TA TE FEIA APÎ E UIUI NEI
E nafea ia haamauiui te hoê hoa ia ˈu?
Te tia ia ite
E tupu iho â te fifi i roto i te auhoaraa. Ei taata tia ore, e nehenehe te hoê taata ta oe i matau roa aore ra te hoê hoa rahi e haamauiui ia oe na roto i to ˈna haerea aore ra ta ˈna parau. Parau mau, e taata tia ore atoa oe. Eita e ore ua haamauiui atoa paha oe i te tahi atu taata.—Iakobo 3:2.
E ravea ohie te reni natirara no te haamauiui i te tahi atu. Ei hiˈoraa, te parau ra te hoê taurearea apî o David te iˈoa: “Ia ite oe i te mau hohoˈa a to oe hoa i nia te reni faahoaraa o te arearea ra e te tahi atu, e aita oe, e haamata oe i te uiui no te aha aita oe i titau-manihini-hia. E puta mai te manaˈo e ua taiva to oe hoa ia oe a toaruaru ai oe.”
E nehenehe oe e haapauma i teie fifi.
E nafea ïa?
A hiˈopoa ia oe iho. Te parau ra te Bibilia: “Eiaha oe e inoino oioi, o te inoino hoi te tapao o te maamaa.”—Koheleta 7:9, nota.
“I te tahi taime, te mea ta oe i inoino e ere roa ˈtu hoi i te hoê fifi rahi.”—Alyssa.
A feruri: E puta hanoa anei oe? E nehenehe anei oe e faaoromai i te huru tia ore o vetahi?—Koheleta 7:21, 22.
A hiˈo i te mau haamaitairaa ia faaore i te hapa. Te parau ra te Bibilia: “E mea nehenehe ia ore . . . ia tâuˈa i te hara.”—Maseli 19:11.
“Noa ˈtu ua hapa mai te tahi ia oe, mea maitai ia faaore oe i ta ˈna hapa. Eita ïa oe e haamanaˈo noa i te hapa ta ˈna i rave i nia ia oe. Ia faaore oe i ta ˈna hapa, eiaha ïa oe e faahiti faahou i te reira, a haere râ i mua.”—Mallory.
A feruri: Mea ino mau â anei tera tupuraa? E nehenehe anei oe e faaore i te hapa ia vai noa te hau?—Kolosa 3:13.
Ia faahiti noa tatou i te mau fifi i roto i te auhoaraa, mai te huru ra e te iriti ra tatou i te opani ia ô mai te mataˈi toetoe i roto i te hoê piha mahanahana.
A tâuˈa i te tahi. Te parau ra te Bibilia: “A imi atoa ˈi i to vetahi ê maitai, eiaha noa râ i to outou iho.”—Philipi 2:4.
“Mai te peu te vai ra te here e te faatura i roto i te auhoaraa, e tumu papu ïa ta oe no te faaafaro oioi i te mau fifi. Ua haa rahi hoi oe no te paruru i te auhoaraa e aita oe e hinaaro ia mutu i te reira.”—Nicole.
A feruri: E nehenehe anei oe e ite i te vahi maitai no nia i ta te tahi huru hiˈoraa?—Philipi 2:3.
Te mea faufaa: Ia ite oe eaha te rave ia haamauiuihia oe, e tauturu te reira ia oe ia paari mai. No te aha e ore ai e haamata i teie nei?