‘A faaite hua i te parau a te Atua’

¹ Ia putapû roa tatou no te mea ua horoahia mai te hoê mea maitai, eita anei tatou e faaite i to tatou mauruuru na roto i to tatou huru e ta tatou mau ohipa? Oia iho â ïa! I mua i te maitai e te aau aroha o Iehova i nia i te huitaata, a tapao na i te huru o te aposetolo Paulo. Teie ta ˈna i parau: “Ia haamaitaihia te Atua i [ta ˈna ra ô horoa noa] eita e tia ia parau ra.” Eaha tera “ô horoa noa”? O ‘te maitai rahi o te Atua’ ïa i nia ia tatou, e te faaiteraa rahi roa ˈˈe o te reira, o te ô ïa o ta ˈna Tamaiti ei hoo no ta tatou mau hara.—Kor. 2, 9:14, 15; MN; Ioa. 3:16.

² E parau noa anei tera mau haamauruururaa a Paulo? E ere roa ˈtu! Ua faaite oia i to ˈna mauruuru hohonu na roto e rave rahi ravea. Ua haapeapea roa oia no te ea pae varua o to ˈna mau hoa Kerisetiano e ua hinaaro oia e tauturu ia ratou, ia au i tei maraa ia ˈna, ia faufaa-roa-hia ratou i te aau aroha o te Atua. Teie ta Paulo i parau no nia ia ratou: “Oia atoa matou no te rahi o to matou aroha ia outou, ua tia roa ia matou te horoa ˈtu i te evanelia a te Atua ia outou na, e eiaha hoi te reira anaˈe ra, o matou atoa iho ïa, no te mea ua riro outou ei here na matou.” (Tes. 1, 2:8) Taa ê atu i te tautururaa i te mau melo o te amuiraa ia haapapu i to ratou faaoraraa, ua poro o Paulo ma te rohirohi ore i te parau apî maitai, ma te fano na te fenua e na te miti tau tausani kilometera i te atea, ia itea mai ia ˈna te feia “[aau farii e tano] no te ora mure ore.” (Ohi. 13:48; MN) No to ˈna mauruuru hohonu no te mau mea atoa ta Iehova i rave no ˈna, ua ‘faaite hua oia i te parau a te Atua.’—Kol. 1:25.

³ Aita anei to tatou mauruuru no te mau mea atoa ta Iehova e rave ra no tatou, e turai ra ia tatou ia pûpû i te tauturu pae varua na te feia e hinaaro i roto i ta tatou amuiraa? (Gal. 6:10) Eita anei tatou e hinaaro e apiti atu â i roto i te pororaa i te parau apî maitai o te Basileia i roto i ta tatou tuhaa fenua?—Mat. 24:14.

⁴ Hoê taime maitai no te faaite i to tatou mauruuru: I te mau matahiti atoa, e horoa mai te Oroa haamanaˈoraa i te poheraa o te Mesia i te hoê taime maitai taa ê no te faaite i to tatou mauruuru no ta Iehova e ta Iesu i rave no tatou. E ere teie i te tahi atu putuputuraa aore ra i te tahi haamanaˈoraa noa i te hoê ohipa i tupu. Ua parau Iesu e: “E na reira outou ei manaˈoraa ia ˈu.” (Luka 22:19) E taime maitai te Oroa haamanaˈoraa i te poheraa o te Mesia no te feruri i te huru o Iesu, no te farii e te ora ra oia i teie mahana e te haa ra oia ma te hanahana e te faatereraa tei horoahia na ˈna no to ˈna haapao maitai e no ta ˈna tusia. E taime maitai atoa teie oroa no te faaite i to tatou auraro i te mana faatere o te Mesia o te aratai ra i te tereraa o te amuiraa Kerisetiano e ta ˈna mau ohipa. (Kol. 1:17-20) Ma te faatura, e tia i te nunaa taatoa o te Atua ia tae i te Oroa haamanaˈoraa i te poheraa o te Mesia. I teie matahiti, e tupu teie oroa i te Mahana maha 28 no Mati, i muri aˈe i te toparaa mahana.

⁵ Maoti te tutavaraa tuutuu ore i ravehia i te matahiti i mairi aˈenei hou te Oroa haamanaˈoraa, ua tapaohia e e 4 960 taata tei tae mai i nia i te tuhaa fenua o te amaa no Tahiti. Ehia ïa i teie matahiti? Tei ta tatou ïa ‘rohiraa e faaoromairaa’ i te tauturu e rave rahi roa taata ia tae mai.—Tim. 1, 4:10.

