TAUTURU NO TE UTUAFARE | NO TE METUA
Tamarii e te reni faahoaraa (Tuhaa 1): E tia anei ia faaohipa ta ˈu tamarii i te reni faahoaraa?
Ia au i te hoê tuatapaparaa, e 97 taurearea i nia i te hanere o te faaohipa nei i te hoê reni faahoaraa. Te hinaaro ra anei ta oe tamarii e na reira atoa? Mai te peu e “E,” teie te tahi mau manaˈo mea maitai ia hiˈopoa.
I roto i teie tumu parau
E nafea ta oe tamarii e faaohipa ˈi i to ˈna taime?
Te na ô ra te reni natirara HelpGuide.org: “Ua haamauhia te mau reni faahoaraa ia vai noa te taata i nia iho, ia tâuˈa noa ratou i te reira e ia tamau ratou i te hiˈopoa i ta ratou matini no te ite eaha te mea apî tei piahia.”
Te parau ra o Lynne, 20 matahiti to ˈna: “A haere ai i nia i te reni faahoaraa, e faaoti au i te vai tau minuti noa. Tera râ, a mataitai ai i tei piahia, ua vai au e rave rahi hora. E ere i te mea ohie ia tupohe i te niuniu paraparau afaifai e ia rave i te hoê ohipa faufaa aˈe.”
A ui ia oe iho: Ia parau vau i ta ˈu tamarii eaha te taime faataahia no te reni faahoaraa, e pee anei o ˈna i tera faaueraa a faaite atu ai i te haavîraa ia ˈna iho? E feruriraa paari anei to ta ˈu tamarii no te haamau i ta ˈna iho mau taotiaraa i roto i tera tuhaa e no te pee maite i te reira?
Aratairaa Bibilia: “A haapao maite i to outou haerea, e ia au hoi i to te feia feruriraa paari . . . ma te faaohipa maitai i to outou taime.”—Ephesia 5:15, 16.
Ia faatia oe i ta oe tamarii ia faaohipa i te reni faahoaraa ma te ore e haamau i te taotiaraa, e au te reira i te vaiihoraa ia ˈna e parahi i nia i te hoê puaahorofenua ma te ore e haapii maitai ia ˈna e nafea ia faahoro i te animara
Eaha te manaˈo o ta oe tamarii no nia i te auhoaraa?
E faaohipahia te parau “reni faahoaraa” no te faaite e nehenehe e noaa mai e rave rahi hoa i nia i tera reni. E ere râ te reira i te auhoaraa mau.
Te parau ra Patricia, 17 matahiti to ˈna: “No e rave rahi taurearea, ia rahi mai te taata o te au i ta ratou mau hohoˈa i nia i te reni faahoaraa, e tapao ïa tera mea tâuˈa roa tera mau taata ia ratou, noa ˈtu aita ratou e matau atu. Mea hape râ tera manaˈo.”
A ui ia oe iho: E feruriraa paari anei to ta ˈu tamarii no te taa e e ere te riroraa ei taata tuiroo i nia i te reni faahoaraa te mea faufaa aˈe? E nehenehe anei o ˈna e faahoa i te taata, eiaha noa i nia i te mau reni faahoaraa?
Aratairaa Bibilia: “E faaite te hoê hoa mau i te here i te mau taime atoa e e taeae oia tei fanauhia no te taime ahoaho.”—Maseli 17:17.
Mai te aha ta oe tamarii i te pae o te huru aau?
Ia au i te tahi mau tuatapaparaa, ia faaohipa rahi roa te taata i te mau reni faahoaraa, pinepine ratou i te moˈemoˈe, hepohepo e ahoaho.
Te parau ra Serena, 19 matahiti to ˈna: “Mea mauiui roa ia ite i te mau hohoˈa e faaite ra e te arearea ra ta oe mau hoa e te tahi atu, e aita oe i titau-manihini-hia.”
A ui ia oe iho: E feruriraa paari anei to ta ˈu tamarii no te ore e manaˈo e o ˈna te taata faufaa roa ˈˈe? E nehenehe anei o ˈna e haapae i te huru tataˈu e e ore e inoino hanoa, a ite ai i ta vetahi ê e rave ra i nia i te mau reni faahoaraa?
Aratairaa Bibilia: “Eiaha tatou e faateitei noa, e tataˈu e e feii te tahi i te tahi.”—Galatia 5:26.
Eaha te haerea o ta oe tamarii i nia i te reni faahoaraa?
I nia i te mau reni faahoaraa, mea ohie roa ia hamani ino ia vetahi ê, ia hapono i te mau poroi faufau e ia mataitai i te mau hohoˈa faufau. Aita paha ta oe tamarii e rave ra i tera mau ohipa, e nehenehe râ o ˈna e ite i te reira.
Te parau ra o Linda, 23 matahiti to ˈna: “I nia i te mau reni faahoaraa, e ite oe i te mau piaraa maitai. E nehenehe râ te reira e ino taue mai. Te faaohipa rahi nei te taata i te mau parau faufau e e faaroohia te upaupa tano ore.”
A ui ia oe iho: E feruriraa paari anei to ta ˈu tamarii no te faaohipa i te mau reni faahoaraa ma te tano e te tura? E noaa anei i ta ˈu tamarii te itoito no te haapae oioi i te mau piaraa tano ore?
Aratairaa Bibilia: “Eiaha roa ˈtu te mau peu taotoraa tia ore, te peu viivii e rave rau e te nounou ia faahitihia i rotopu ia outou. . . . Eiaha atoa to outou ei haerea haama, eiaha ei parau maamaa e ei parau hoata faufau.”—Ephesia 5:3, 4.
Mea faufaa anei te reni faahoaraa?
E ere te reni faahoaraa i te mea faufaa no te ora, oia atoa no te ite i te oaoa i roto i te oraraa. E rave rahi taurearea o te oaoa ra i te ore e faaohipa i te mau reni faahoaraa, oia atoa te feia tei faaohipa na i te reira e tei faaoti i te haapae roa ˈtu.
Te parau ra o Nathan, 17 matahiti to ˈna: “Ua ino roa to ˈu tuahine i to ˈna faaohiparaa i te mau reni faahoaraa. A ite ai i te reira, ua faaoti au i te haapae i tera mau huru reni natirara. Mai reira mai, mea oaoa aˈe au e te ora nei au i te mau tupuraa anaanatae aˈe i roto i te oraraa.”
Te mea faufaa: Hou a faatia ˈi i ta oe tamarii ia faaohipa i te mau reni faahoaraa, a ui ia oe iho: E feruriraa paari anei to ˈna no te taotia i te taime faaohiparaa i te mau reni faahoaraa, no te faatupu i te mau auhoaraa maitai e no te haapae i te mau piaraa tano ore?
Aratairaa Bibilia: “E haapao maitai râ te taata feruriraa haroˈaroˈa i to ˈna mau taahiraa tataitahi.”—Maseli 14:15.