E arue anaˈe ia Iehova na roto i te pororaa faanaho-ore-hia
1 E imi te mau tavini haapao maitai a Iehova i te mau ravea no te arue ia ˈna i te mau mahana atoa. (Sal. 96:2, 3; Heb. 13:15) O te pororaa faanaho-ore-hia te hoê ravea. I teie mahana, te oaoa nei e rave rahi feia haamori ia Iehova i to te hoê taata faaiteraa ia ratou i te poroi o te Basileia ma taua ravea ra.
2 Ia poro tatou i te hoê taata ma te faanaho-ore-hia, e pinepine vetahi ê atu i te faaroo i te poroi o te Basileia. Inaha, ua faaaraara te aparauraa a Iesu e te vahine Samaria i te apoo pape a Iakoba i te anaanatae o te tahi atu no Samaria e rave rahi. (Ioa. 4:6-30, 39-42) A mau noâ ˈi Paulo raua Sila i te fare tapearaa i Philipi, ua poro raua i te tiai, e ua farii te taatoaraa o te utuafare o taua taata ra i te parau mau.—Ohi. 16:25-34.
3 Te mau taime: Eaha te mau taime outou e poro ai ma te faanaho-ore-hia? E rave vetahi i te mau taime ia hoohoo haere ratou, ia rave ratou i te mau pereoo mataeinaa, aore ra ia tiai ratou i roto i te hoê piha tiairaa. E na reira vetahi i te taime faafaaearaa i te vahi raveraa ohipa aore ra i te fare haapiiraa. E nehenehe te vai-noa-raa te hoê papai bibilia i te hoê vahi e itehia ˈtu e turai i tahi atu mau taata ia uiui mai no nia i ta tatou mau tiaturiraa.—Pet. 1, 3:15.
4 E nafea ia haamata: I te hoê putuputuraa, ua faaroo te hoê tamahine iti mamahu e hitu matahiti e e mea tia ia poro te taatoaraa. No reira, na mua ˈˈe raua to ˈna mama e haere ai i te fare toa rahi, ua tuu oia e piti buka rairai i roto i ta ˈna pute. A ohipa noa ˈi to ˈna mama i te vahi aufauraa, ua pûpû te tamahine iti i te hoê buka rairai i te hoê vahine, o tei farii ma te aau tae. I to to ˈna mama uiraa ia ˈna e mea nafea to ˈna faaitoitoraa i te paraparau i taua vahine ra, ua pahono oia e: “Ua na ô vau e: Faaineine! Ineine? A haere! E haere atura vau!”
5 No te poro ma te faanaho-ore-hia, e titauhia ia tapea tatou i taua atoa huru feruriraa ra. Eaha te nehenehe e tauturu ia tatou? Te pure ia roaa mai ia tatou te itoito no te paraparau. (Tes. 1, 2:2) E faaineine anaˈe i te hoê uiraa aore ra te hoê manaˈo no nia i te hoê tumu parau anaanatae no te haamata i te hoê tauaparauraa. I muri iho, e tiaturi anaˈe e e haamaitai mai Iehova i ta tatou mau tutavaraa.—Luka 12:11, 12.
6 Ia poro tatou ma te faanaho-ore-hia i te feia ta tatou e farerei i te mau mahana atoa, e arue tatou ia Iehova e e faaoaoa te reira ia tatou. Na roto i taua ravea ra, peneiaˈe e tauturu tatou i te hoê taata ia haere na te eˈa o te ora mure ore.