⁶ Taa ê atu i te haere i te Amuraa maa ahiahi a te Fatu, e tia ia tatou ia poro hau atu â. Aita e feaaraa, tau ahuru tausani taeae e tuahine o te riro ei pionie tauturu hoê avaˈe aore ra hau atu. I na pae matahiti taitahi i mahemo, ua tapaohia i te faito au noa 113 pionie tauturu i te tau o te Oroa haamanaˈoraa, mai te avaˈe Mati e tae atu i te avaˈe Me, i Porinetia Farani. E nehenehe anei outou e faanaho ia outou no te tamata i te fanaˈoraa taa ê e riro ei pionie tauturu i teie matahiti? E ravea maitai roa teie no te faaite i to outou mauruuru haavare ore no te tusia a te Mesia. E nehenehe outou e tiaturi i te haamaitairaa a Iehova, mai ta te mau tupuraa i muri nei e faaite maira.

⁷ Teie ta te hoê tuahine, e ohipa taime taatoa ta ˈna e o tei rave i te taviniraa pionie tauturu i te avaˈe Mati i mahemo, i papai: “I roto i Ta tatou taviniraa i te Basileia no Fepuare 2001, te faaitoitohia ra te taatoaraa ia rave i te taviniraa pionie tauturu i te tau o te Oroa haamanaˈoraa, ia au i to ratou huru tupuraa. Ua tano maitai ïa te reira e ta ˈu tapura ohipa, no te mea e pae Mahana maa to te avaˈe Mati. Ua faaoti atura vau e faaî i te hoê aniraa.” I te omuaraa o te avaˈe, ua haamau oia i te fa e haamata i te hoê haapiiraa bibilia. Ua naea anei ia ˈna ta ˈna fa? E, i te 52raa o ta ˈna hora! Eaha te haapiiraa ta ˈna i huti mai? “E mau haamaitairaa faahiahia mau te tiai maira ia tatou ia tutava ˈtu â tatou.”

⁸ Eaha te mau maitai e tiai maira i te mau utuafare ia riro ratou paatoa ei pionie? I te avaˈe Eperera i mahemo, ua rave na melo e maha o te hoê utuafare i te taviniraa pionie. Eita roa ˈtu e moehia ia ratou taua avaˈe ra. Te na ô ra te mama e: “E taime maitai te mahana taitahi no te oaoa, no te mea ua hoê matou i roto i te taviniraa! Ia tamaa matou, e tauaparau matou no nia i ta matou mau ohipa o te mahana, e mea au roa.” Teie ta te tamaiti e parau ra: “Ua oaoa vau i te pororaa e o Papa i roto i te hebedoma, area tei matauhia râ, tei te ohipa oia.” Teie ta te papa e parau ra: “No ˈu nei te upoo o te utuafare, te mauruuru ra vau i te iteraa e te haa amui ra matou i roto i te ohipa faufaa roa ˈˈe.” E to outou utuafare ïa? No te aha e ore ai e paraparau amui no nia i te raveraa te utuafare taatoa i te taviniraa pionie tauturu i te tau o te Oroa haamanaˈoraa?

⁹ E ahiri e e faariro tatou i te avaˈe Mati ei avaˈe tei ore i itehia aˈenei? I te omuaraa o te matahiti 2000, te ui ra Ta tatou taviniraa i te Basileia i teie uiraa: “E ahiri e e faariro tatou i te avaˈe Eperera 2000 ei avaˈe tei ore i itehia aˈenei?” Eaha te pahonoraa? I taua avaˈe ra, e 252 tei riro ei pionie tauturu. Te haamanaˈo ra anei outou i te oaoa i itehia i roto i ta outou amuiraa i taua avaˈe ra, no te maraaraa o te ohipa pae varua? E nehenehe anei tatou e na reira faahou i teie matahiti aore ra e rave hau atu â? Ia tutava amui te taatoaraa, e nehenehe te avaˈe Mati 2002 e riro ei “avaˈe tei ore i itehia aˈenei.” No te aha râ Mati?

