Te faanuu noa ra anei oe i te reira?

Te faanuu ra i te aha? Te faaîraa i te tareta Instructions médicales (DPA) o tei horoahia i te mau Ite bapetizohia. I te mea e ‘aita oe i ite i te mau mea e tupu ananahi,’ e mea faufaa roa ia faaoti oioi oe e ia papai eaha te mau ravea rapaauraa e faanahoraa ta oe e farii no te hoê rapaauraa ru. (Iak. 4:14; Ohi. 15:28, 29) No te tauturu ia oe, ua faaineinehia te video Soigner sans transfuser—Besoins et droits du patient. A mataitai i te reira, e i muri iho, a hiˈo faahou i roto i te pure i ta oe i haapii maoti te mau uiraa i muri nei.—Nota: No te mea e hohoˈa tâpûraa poto to roto i te video, na te mau metua e faaoti e mataitai atu e ta ratou mau tamarii apî aore ra eita.

(1) No te aha vetahi o te tino rapaauraa e hiˈopoa faahou ai i te faaohiparaa i te pâmuraa toto? (2) A horoa e toru hiˈoraa o te tâpûraa fifi roa i ravehia ma te ore e pâmu i te toto. (3) Mea nafea e rave rahi taote e taote tâpû na te ao atoa nei i te faaiteraa e ua ineine ratou i te rapaau i te feia maˈi ma te ore e pâmu i te toto? No te aha ratou i ineine ai i te na reira? (4) Eaha ta te mau maimiraa apî i ravehia i roto i te mau fare maˈi e faaite ra no nia i te faaohiparaa i te toto? (5) Eaha te mau fifi i te pae rapaauraa i taaihia i te pâmuraa toto e nehenehe e tupu mai? (6) Eaha ta te mau taata îite faaotiraa no nia i te mau maitai o te mau ravea monoraa i te pâmuraa toto? (7) Na te aha e faatupu mai i te anemia? Eaha te faito anemia ta te hoê taata e nehenehe e faaoromai aita e faahopearaa ino? Eaha te nehenehe e ravehia no te faaafaro i tera fifi? (8) E nafea e nehenehe ai e haamaitai i te hamaniraa i te toropuru ura o te hoê taata maˈi? (9) Eaha te mau ravea anohaa e faaohipahia nei no te faaiti mai i te taheraa toto i te roaraa o te tâpûraa? (10) E nehenehe anei te mau ravea monoraa i te pâmuraa toto e tano no te mau tamarii apî aore ra no te mau taata e nehenehe paha e pohe? (11) Eaha hoê o te mau faaueraa tumu morare faufaa no te hoê rapaauraa maitai? (12) No te aha mea faufaa ˈi no te mau Kerisetiano ia faaoti oioi eaha te mau rapaauraa aita e toto ta ratou e farii? E nafea ïa tatou?

Na te taata taitahi e faaoti e e farii anei oia i te mau ravea rapaauraa i faahitihia i roto i te video, ia au i to ˈna iho manaˈo haava haapiihia e te Bibilia. Ua rave anei oe i te hoê faaotiraa taa maitai i nia i te mau ravea rapaauraa e faanahoraa o ta oe i ineine i te farii no oe e no ta oe mau tamarii? No te hoê tauaparauraa papu roa ˈtu â no nia i te reira, a hiˈo i te “Uiraa a te feia taio” o Te Pare Tiairaa o te 1 no Tiurai 2004 e o te 15 no Atopa 2000 e tae noa ˈtu i te api hau “Eaha ta ˈu faaotiraa no nia i te mau tuhaa o te toto e te mau ravea rapaauraa o te faaohipa i to ˈu iho toto?” o Ta tatou taviniraa i te Basileia no Novema 2006. E mea tia ia faaara-roa-hia te feia ta oe i maiti no te turu ia oe e te mau melo utuafare e ere i te Ite, i ta oe mau faaotiraa.