‘A faaite hua ˈtu i te parau apî maitai’
1. Eaha te parau apî maitai ta tatou e poro e tia ˈi?
1 I roto i te hoê ao e mea varavara te parau apî maitai, ua riro ei haamaitairaa taa ê na tatou te “faaite hua ˈtu i te evanelia [aore ra parau apî maitai] ra o te aroha o te Atua ra.” (Ohi. 20:24) E titau te reira ia faaite haere i te taata e ua fatata te “anotau hopea” i te monohia e te ao apî parau-tia a Iehova, i reira e “mou [ai] te mau mea tahito ra.” (Tim. 2, 3:1-5; Apo. 21:4) I tera taime, aita e maˈi faahou. (Isa. 33:24) E haere mai te feia herehia tei pohe i rapae i te apoo ra e tahoê atu ai e te utuafare e te mau hoa. (Ioa. 5:28, 29) E riro te fenua atoa ei paradaiso nehenehe. (Isa. 65:21-23) Te tahi noa mau hiˈoraa teie o te parau apî maitai ta tatou e poro e tia ˈi!
2. No te aha te tau o te Oroa haamanaˈoraa e riro ai ei taime maitai roa no te faaite i te parau apî maitai?
2 E taime maitai roa te mau avaˈe Mati, Eperera e Me no te faaite i taua parau apî maitai ra. I taua mau avaˈe ra, i te vahi e rave rahi o te ao, mea maitai te huru o te reva e mea roa ˈtu â te mau mahana no te vai maoro i roto i te pororaa. Hau atu â, e faatupuhia te oroa faufaa roa ˈˈe o te matahiti, te Oroa haamanaˈoraa, na te ao atoa i te Mahana maa 22 no Mati i muri aˈe i te toparaa mahana. Teie te taime no te haamata i te faaineine i te faarahi i ta tatou taviniraa.
3. Eaha te tauturu i te mau utuafare ia faarahi i ta ratou taviniraa?
3 A rave i te taviniraa pionie tauturu: E nehenehe anei oe e faanaho i ta oe porotarama no te rave i te taviniraa pionie tauturu hoê, e piti, aore ra nau avaˈe e toru atoa? No te aha e ore ai e faataa maa taime, i roto i ta oe haapiiraa utuafare i mua nei, no te tauaparau i nia i te reira? Maoti te hoê haa-amui-maitai-raa, e rave atoa paha te tahi melo o te utuafare aore ra hau atu i te taviniraa pionie tauturu. (Mas. 15:22) A pure no te reira, e a hiˈo e nafea Iehova e haamaitai ai i ta oe mau tutavaraa. (Mas. 16:3) Noa ˈtu e aita hoê noa ˈˈe melo o te utuafare e nehenehe e rave i te taviniraa pionie tauturu, e nehenehe ta te utuafare taatoa e haamau i te mau fa taa maitai no te faarahi i ta ratou taviniraa na roto i te ohiparaa e te feia o te nehenehe e rave i te taviniraa pionie.
4. E nafea tatou e faanaho ai ia tatou no te rave i te taviniraa pionie tauturu mai te peu e e ohipa taime taatoa ta tatou?
4 Mai te peu e e ohipa taime taatoa ta oe, maoti te hoê porotarama maitai e nehenehe ai oe e rave i te taviniraa pionie tauturu. E nehenehe paha oe e faaohipa i te tahi tuhaa o ta oe taime tamaaraa no te poro. Aore ra e nehenehe oe e ani i ta oe iho tuhaa fenua i pihai iho i to oe faaearaa aore ra i ta oe vahi raveraa ohipa e e apiti i te taviniraa fatata hoê hora hou aore ra i muri aˈe i te ohipa. E nehenehe oe e faataa i te taime hau i roto i ta oe porotarama ma te faanuu i te tahi mau ohipa e ere i te mea faufaa roa i te tahi atu avaˈe e ma te poro i te mahana taatoa i te mau hopea hebedoma. Ua nehenehe vetahi e rave hoê aore ra e piti mahana faaearaa ohipa no te haere i roto i te taviniraa.
5. E nafea oe e nehenehe ai e tauturu i tei paari aore ra tei paruparu i te pae tino ia rave i te taviniraa pionie tauturu?
