Te haapeapearaa rahi no nia i te reni faahoaraa e te feia apî

I 2025, ua faataa te mau faatereraa na te ao nei i to ratou haapeapearaa no nia i te faahopearaa o te reni faahoaraa i nia i te feia apî. Ua opani te hoê fenua, i te feia aita i naea atura 16 matahiti, ia faaohipa i te reni faahoaraa e te tahi atu fenua, te feruri ra ratou e rave i te hoê â atoa faanahoraa.

Te mea anaanatae, ua taa i te tahi feia apî e nehenehe te reni faahoaraa e riro ei fifi. Ua faahiti te hoê titorotororaa i ravehia i Marite na te hoê pu maimiraa Pew i matara i Eperera 2025, “te parau ra te afaraa o te feia apî (48%) e haafifi te reni faahoaraa i te feia apî.”

Ua faaara te mau aivanaa no nia i te ea, te faahopearaa o te reni faahoaraa i nia i te feruriraa o te feia apî. I te matahiti i mairi, ua parau te taote Vivek Murthy no Marite: “Te rahi noa ˈtu ra te feia apî e hepohepo ra. Eaha te tumu? Te rahiraa o te taime, no to ratou ïa faaohiparaa i te mau reni faahoaraa.”

E nafea te mau metua e paruru ai i ta ratou mau tamarii? Te horoa ra te Bibilia i te mau aˈoraa papu.

Eaha ta te mau metua e nehenehe e rave?

E hiˈo anaˈe i teie mau aratairaa Bibilia.

“E haapao maitai . . . te taata feruriraa haroˈaroˈa i to ˈna mau taahiraa tataitahi.”—Maseli 14:15.

Inaha e nehenehe ta outou tamarii e fifihia, eiaha ïa outou ia manaˈo e titauhia iho â ia faaohipa o ˈna i te mau reni faahoaraa. Hou a vaiiho ai ia ˈna ia haere i nia i te reni faahoaraa, ia papu na mua ia outou e auraro o ˈna i ta outou e parau atu no nia anei i te taime, te mau hoa ta ˈna e maiti e te mau tupuraa e titauhia ia ape.

• No te ite atu â, a taio i na tumu parau “E tia anei ia faaohipa ta ˈu tamarii i te reni faahoaraa?” e “A haapii i ta oe taurearea ia faaohipa i te reni faahoaraa ma te tano.”

“[A] faaohipa maitai i to outou taime.”—Ephesia 5:16.

Ia vaiiho outou i ta outou tamarii ia faaohipa i te reni faahoaraa, a haamau i te tahi mau faatureraa e a faataa ˈtu e ravea teie no te paruru ia ˈna. A ara i to ˈna huru, ua taui rii anei o ˈna? Mai te peu e e, mea maitai paha ia taotiahia to ˈna taime i nia i te reni faahoaraa.

• A faaohipa i te video Te faahoaraa i nia i te Internet: A ara! no te tauturu i te tamarii ia taa no te aha mea faufaa ia haapao maitai i ta ratou huru faaohiparaa i te reni faahoaraa.

No te ite hau atu â no nia i te manaˈo tauturu niuhia i nia i te Bibilia o ta te mau metua e nehenehe e rave, a hiˈo i te tumu parau “Faaararaa a te hoê tia mana i te pae ea i te fifi o te reni faahoaraa i nia i te feia apî: Eaha ta te Bibilia e parau ra?”

No te ite atu â

Te parau ra te Bibilia e te ora nei tatou i te mau mahana hopea, “e tau ino mau ïa e te fifi ia faaruru.” (Timoteo 2, 3:1-5) E horoa atoa râ te Bibilia i te mau aˈoraa no te tauturu ia tatou. E itehia 20 tumu parau rau no te tauturu i te mau metua e ta ratou mau tamarii ia ite mai i te tumu parau “Te maraa noa ra te fifi i te pae feruriraa o te feia apî: Eaha ta te Bibilia e parau ra?”