˈo

No te aha mea faufaa ia maiti maitai oe?

• No te mea e ohipa te reira i nia i to oe haerea e to oe huru.

  Te faaitoito ra te Bibilia i te mau Kerisetiano ia maiti i te feia e hiˈoraa maitai to ratou. Te na ô ra: “A hiˈopoa maite ai outou i ta to ratou haerea e faatupu ra, a pee i to ratou faaroo.”—Hebera 13:7.

  Aˈoraa: E ohipa iho â te mau hiˈoraa ta oe e maiti i nia i to oe feruriraa. No reira, a maiti i te feia e huru maitatai to ratou, eiaha noa râ te feia tuiroo aore ra hoê â faito matahiti e to oe.

  “Mea rahi ta ˈu i haapii mai i te huru feruriraa e te haerea o Adam. E hoa o ˈna no ˈu e e Kerisetiano atoa. Te haamanaˈo noa ra vau i te mau mea ta ˈna i parau aore ra i rave. Aita o ˈna i ite e ua faufaahia vau i to ˈna hiˈoraa maitai.”—Colin.

• E ohipa atoa ta oe faaotiraa i nia i to oe huru feruriraa e aau.

  Te faaara ra te Bibilia: “Eiaha outou e vare. E ino te haerea maitai i te amuimuiraa i te feia iino.”—Korinetia 1, 15:33.

  Aˈoraa: A maiti i te hoê taata o te faatupu i te mau huru maitatai. Eiaha ïa oe e haapao noa i te huru rapaeau. Aita anaˈe, e tatarahapa oe i muri iho.

  “Ia faaau noa oe ia oe i te mau taata mea haviti mau, e haafaufaa ore oe ia oe e puta atoa mai te manaˈo e ere roa ˈtu oe mea nehenehe. I muri mai, e haapeapea rahi roa oe no to oe huru rapaeau.”—Tamara.

  A feruri na: Ia maiti oe i te feia tuiroo aore ra te mau maona ei hiˈoraa no oe, eaha te nehenehe e tupu?

• E ohipa atoa ta oe faaotiraa i nia i ta oe mau fa.

  Te na ô ra te Bibilia: “Te taata e haere ra e te feia paari, e paari ïa.”—Maseli 13:20.

  Aˈoraa: A maiti i te feia maitai, e huru maitatai to ratou ta oe atoa e hinaaro e faatupu. Ia hiˈopoa maitai oe i to ratou huru, e taa ia oe eaha te rave ia naeahia ta oe fa.

  “Ei hiˈoraa, eiaha oe e parau noa: ‘Hinaaro vau ia tiaturi te taata ia ˈu.’ Mea au aˈe ia parau oe: ‘E hinaaro vau e riro ei taata o te nehenehe e tiaturihia mai ia Jane. Eita o ˈna e mairi i te hora, e e haapao maitai o ˈna i ta ˈna ohipa.’”—Miriam.

  Manaˈo faufaa: A maiti i te hoê hiˈoraa maitai no te riro mai ei taata maitai.

E nafea oe ia maiti?

E piti ravea no te maiti i te hoê hiˈoraa maitai no oe.

1. A feruri i te hoê huru maitai ta oe e hinaaro e faatupu e a imi i te hoê taata o te faatupu ra i teie huru maitai.

2. A maiti i te hoê taata ta oe e au roa e a hiˈo mea nafea o ˈna ia faaite i te hoê huru maitai, o ta oe atoa e hinaaro e faatupu.

E tauturu te api haaferuriraa o teie tumu parau ia oe ia na reira.

I roto i te mau hiˈoraa maitai, e nehenehe oe e maiti:

• I te taata hoê â faito matahiti e to oe. “Te hinaaro nei au e riro mai to ˈu hoa piri roa ˈˈe. Mea tâuˈa roa o ˈna ia vetahi ê. Mea apî aˈe o ˈna ia ˈu, mea au râ na ˈu to ˈna mau huru maitatai. Te faatupu nei oia i te tahi mau huru aita ta ˈu. No reira, te hinaaro nei au e pee i to ˈna hiˈoraa.”—Miriam.

• I te taata paari. E nehenehe to oe na metua aore ra te mau taeae e tuahine e riro ei hiˈoraa maitai no oe. “Papu roa, e hiˈoraa maitai to ˈu na metua no ˈu. Mea faahiahia roa to raua mau huru maitatai. Te ite atoa ra vau i to raua nei huru e ta raua mau hapa, noa ˈtu râ te tavini nei raua ia Iehova ma te taiva ore. Ia paari au, hinaaro vau ia matau-atoa-hia vau ei tavini taiva ore mai ia raua.”—Annette.

• I te mau hiˈoraa Bibilia. “Ua hiˈopoa vau e rave rahi hiˈoraa Bibilia mai ia Timoteo, Ruta, Ioba, Petero e te tamahine iti Iseraela. Rahi atu â vau i te haapii no nia ia ratou, rahi atu â ïa ratou i te riro mai ei taata ora no ˈu. Ua au roa vau i te mau aamu o te buka A pee i to ratou faaroo, oia atoa tei faahitihia i roto i te “Index des modèles” o na buka Les jeunes s’interrogent. Réponses pratiques.”—Melinda.

Aˈoraa: Eiaha oe e maiti hoê noa hiˈoraa. Ua parau te aposetolo Paulo i te tahi atu mau Kerisetiano: “Ia tiatonu noa outou i te feia e faaau ra i to ratou haerea i te hiˈoraa ta matou i horoa ˈtu.”—Philipi 3:17.

Ua ite anei oe? O oe atoa te nehenehe e riro ei hiˈoraa maitai no vetahi ê. Te na ô ra hoi te Bibilia: “Ia riro oe ei hiˈoraa no te feia faaroo, i te parau hoi, te haerea, te here, te faaroo e te vai-viivii-ore-raa.”—Timoteo 1, 4:12.

“Noa ˈtu e titauhia ia haamaitaihia to oe nei huru, e nehenehe oe e tauturu ia vetahi ê ia haere i mua. Aita oe i ite o vai te hiˈopoa ra i to oe haerea. O vai ite? Peneiaˈe na roto i ta oe mau parau, e taui roa te oraraa o te hoê taata.”—Kiana.