5 Mai te peu e e mea paari oe aore ra e mea paruparu to oe tino aore ra e itoito iti to oe, e nehenehe oe e rave i te taviniraa pionie tauturu ma te poro maa taime iti i te mau mahana atoa. A ani ia Iehova ia horoa mai i te “puai i hau aˈe i tei matauhia.” (Kor. 2, 4:7, MN) Ua nehenehe te hoê tuahine e rave i te taviniraa pionie tauturu i te 106raa o to ˈna matahiti! Maoti te tauturu a to ˈna mau fetii Kerisetiano e vetahi atu i roto i te amuiraa, ua poro oia i tera fare i tera fare, ua faatupu i te mau farerei-faahou-raa, ua faatere i te mau haapiiraa bibilia, e ua poro i roto i te tahi atu mau tuhaa o te taviniraa. Ua tauturu oia i te haamata i te mau haapiiraa bibilia e hoê ahuru taata. “A feruri ai au i ta ˈu fanaˈoraa taa ê e tavini ei pionie tauturu,” ta ˈna ïa e parau ra, “e î to ˈu mafatu i te here e te mauruuru ia Iehova, i ta ˈna Tamaiti, e i ta ˈNa faanahonahoraa î i te here. Te hinaaro mau nei au e parau e ‘mauruuru Iehova!’”
6. E nafea te feia apî bapetizohia o te haere noa ra i te haapiiraa e nehenehe ai e rave i te taviniraa pionie tauturu?
6 E taata apî bapetizohia paha oe o te haere noa ra i te haapiiraa, e nehenehe atoa oe e faaî i te aniraa no te rave i te taviniraa pionie tauturu. Mai te feia o te rave ra i te ohipa taime taatoa, e faanaho paha oe i te mau hopea hebedoma na mua roa no te taviniraa. Peneiaˈe e nehenehe oe e poro fatata hoê hora i muri aˈe i te haapiiraa i te tahi mau mahana. Te vai ra anei te faaearaa haapiiraa ta oe e nehenehe e faaohipa no te apiti i te taviniraa? Ia hinaaro oe e rave i te taviniraa pionie tauturu, a paraparau i to oe na metua no nia i te reira.
7. Eaha ta te mau matahiapo e nehenehe e rave no te faarahi i te aau tae no te taviniraa i te tau o te Oroa haamanaˈoraa?
7 A faarahi i te aau tae: E nehenehe te mau matahiapo e faarahi i te aau tae o te amuiraa ma te horoa i te hiˈoraa. (Pet. 1, 5:2, 3) E faaoti paha ratou i te faanaho i te mau putuputuraa hau no te pororaa no te feia o te poro i te poipoi roa, i muri aˈe i te haapiiraa, aore ra i muri aˈe i te ohipa. Ia papu i te tiaau no te taviniraa e ua faataahia te feia poro aravihi no te faatere i taua mau putuputuraa ra e ua navai te tuhaa fenua, te mau vea, te mau papai no te taviniraa taa ê i taua mau avaˈe ra.
8. Eaha ta te hiˈoraa o te hoê amuiraa e nehenehe e haapii mai?
8 I roto i te hoê amuiraa, ua haamata te mau matahiapo i te faaitoito i te rave i te taviniraa pionie tauturu tau avaˈe na mua ˈˈe. I te mau hebedoma atoa ua faaara noa ratou i te amuiraa ehia rahiraa taata poro i fariihia ei pionie tauturu. Ua haapapu te reira i te feia o te hinaaro ra e faarahi i ta ratou apitiraa i te taviniraa e e turu-maitai-hia ratou. Ua faanahohia te mau putuputuraa hau no te pororaa i te poipoi roa e i te ahiahi. Te faahopearaa, oia hoi e 53 taata poro o tei rave i te taviniraa pionie tauturu i Eperera, fatata te afaraa o te amuiraa!
9. No te aha e taime faahiahia roa ˈi te tau o te Oroa haamanaˈoraa no te feia e faaî ra i te mau titauraa no te haamata i te poro i te parau apî maitai?
