Faaararaa a te hoê tia mana i te pae ea i te fifi o te reni faahoaraa i nia i te feia apî: Eaha ta te Bibilia e parau ra?

I te 23 no Me 2023, ua faaara te tia mana i te pae ea no Marite i te fifi o te reni faahoaraa i nia i te feia apî.

• “Noa ˈtu mea maitai te reni faahoaraa no te tahi mau tamarii e feia apî, e nehenehe râ te reira e riro ei fifi no te ea i te pae feruriraa e te maitai o te tamarii e te feia apî.”—Social Media and Youth Mental Health: The U.S. Surgeon General’s Advisory, 2023.

Te faahiti ra te faataaraa i te mau maimiraa o tei faaite no te aha e haapeapea ˈi tatou.

• Te feia apî 12 tae atu i te 15 matahiti, “o te haere ra i nia i te reni faahoaraa, 3 hora i te mahana, e fifihia ratou i te pae feruriraa mai te hepohepo e te ahoaho rahi.”

• I rotopu i te feia apî 14 matahiti, “ia faaohipa rahi ratou i te reni faahoaraa, e haafifi te reira i to ratou taoto, e faahepohia ratou i nia i te reni, e au ore ratou i to ratou huru rapaeau, e haafaufaa ore ratou ia ratou e e hepohepo rahi roa mai te mau tamahine i te mau tamaroa.”

E nafea te mau metua e paruru ai i ta ratou mau tamarii i teie mau fifi atâta? Te horoa ra te Bibilia i te mau aˈoraa papu.

Eaha ta te mau metua e nehenehe e rave?

A haapao maitai. Ei metua, a hiˈo i te mau fifi e a faaoti e faaohipa anei ta outou tamarii i te reni faahoaraa aore ra aita.

• Faaueraa Bibilia: “A haapii i te tamarii i te eˈa ia na reira oia i te haere.”—Maseli 22:6, nota.

• No te ite atu â, a taio i te tumu parau “E titauhia anei ia faaohipa ta ˈu tamarii i te reni faahoaraa?”

Ia vaiiho outou i ta outou tamarii ia faaohipa i te reni faahoaraa, a vai ara i te mau fifi atâta e a haapao maitai i ta ratou e rave i nia i te natirara. E nafea?

A paruru i ta outou tamarii i te mau mea e ere i te mea maitai. A haapii i ta outou tamarii ia ite e ia ape i te mau mea e ere i te mea maitai.

• Faaueraa Bibilia: “Eiaha roa ˈtu te mau peu taotoraa tia ore, te peu viivii e rave rau e te nounou ia faahitihia i rotopu ia outou, . . . Eiaha atoa to outou ei haerea haama, eiaha ei parau maamaa e ei parau hoata faufau.”—Ephesia 5:3, 4.

• No te mau aˈoraa papu, a taio i te tumu parau “A paruru i ta outou taurearea i te fifi atâta o te reni faahoaraa.”

A taotia. Ei hiˈoraa, a haamau i te roaraa taime e afea ta outou tamarii e faaohipa ˈi i te reni faahoaraa.

• Faaueraa Bibilia: “A haapao maite i to outou haerea, e ia au hoi i to te feia feruriraa paari . . . ma te faaohipa maitai i to outou taime.”—Ephesia 5:15, 16.

• A faaohipa i te hohoˈa papaihia Te faahoaraa i nia i te Internet: A ara! no te tauturu i ta outou tamarii ia taa no te aha mea faufaa ia taotia.