E arue anaˈe ia Iehova ma te tuutuu ore
1 Mea iti te mau ohipa faufaa roa no te huti i to tatou ara-maite-raa ma te tuutuu ore. Te ô ra te tamaaraa, te hutiraa i te aho e te taotoraa i roto. E mea faufaa mau iho â teie mau ohipa no to tatou vai-maitai-raa. Ma te hoê â huru ua faaô te aposetolo Paulo i te pororaa o te parau apî maitai i to ˈna titauraa e: “E na ô tatou ia ˈna ra i te pûpû i te tusia ra i te haamaitai i te Atua, eiaha e tuutuu.” (Heb. 13:15). No reira, te arueraa i te Atua tera atoa ïa to tatou ara-maite-raa tamau. Te hoê ïa ohipa te tia ia tatou ia rave i te mau mahana atoa: te arueraa i to tatou Metua i nia i te raˈi ma te tuutuu ore.
2 I to te mau taata o to ˈna tau tamataraa i te faafariu i to ˈna ara-maite-raa i nia i te tahi atu ohipa, ua pahono o Iesu e: “E parau haere â vau i te parau maitai o te basileia o te Atua.” (Luka 4:43). I te roaraa o na matahiti e toru e te afa o ta ˈna taviniraa, i te mau mahana atoa, ua taaihia ta ˈna mau ohipa atoa i te faahanahanaraa i te Atua. Ua ite tatou e ua na reira atoa o Paulo, i te mea ua parau o ˈna i roto i te Korinetia 1, 9:16: “E ati hoi to ˈu ia ore au ia parau i te evanelia!” Ua faaitoitohia vetahi mau kerisetiano haapao maitai ia ineine noa i te paruru i to ratou tiaturiraa i mua i to ratou taata-tupu (Petero 1, 3:15). I teie nei mahana, te tutava nei tau hanere tausani pionie itoito e tau mirioni taata poro i te apee i taua mau hiˈoraa maitatai ra.
3 Ia feruri anaˈe tatou i te itoito rahi o Iesu Mesia, to tatou Hiˈoraa, te turaihia ra tatou ia apee maitai i to ˈna mau taahiraa avae (Petero 1, 2:21). I te tahi mau taime, e nehenehe tatou e paruparu i mua i te mau fifi o te oraraa o te mau mahana atoa. Ia rave anaˈe tatou i te ohipa ma te taime taatoa, nafea tatou ia faufaahia i te mau ravea no te arue ia Iehova i te mau mahana atoa? Eita e tia ia tatou ia haapae i ta tatou mau hopoia i te pae utuafare, o te titau rahi ra ia tatou i to tatou taime. Te haere nei te rahiraa o te mau taurearea i te fare haapiiraa, e e mea faufaa hoi. E nehenehe tatou e manaˈo e eita tatou e nehenehe e arue ia Iehova i mua i te taata i te mau mahana atoa. Te vai atoa nei vetahi o te ore e faaite aˈe i te parau apî maitai e hoê avaˈe taatoa noa ˈtu eaha te huru tupuraa.
4 Aita o Ieremia i nehenehe e tapea noa i te poroi i roto ia ˈna. I to ˈna faaearaa i te paraparau no nia i te iˈoa o Iehova no te hoê taime, ua tupu i roto ia ˈna i te hoê auahi ama au ore (Ier. 20:9). I mua atoa i te ati, i te tahi taime e au ra e eita te reira e maraa, ua noaa noa ia Ieremia i te hoê ravea no te afai i te poroi a Iehova i te feia o to ˈna ra tau. E nehenehe anei tatou e apee i to ˈna hiˈoraa itoito e e faaoromai no te itea mai i te mau ravea no te arue i to tatou Poiete i te mau mahana atoa?
5 No te paraparau ia Iehova, eiaha tatou e tiai noa i te mau taime i faataahia no te horoa i te faaiteraa e te feia poro o te amuiraa. E tia noa ia tatou ia horoa i te hoê tariˈa faaroo. Te farerei nei tatou i te mau taata i te mau mahana atoa: i to tatou nei fare, i te vahi raveraa ohipa, ia tiai anaˈe tatou i te vahi aufauraa moni o te hoê fare toa rahi aore ra i roto i te hoê pereoo mataeinaa. E navai noa te hoê aroharaa auhoa e te hoê uiraa aore ra te hoê parau o te haaferuri no te haamata i te hoê tauaparauraa. No te rahiraa, o te ravea hotu roa ˈˈe no te horoa i te faaiteraa. Mai te peu e e faaohipa tatou i te mau taime atoa no te faaite i te parau apî maitai ia vetahi ê, eita tatou e vaiiho i te hoê noa avaˈe ma te ore e horoa i te faaiteraa no nia i te Basileia.
6 Eita roa ˈtu ta tatou haamaitairaa taa ê e arue ia Iehova e mou. Mai ta te taata papai salamo ra i faaite, e tia i te mau mea atoa e huti ra i te aho ia arue ia Iehova; ma te feaa ore te hinaaro atoa ra tatou e rave i ta tatou tuhaa (Sal. 150:6). Mai te peu e e turai to tatou mafatu ia tatou ma te tuutuu ore, e faufaahia ïa tatou i te mau taime atoa e vai ra ia tatou no te paraparau no nia ia Iehova e ta ˈna Parau i te mau mahana atoa.