9 A tauturu ia vetahi ê ia poro: A faaî ai te feia tae apî mai e te feia apî i te mau titauraa no te riro ei feia poro, e titau-manihini-hia paha ratou ia poro e te feia poro aravihi. E nehenehe taua taime ra e fa mai i te tau o te Oroa haamanaˈoraa i te taime e faarahi ai e rave rahi i roto i te amuiraa i ta ratou taviniraa. E piahi Bibilia anei ta oe o te haere ra i mua e o tei faaau i to ˈna oraraa i nia i te mau ture aveia parau-tia a Iehova? E tamarii haerea maitai anei ta oe o te haere maitai ra i mua aita râ i riro atura ei taata poro? Mai te peu e ua faahiti ratou i te hinaaro e riro ei taata poro bapetizo-ore-hia e te manaˈo ra oe e te faaî ra ratou i te mau titauraa, a faaite atu ïa i te hoê matahiapo. E faanaho te tiaau peretiteni e piti matahiapo no te tauaparau i te reira e o oe e ta oe tamarii aore ra ta oe piahi.
10. Eaha ta te mau matahiapo e nehenehe e rave no te tauturu i te feia aita e poro faahou ra?
10 E taime faahiahia roa atoa te mau avaˈe i mua nei no te feia aita e poro faahou ra ia rave faahou i ta ratou taviniraa e te amuiraa. E titauhia ia tutava maite te mau tiaau no te haapiiraa buka o te amuiraa e te tahi atu mau matahiapo, i te farerei ia ratou e i te titau manihini atu ia poro e o ratou. Mai te peu e mea maoro to ratou oreraa e poro faahou, e titauhia ïa ia paraparau na mua e piti matahiapo ia ratou no te ite e te faaî noa ra anei ratou i te mau titauraa.—km 11/00 api 3.
11. Eaha te faaiteraa rahi roa ˈˈe i “te aroha o te Atua?”
11 A faaineine no te Oroa haamanaˈoraa: O te hoo te faaiteraa rahi roa ˈˈe i “te aroha o te Atua.” (Ohi. 20:24) E putuputu te mau mirioni taata aau mauruuru na te ao nei i te Mahana maa 22 no Mati, i muri aˈe i te toparaa mahana, no te faatupu i te Oroa haamanaˈoraa i te poheraa o te Mesia. Te hinaaro nei tatou e titau manihini e e tauturu i te feia aau tia atoa ia tae mai i teie oroa faufaa o te faaite i to Iehova aroha no te huitaata.
12. O vai ta tatou e titau manihini i te Oroa haamanaˈoraa?
12 A papai i te iˈoa o te feia ta oe e hinaaro e titau manihini. Papu maitai e to roto to oe fetii, te feia tapiri, to oe mau hoa ohipa aore ra hoa haapiiraa, te feia i haapii na muri ia oe i te hoê taime e te feia e haapii noa ra, e te feia atoa ta oe e farerei tamau ra. Mai te peu e e uiraa ta te feia ta oe i titau manihini no nia i te Oroa haamanaˈoraa, no te tauturu ia oe, e nehenehe oe e faaohipa i te tuhaa hau no nia i te Amuraa maa a te Fatu o te buka Bibilia haapii i te api 206-8. E nehenehe atoa oe e haamata i te hoê haapiiraa bibilia, i te mea e e horoa te reira ia oe i te hoê ravea no te faaite i te buka ta tatou e faaohipa ra no te faatere i te mau haapiiraa bibilia.
13. Mea nafea to Iehova haamaitairaa i te mau tutavaraa a na taata poro e piti o tei faaoti i te titau manihini ia vetahi ê i te Oroa haamanaˈoraa?
13 Ua papai te hoê tuahine i te hoê tapura e 48 utuafare e titau manihini. A titau manihini ai oia ia ratou, e reni oia i to ratou iˈoa e e papai i te mahana i titau manihini ai oia ia ratou. Auê oia i te oaoa i te taeraa mai e 26 taata o ta ˈna i titau manihini ia haere mai i te Oroa haamanaˈoraa! Ua titau manihini te hoê taeae, e fatu fare toa oia, i te hoê rave ohipa e perepitero oia na mua ˈˈe. Ua tae mai taua taata ra e ua parau oia i muri iho, “Ua hau aˈe ta ˈu i haapii i roto i te Bibilia i te hoê noa hora i na matahiti e 30 ei melo o te Ekalesia Katolika.” I muri iti aˈe i te Oroa haamanaˈoraa, ua farii oia i te hoê haapiiraa i nia i te buka Bibilia haapii.
