Ia faaitoito tatou i to tatou taata-tupu ia riro ei pǐpǐ na ˈna
1 Teie ta Paulo i papai i roto i te Korinetia 1, 3:6 e: “Na ˈu hoi i tanu, e na Apolo i faara[r]i i te pape, na te Atua râ i faatupu.” Ua faaohipa o ˈna i teie faahohoˈaraa no te tauturu i to ˈna mau taeae ia taa i te faufaaraa ia rave i te ohipa i roto i te tahoê i raro aˈe i te aratairaa a te Mesia. Na roto i teie mau parau, ua tauturu atoa oia ia ratou ia ite i te faufaaraa o to ratou tiaraa i roto i te ohipa tanuraa e te pîpîraa.
2 E hope taua ohipa faaora ra i to tatou nei tau. O tatou te mau kerisetiano e, e hopoia ta tatou no te tauturu i to tatou taata-tupu ia riro ei pǐpǐ na Iesu (Ohipa 13:48). Nafea tatou e atuatu ai i te anaanatae na roto i te buka ra Te taata rahi roa ˈˈe i ora aˈenei?
3 Mai te peu e e hoˈi faahou tatou e farerei i te taata tei farii i te buka, e nehenehe tatou e parau e:
◼ “I to tâua farereiraa i mairi aˈenei, ua tauaparau tâua no nia i te huru o Iesu. Ua oaoa vau i te vaiihoraa mai i te buka Te taata rahi roa ˈˈe i ora aˈenei. Eaha te ohipa tei haaputapû ia oe i roto i te haapiiraa e te huru o Iesu?” A vaiiho ia pahono. A hiˈo i te pene 113, e a tauaparau i te hiˈoraa nehenehe e te haehaa vaiihohia e Iesu. A taio Philipi 2:8 no te faaite eaha te manaˈo o Paulo no nia i te huru haehaa o Iesu. A haapapu i muri iho e e nehenehe e ite hau atu â na roto i te hoê haapiiraa tamau o te Bibilia.
4 E hinaaro paha tatou i teie omuaraa parau:
◼ “Ua tauaparau tâua i te mau ohipa faatupuhia e Iesu i to ˈna parahiraa i te fenua nei o tei faaite e te haapao mau ra oia ia tatou. I to oe manaˈoraa, eaha ta ˈna e rave no te tamǎrû i te feia tei mauiui rahi?” A vaiiho ia pahono. A hohora i te buka i te pene 133, e a hiˈo i te mau manaˈo i te paratarapha pae. A faaite i te hohoˈa i te api i muri iho e a faataa eaha te huru o te oraraa ia tupu anaˈe te hinaaro o te Atua i nia i te fenua mai to te raˈi atoa ra. A haapapu i te mau haamaitairaa e fanaˈohia ia haapii hau atu â.
5 Mai te peu e aita te taata i farii i te buka i te taime matamua, peneiaˈe e nehenehe e haamata i te parau mai teie e:
◼ “Ia manaˈo vau te farii nei tâua i te parau e te aratai nei e rave rahi taata i teie mahana i to ratou oraraa ia au i te hiˈoraa o te hoê taata. O Iesu Mesia te hiˈoraa faahiahia roa ˈˈe o ta tatou e nehenehe e pee. Te hinaaro nei au e faaite ia oe i te hoê haapiiraa faufaa roa ta ˈu i huti mai na roto i te haapiiraa i te hiˈoraa vaiihohia mai e Iesu. [Hiˈo i te pene 40 o te buka Te taata rahi roa ˈˈe e a huti i te ara-maite-raa i nia i te haapiiraa o te aroha maitai o Iesu.] Ua faahaamanaˈo te reira ia ˈu ma te puai i te faufaaraa no ˈu ia faaite i teie huru maitai i to ˈu taata-tupu.” A taio Mataio 5:7. Mai te peu e te rahi maira te anaanatae, a pûpû i te buka, aore ra te vea iti Te haapao mau ra anei te Atua ia tatou?
6 Aore ra e hinaaro paha tatou e tamata roa ˈtu i teie faaiteraa:
◼ “I to ˈu haereraa mai, ua tauaparau tâua i te faufaaraa e haapii ia ite e o vai ra o Iesu. Te taio nei tâua i roto i te Ioane 17:3 e e roaa te ‘ora mure ore’ na roto i te titauraa i taua ite ra. Nafea e noaa ˈi ia tâua?” A vaiiho ia pahono. A tamau i te aparauraa ma te faataa nafea ia faatere i te hoê haapiiraa bibilia e nafea ia haafaufaa i te reira.
7 Te parau ra Paulo no nia i te taata ooti tataitahi o te “rave te tahi e te tahi i ta ˈna iho utua e au i ta ˈna ihora ohipa”. (Kor. 1, 3:8.) Mai te peu e e tutava tatou i te tauturu rahi i to tatou taata-tupu ia riro ei pǐpǐ na Iesu, e rahi mau â ta tatou utua maitai.