E haamaitai ia Iehova i te mau mahana atoa
1. Eaha ta te mau tavini a te Atua e hinaaro e rave, e no te aha?
1 Ua faaoti te arii Davida e haamaitai ia Iehova “i te mau mahana atoa,” e a muri noa ˈtu. (Sal. 145:2, 7, 21) E tumu papu atoa ta tatou no te haamaitai ia Iehova i te mahana taitahi.—Sal. 37:10; 145:14, 18; Pet. 2, 3:13.
2. E nafea te mau utuafare e haamaitai ai ia Iehova i te mau mahana atoa?
2 I te fare: A hiˈopoahia ˈi te irava mahana, a ravehia ˈi te Haamoriraa utuafare, e a faaineinehia ˈi te mau putuputuraa, e faaohipa tatou i te mau papai faaitoito o te tauturu mai ia aparau no nia i te Atua e te Bibilia. No te utuafare e rave rahi, e peu matauhia ia tamaa amui hoê aˈe taime i te mahana. E taime au ïa te reira no te aparau ma te ru ore e te au noa e no te haamaitai ia Iehova. E mea faufaa tera mau aparauraa faanahohia e te mau metua no te ‘haapii i ta ratou mau tamarii e ia paari ma te aˈo a te Fatu ra.’—Eph. 6:4; Deut. 6:5-7.
3. Eaha te mau taime maitatai no te haamori ia Iehova e to tatou mau taeae?
3 E to tatou mau taeae: E taime maitai roa te taviniraa aore ra te mau putuputuraa a te amuiraa no te haamaitai ia Iehova e to tatou mau hoa Kerisetiano. (Mas. 15:30; Phil. 4:8; Heb. 13:15) I te mea e te here paatoa nei tatou ia Iehova, e mea ohie ïa ia faahiti i to tatou mauruuru haavare ore no to Iehova maitai a paraparau ai tatou ia vetahi ê.—Sal. 106:1.
4. I roto i teihea tupuraa e nehenehe ai oe e haamaitai ia Iehova?
4 Ia aparau tatou e te feia tiaturi ore: Eita paha tatou e nehenehe e apiti atu i te taviniraa i te mau mahana atoa. E nehenehe râ te aparau-poto-raa i te mau hoa ohipa, hoa haapiiraa, e i vetahi atu no nia ia Iehova e ta ˈna mau opuaraa e faahotu i te tiaturiraa i roto i te taata aau haavare ore. (Sal. 27:14; Pet. 1, 3:15) I roto i te hoê manureva, ua poro atu te hoê tuahine i te tahi horopatete. Ua mahanahana roa e ua itoito roa oia i ta ˈna i faaroo e ua horoa roa ˈtu i to ˈna vahi nohoraa e ta ˈna numera niuniu i te tuahine no te farerei faahou â. A ino e a arepurepu roa ˈtu â ˈi te mau tupuraa na te ao, e tamau â te mau tavini a Iehova i te poro i te feia e hinaaro ra e faaroo i te “parau oaoa e te maitai ra.” A nehenehe atu ai vetahi atu e tiaturi e e haamaitai ia Iehova.—Isa. 52:7; Roma 15:11.
5. No te aha e hinaaro ai tatou e haamaitai ia Iehova, e eaha ta te reira e faatupu?
5 Auê Iehova i te oaoa ia faaroo i to ˈna mau tavini ia haamaitai ia ˈna i te mau mahana atoa! Mai te poieteraa ite-mata-hia a Iehova e haaati ra ia tatou, e nehenehe tatou atoa e haamaitai ia ˈna i te mahana taitahi i te fare, i roto i te amuiraa, e ia aparau tatou ia vetahi ê tei ore â i riro atura ei hoa e haamaitai ra ia Iehova.—Sal. 19:1-4.