14. Eaha te opereraa na te ao nei o te haamata i te 1 no Mati?
14 A apiti i te opereraa: Mai te Mahana maa 1 no Mati e tae roa ˈtu i te 22 no Mati, e operehia te hoê titau-manihini-raa taa ê i te Oroa haamanaˈoraa na te ao nei. E hinaaro te mau taata poro atoa e apiti roa i teie opereraa faufaa. Mea au aˈe ia horoa roa ˈtu i te titau-manihini-raa i te fatu fare i te vaiiho atu i te pae opani. Tera râ, mai te peu e e tuhaa fenua rahi ta oe, e faataa paha te mau matahiapo e e nehenehe e vaiiho omoe i taua mau titau-manihini-raa ra i te mau fare aita e taata. I te hopea hebedoma e pûpû atoa tatou i te mau vea apî.
15. Eaha ta tatou e nehenehe e parau a horoa ˈi tatou i te titau-manihini-raa no te Oroa haamanaˈoraa?
15 I te mea e aita i rahi te taime no te opere i te mau titau-manihini-raa, mea au aˈe ia rave i te hoê faaiteraa poto noa. A faaite i te huru auhoa e te aau tae. E nehenehe oe e parau mai teie: “Te hinaaro ra matou e ite papu e ua titau-manihini-hia oe, te mau melo o to oe utuafare, e to oe mau hoa i te hoê oroa faufaa o te tupu i te 22 no Mati. Teie ta oe titau-manihini-raa. Ua papaihia te mau haamaramaramaraa i nia iho.” E uiraa paha ta te fatu fare. Aore ra e farii paha oia i te titau-manihini-raa e e faaite atoa oia e e tae mai iho â oia. A tapao i te anaanatae e a faanaho no te hoˈi faahou atu.
16. Eaha te tupuraa e faataa ra i te faufaaraa o te opereraa no te titau manihini i te taata i te Oroa haamanaˈoraa?
16 I te matahiti i mairi aˈenei ua ite te hoê faehau i te titau-manihini-raa i te Oroa haamanaˈoraa i to ˈna uputa. Ua faaoti o ˈna i te haere atu, e mea tia râ ia ani oia i te parau faatia a to ˈna raatira. I to ˈna faaiteraa i te titau-manihini-raa i te raatira, ua mamû noa te raatira e parau atura e e Ite to ˈna na metua e na mua ˈˈe i haere na oia i te mau putuputuraa e o raua. Aita noa oia i horoa i ta te faehau parau faatia no te haere atu, ua haere atoa râ oia na muri ia ˈna i te Oroa haamanaˈoraa!
17. E nafea tatou e faaite ai e aita tatou i ere i te tapao o te aroha mau o te Atua?
17 A faaite i te mauruuru: A piri mai ai te tau o te Oroa haamanaˈoraa 2008, ia nehenehe tatou taitahi e feruriruri i te aroha o Iehova ia tatou. Ua papai te aposetolo Paulo: “Te aˈo atoa ˈtu nei matou . . . ia outou, e eiaha outou e farii faufaa ore noa i te aroha mau o te Atua ra [a ore atu ai e raea te tapao].” (Kor. 2, 6:1; MN) E nafea tatou e faaite ai e aita tatou i ere i te tapao o te aroha mau o te Atua? Ua papai Paulo: “Te faaite hua nei râ matou ia matou iho e e rave ohipa na te Atua i te mau mea atoa nei.” (Kor. 2, 6:4) No reira, e faaite ïa tatou i to tatou mauruuru no te ô a Iehova na roto i to tatou haerea maitai e ta tatou pororaa ma te itoito rahi i te parau apî maitai. E taime faahiahia roa ïa teie tau o te Oroa haamanaˈoraa no te faarahi i ta tatou taviniraa, a faaite hua ˈtu ai i te parau apî maitai.
[Tumu parau tarenihia i te api 3]
O vai te nehenehe e riro ei pionie tauturu?
◼ Te mau utuafare
◼ Te feia o te ohipa ra ma te taime taatoa
◼ Te feia ruhiruhia e te feia paruparu i te pae tino
◼ Te feia e haere ra i te haapiiraa
[Tumu parau tarenihia i te api 4]
Ia operehia te mau titau-manihini-raa no te Oroa haamanaˈoraa:
◼ A haapoto noa; a paraparau ma te aau tae
◼ A tapao i te anaanatae e a hoˈi faahou e hiˈo
◼ A pûpû i te mau vea i te mau hopea hebedoma