¹⁰ Te vai ra e piti tumu. A tahi, e tupu te Oroa haamanaˈoraa i te hopea avaˈe, e taime roa ïa to tatou no te titau manihini e rave rahi roa taata. A piti, i teie matahiti, e pae hopea hebedoma to Mati, mea ohie ïa te taviniraa pionie tauturu no te feia e rave ra i te ohipa aore ra e haere ra i te haapiiraa. No te aha e ore ai e parahi e e feruri i te hoê tapura ohipa au noa maoti te tarena e vai ra i roto i teie api hau? Eita e ore e mea ohie aˈe te taviniraa pionie tauturu i ta outou e manaˈo. Ei hiˈoraa, ia faataa outou e 8 hora pororaa i na pae hopea hebedoma taitahi, e toe noa ïa 10 hora e rave i te toea o te avaˈe ia naeahia na 50 hora.

¹¹ Eaha ta te mau matahiapo e rave no te tauturu i te mau melo atoa o te amuiraa ia ‘faaite hua i te parau a te Atua’? A faaite i te aau tae i roto i ta outou mau tuhaa e rave i roto i te mau putuputuraa e i roto i ta outou mau aparauraa. E nehenehe te mau taeae faatere i te mau haapiiraa buka a te amuiraa e to ratou mau mono e paraparau e te melo taitahi o ta ratou pǔpǔ e e tauturu roa ˈtu ia ratou. I te tahi taime, e navai noa te tahi mau parau faaitoito aore ra te tahi mau manaˈo tauturu. (Mas. 25:11) Mea rahi o te ite e ia rave ratou i te tahi mau faatanoraa rii i roto i ta ratou tapura ohipa, e nehenehe ratou e tavini ei pionie tauturu. I roto i te tahi mau amuiraa, te horoa ra te rahiraa, mai te peu e e ere te taatoaraa, o te mau matahiapo e mau tavini tauturu e ta ratou mau vahine i te hoê hiˈoraa maitai roa, na roto i te raveraa i te taviniraa pionie tauturu i te tau o te Oroa haamanaˈoraa, e faaitoito atu ai i te feia poro e rave rahi ia pee ia ratou. Eita e maraa i te tahi feia poro ia riro ei pionie no te mau taotiaraa pae tino aore ra no te tahi atu mau tumu, teie râ, e nehenehe tatou e faaitoito ia ratou ia apiti atu i te amuiraa no te faaite i to ratou mauruuru, na roto i te tutava-roa-raa i roto i te taviniraa.

¹² Tei te faaineine-maite-raa te mau matahiapo e itehia ˈi te manuïaraa. Ia faataahia te mau putuputuraa no te pororaa i te mau taime e tano no te melo taitahi i te roaraa o te hebedoma. Ia nehenehe, e maiti oioi te tiaau no te taviniraa i te mau taeae aravihi no te haapao i te mau putuputuraa no te taviniraa. E titauhia te hoê faaineineraa maitai ia ore teie mau putuputuraa, tae noa ˈtu te faanahoraa i te mau pǔpǔ, te tuharaa i te tuhaa fenua e te pure, ia hau atu i te 10 e tae atu i te 15 minuti. (A hiˈo i Ta tatou taviniraa i te Basileia no Tetepa 2001, Pahonoraa i ta outou mau uiraa.) Ia faataa-maitai-hia te porotarama ohipa no te avaˈe i te amuiraa e ia piahia i nia i te tapura piaraa.

¹³ Ia faataahia te mau tuhaa fenua e ia navai. E tia i te tiaau no te taviniraa ia farerei i te taeae haapao i te mau tuhaa fenua ia porohia te mau tuhaa fenua aita e poro-pinepine-hia ra. E faaitoito taa ê tatou i te farerei i te mau taata aita i ǒ ratou, i te poro i roto i te aroâ, na te mau fare toa e i te ahiahi. Ia tano, e tauturu tatou i te tahi feia poro ia poro na roto i te niuniu paraparau.

¹⁴ A tauturu ia ratou ia poro faahou: Te vai ra anei i roto i te tuhaa fenua a ta outou amuiraa, te tahi feia poro aita e poro faahou ra i te parau apî maitai? E melo noâ ratou no te amuiraa e te hinaaro ra ratou i ta tatou tauturu. (Sal. 119:176) Te fatata roa maira te hopea o teie nei faanahoraa e te piri atoa maira te ao api; e tano ïa ia tauturu tatou i te feia aita e poro faahou ra. (Roma 13:11, 12) I na pae matahiti i mairi aˈenei, e hau atu i te 150 taata poro tei poro faahou i to ratou tautururaahia. Eaha te rave no te tauturu e rave rahi atu â o ratou ia oraora faahou to ratou here e to ratou tiaturi matamua?—Heb. 3:12-14.

