A faatupu i te mau taime maitatai no te poro
1 Ua rau te tupuraa o te mau taata o te amuiraa Kerisetiano. Ua tahoêhia râ tatou i roto i ta tatou faaotiraa papu e haamaitai, aore ra e arue ia Iehova. (Sal. 79:13) Ia taotia te ea paruparu aore ra te tahi atu mau tupuraa fifi i ta tatou pororaa i te parau apî maitai, e nafea ïa tatou e nehenehe ai e faatupu i te mau taime maitatai no te poro?
2 I roto i te mau ohipa o te mau mahana atoa: Ua faaohipa noa Iesu i ta ˈna mau haaraa i te mau mahana atoa e te mau taata no te horoa ˈtu i te hoê faaiteraa. Ua paraparau o ˈna ia Mataio ia ˈna i haere na te fare aufauraa taoˈa, ia Zakaio ia ˈna i reva, e i te hoê vahine Samaria ia ˈna i faafaaea. (Mat. 9:9; Luka 19:1-5; Ioa. 4:6-10) I roto i ta tatou mau ohipa o te mau mahana atoa, e nehenehe atoa tatou e taui i ta tatou aparauraa matauhia ei pororaa. E faaitoito te tapearaa i te hoê Bibilia i nia ia tatou e te mau api parau iti aore ra buka rairai ia ineine noa no te paraparau atu no nia i to tatou tiaturiraa.—Pet. 1, 3:15.
3 Te taotia ra anei te tino paruparu ia outou ia apiti i te ohipa pororaa i tera fare i tera fare? A ara i te mau taime maitatai no te poro i te pǔpǔ rapaau maˈi e te tahi atu o ta outou e farerei. (Ohi. 28:30, 31) Mai te peu e e pinepine outou i te mau i te fare no te mau tupuraa, ua tamata anei outou i te poro na roto i te niuniu paraparau aore ra te rata? Te papai noa ra te hoê tuahine i te mau melo o to ˈna utuafare e ere i te Ite. Te papai atoa ra o ˈna i te mau manaˈo bibilia faaitoito e te mau tupuraa ta ˈna e farerei a poro ai oia.
4 I te vahi raveraa ohipa aore ra i te fare haapiiraa: E turai atoa to tatou hinaaro e arue ia Iehova ia tatou ia faatupu i te mau taime maitatai no te tanu i te mau huero o te parau mau i te vahi raveraa ohipa aore ra i te fare haapiiraa. Ua faatia te hoê tamaiti poro apî e vau matahiti i ta ˈna piha haapiiraa i ta ˈna i taio i roto i te Réveillez-vous! no nia i te avaˈe. I muri aˈe i to ˈna iteraa e nohea mai tera haamaramaramaraa i te noaaraa ia ˈna, ua haamata ta ˈna orometua haapii i te farii tamau i Te Pare Tiairaa e te Réveillez-vous! I te vahi raveraa ohipa, e nehenehe te tuu-noa-raa tatou i te hoê buka, te Bibilia haapii, i te vahi e nehenehe ai vetahi ê e ite atu e faatupu i te mau uiraa e e horoa mai i te taime maitatai no te poro.
5 E nehenehe anei ta outou e feruri i te mau ravea no te faatupu i te mau taime maitatai no te poro i roto i ta outou mau ohipa o te mau mahana atoa? Ma te faaohipa maitai roa ˈˈe i to tatou tupuraa, ia tutava ïa tatou i te mau mahana atoa i te “pûpû . . . i te Atua ra i te hoê tusia arueraa.”—Heb. 13:15, MN.