E faaite anaˈe i te anaanatae mau: ma te faaineine ia tatou
1 E tauturu te faaineine-maitai-raa no te taviniraa ia tatou ia faaite i te anaanatae mau ia vetahi ê. E nafea ïa? Ia faaineine maitai tatou ia tatou, eita ïa tatou e tapitapi roa no ta tatou faaiteraa e e nehenehe ïa tatou e haapao rahi aˈe i te fatu fare. Hau atu â, e tauturu te reira ia tatou ia tinai i te haama e ia paraparau ma te haavare ore. E nafea râ tatou e nehenehe ai e faaineine i te hoê faaiteraa manuïa?
2 A faaohipa i te hoê faaiteraa tano: A maiti i roto i Ta tatou taviniraa i te Basileia no Tenuare 2006 hoê o te mau manaˈo tauturu e tano i to outou vahi, e a hiˈo e nafea outou e nehenehe ai e parau na roto i ta outou iho mau parau. A faatano te reira i ta outou tuhaa fenua. Ei hiˈoraa, mai te peu e e pinepine outou i te farerei i te mau taata no te tahi haapaoraa aore ra nunaa, a feruri eaha ta ratou e nehenehe e anaanatae. Na roto i te faatanoraa i ta outou faaiteraa i te feia ta outou e paraparau ra, te faaite ra ïa outou i te anaanatae haavare ore ia ratou.—Kor. 1, 9:22.
3 A haamata ˈi outou i te faaohipa i te faaiteraa, a tamau i te haamaitai atu i te reira. I te mea e e mea faufaa roa te mau parau matamua, a tapao e nafea te mau taata e pahono ai i ta outou omuaraa parau. Te anaanatae ra anei ratou i te tumu parau? Te pahonohia maira anei te mau uiraa ta outou i ui atu? Mai te peu e aita, a rave i te mau faatanoraa e ia ite-roa-hia mai ai te hoê faaiteraa o te manuïa.
4 Te mau tauturu ia tamau aau: E rave rahi o te manaˈo ra e e mea fifi ia haamanaˈo i te hoê faaiteraa tei te pae opani anaˈe ratou. Mai te peu e ua farerei outou i tera fifi, ua tamata anei outou i te rave i te mau faaineineraa i reira outou e horoa ˈi i te faaiteraa ma te reo puai i te tahi atu taata? E nehenehe te reira e tauturu ia outou ia haamanaˈo i te mau manaˈo papu maitai e ia parau atu i te reira ma te ohie e te maramarama. E nehenehe atoa te reira e faaineine ia outou ia faaruru i te mau huru pahonoraa atoa ta outou e nehenehe e farerei.
5 Te tahi atu tauturu ia tamau aau, o te papairaa ïa i te hoê haapotoraa o te hoê faaiteraa i nia i te hoê api iti e a hiˈo oioi atu i te reira hou outou a haere ai i te hoê fare. Ua itea mai i te tahi pae e e tauturu tera haamanaˈoraa poto ia ratou ia tamǎrû aˈe e e nehenehe aˈe ratou e paraparau i te taata. Ia na reira, e nehenehe te hoê faaineine-maitai-raa e tauturu ia tatou ia faaite i to tatou iho anaanatae ia vetahi ê e no reira, a haamaitai i ta tatou faaiteraa o te parau apî maitai.