¹⁵ E feruri te tino matahiapo i te mea e rave no te tauturu i te feia aita e poro faahou ra i nau matahiti i mahemo. (Mat. 18:12-14) E tapura te papai parau i te mau iˈoa i muri aˈe i te hiˈopoaraa i te tapura taviniraa a te feia poro. E tutavaraa taa ê te ravehia i roto i te ohipa tiairaa mamoe. E hinaaro paha te hoê matahiapo, o tei matau maitai i te tahi taata poro aore ra mea piri raua, e haere e hiˈo ia ˈna. Aore ra e anihia te tauturu a te tahi atu feia poro. Papu maitai e e oaoa te feia o tei haapii e te Kerisetiano aita e poro faahou ra, i te tauturu ia ˈna i teie taime e hinaaro ai oia i te tauturu. Ta tatou fa, oia ïa ia poro faahou e rave rahi o te feia aita e poro faahou ra, i te parau a te Atua. Aita ˈtu ïa e taime maitai aˈe no te reira maori râ te tau o te Oroa haamanaˈoraa, mai te peu e te faaî ra ratou i te mau titauraa!—A hiˈo i te mau faataaraa i roto i Ta tatou taviniraa i te Basileia no Novema 2000, Pahonoraa i ta outou mau uiraa.

¹⁶ Te faaî ra anei te tahi atu i te mau titauraa no te poro? Te tamau noa ra Iehova i te haamaitai i to ˈna nunaa na roto i te faataeraa mai i “tei hinaarohia e te mau fenua atoa ra.” (Hag. 2:7) I te mau matahiti atoa, e tapaohia tau tausani taata poro apî bapetizo-ore-hia. O vai ratou? Te mau tamarii a te mau Ite no Iehova e te feia ta tatou e haapii ra i te Bibilia. Nafea tatou e ite ai e te faaî ra ratou i te mau titauraa no te feia poro i te parau apî maitai?

¹⁷ Mau tamarii a te mau Ite no Iehova: Mea rahi te tamarii e apee ra i to ratou mau metua i roto i te pororaa e rave rahi matahiti i te maoro, tera râ, aita ratou i tapaohia ˈtura ei feia poro bapetizo-ore-hia. O te avaˈe Mati te taime maitai no te reira. Nafea tatou e ite ai e ua ineine te hoê tamarii? Te na ô ra te buka Organisés pour bien remplir notre ministère, api 100, e “ia hinaaro te hoê tamarii, e haerea maitai to ˈna, e ia noaa ia ˈna ia faaite i to ˈna iho faaroo na roto i te haaparareraa i te parau apî maitai.” Mai te peu e te manaˈo ra outou e ua ineine ta outou tamarii, a faaite atu ïa i te hoê o te mau matahiapo o te tomite tiaauraa a te amuiraa.

¹⁸ Feia haapii i te Bibilia e faaî ra i te mau titauraa: Ia tae i te hoê mahana, e faaite mai te hoê taata haapii i te Bibilia, tei noaa mai te tahi faito ite e o te haere ra i te mau putuputuraa tau taime i te maoro, i te hinaaro e riro ei taata poro i te Basileia. Mai te peu e te haapii ra outou e te hoê taata mai tera, a feruri ïa i teie mau uiraa: Te haere ra anei o ˈna i mua, ia au i to ˈna faito matahiti e to ˈna aravihi? Te faaite aˈena ra anei o ˈna i to ˈna faaroo ma te faanaho-ore-hia? Te ahu ra anei o ˈna i te “huru taata apî”? (Kol. 3:10, MN) Te faaî ra anei o ˈna i te mau titauraa no te feia poro bapetizo-ore-hia, faataahia i te mau api 98-100 o te buka Notre ministère? Mai te peu e e, a faaara ˈtu ïa i te tomite tiaauraa ia faanahohia e piti matahiapo o te farerei atu ia outou e te taata haapii. Ia faaî oia i tera mau titauraa, e faaara ïa na matahiapo ia ˈna e e nehenehe ta ˈna e haamata i te rave i te taviniraa i mua i te taata.

¹⁹ E na avaˈe Eperera e Me? E nau avaˈe taa ê atoa teie no te faarahi i te ohipa pororaa. E nehenehe e rave rahi o te riro ei pionie tauturu i te avaˈe Mati, e tavini â i te avaˈe Eperera e (aore ra) i te avaˈe Me, i reira hoi tatou e pûpû na mua ˈi i Te Pare Tiairaa e te Réveillez-vous! E mau haamaitairaa ta te taioraa i teie nau vea e hopoi mai i roto i to tatou oraraa! E tuhaa rahi ta teie nau vea e rave ra i roto i te maraaraa faahiahia roa ta tatou e tapao nei na te ao nei. E ravehia te tahi tutavaraa taa ê i na avaˈe Eperera e Me no te opere i na vea na te taata e rave rahi atu â. E faaineine anaˈe i teie nei i te apiti atu ma te aau atoa.

²⁰ I te mea e te opua ra tatou e faarahi i ta tatou ohipa, e hinaaro anei tatou e rave rahi atu â vea? I te roaraa o te matahiti, e pûpû tatou i Te Pare Tiairaa e te Réveillez-vous! i te Mahana maa, te mahana vea. I te mea râ e mea rahi o te rave i te taviniraa pionie tauturu e e opere tatou paatoa i na vea e piti avaˈe taatoa i te maoro, mea titauhia ïa ia faarahi tatou i ta tatou mau vea. No reira, e faaara oioi tatou i te taeae haapao i te mau vea o ta tatou amuiraa. I te hoê â taime, e ara te taeae haapao i te mau papai e ia navai maitai te api parau ra E hinaaro anei outou e ite hau atu â no nia i te Bibilia? ia nehenehe te taatoaraa e faaohipa ˈtu.

²¹ Mea rahi tei faaite i to ratou mauruuru no te tumu parau “Nafea ia pûpû i te mau vea” i roto i Ta tatou taviniraa i te Basileia. Te haafaufaa ra anei outou i te reira na roto i te haapiiraa i te mau faaiteraa e horoahia ra? I roto i ta outou haapiiraa bibilia utuafare, no te aha e ore ai e faataa tau taime no te faaineine i tera mau faaiteraa?

²² E haa roa ino anaˈe i te tau o te Oroa haamanaˈoraa: Mai te aposetolo Paulo, e faaite tatou ia Iehova e te mauruuru rahi nei tatou no “ta ˈna ra ô horoa noa” na roto i te rave-hua-raa i te mau ohipa pae varua i faanahohia no te tau o te Oroa haamanaˈoraa. No reira, e tia ia tatou (1) ia haere i te oroa faufaa roa ˈˈe o te matahiti, te Oroa haamanaˈoraa i te Amuraa maa ahiahi a te Fatu, i te Mahana maha 28 no Mati 2002; (2) ia tauturu i te faaoraora i ‘te hinaaro matamua’ o te feia aita e poro faahou ra (Apo. 2:4; Roma 12:11); (3) ia tauturu i ta tatou mau tamarii e te feia haapii i te Bibilia e faaî ra i te mau titauraa ia riro ei feia poro bapetizo-ore-hia e (4) ia rave roa ino i te ohipa pororaa evanelia, na roto paha i te riroraa ei pionie tauturu i te avaˈe Mati e i muri aˈe.—Tim. 2, 4:5.

²³ E pure tatou ia Iehova ma te aau atoa ia rave hua tatou paatoa i te pororaa i te parau apî maitai o te Basileia i te tau o te Oroa haamanaˈoraa, e faaite atu ai i te hohonu o to tatou mauruuru no te mau mea atoa ta Iehova e rave ra no tatou.

[Tumu parau tarenihia i te api 6]

Ta ˈu porotarama pororaa no Mati 2002

1 2 3

Mahana vea

4 5 6 7 8 9 10

Mahana vea

11 12 13 14 15 16 17

Mahana vea

18 19 20 21 22 23 24

Mahana vea

25 26 27 28 29 30 31

OROA Mahana vea

E nehenehe anei outou e faataa e 50 hora pororaa no te riro ei pionie tauturu i te avaˈe Mati?