Tairururaa haaati: te porotarama apî
Eaha te mau haamaitairaa materia e noaa mai ia haere outou e o Iehova? Nafea e patoi ai i te faahemaraa e vaiiho i te mau fa e ere i te teotaratia ia na mua ˈˈe i te mau maitai o te Basileia i roto i to outou oraraa? (Mat. 6:33) Mea fifi anei na outou ia faataa ê i te maitai e te ino i roto i te hoê ao o te tuu i te ino ei maitai? (Heb. 5:14) E tuatapapahia teie mau tumu parau i roto i te tairururaa haaati “A haere na te mau eˈa o te Atua i teie nei iho â ia maitai outou” o te haamata i te avaˈe Setepa 1999.—Sal. 128:1.
Te vai ra te hoê tuhaa apî i roto i teie tairururaa haaati i te Mahana maa: te vauvauraa i te hoê Putuputuraa no te Taviniraa ei hohoˈa. E faaara te tiaau haaati i te mau amuiraa no nia i te mau faanahoraa i ravehia ia tae mai te taatoaraa ma te ineine maitai e ia faufaa-roa-hia ratou i te porotarama.
“E te mau pionie: a ara maitai nafea outou ia haere,” o te hoê ïa tuhaa o te faataa mai nafea tatou e faaite ai i te paari e te feruriraa tano no te “faaherehere maite i te taime” no te taviniraa pionie. (Eph. 5:15-17) “A ara i te mau eˈa e au noa ra e mea tia”: e tauturu mai teie oreroraa parau ia ite papu tatou eaha ta te Atua e farii maitai i roto i te mau tuhaa atoa o to tatou oraraa. “Nafea te mau parau tohu i tupu e riro ai ei ohipa na tatou,” e faaî teie oreroraa parau i to tatou feruriraa e to tatou mafatu i te hinaaro i te Parau a te Atua. “Mea maitai te mau eˈa o te Atua!,” o te upoo parau ïa o te oreroraa parau huiraatira, o te haamatara i te mau haamaitairaa materia e noaa mai ia pee tatou i te mau titauraa tia a Iehova.
E hinaaro anei outou e faaite i mua i te taata na roto i te bapetizoraa i roto i te pape e te hinaaro ra outou e riro ei tavini a te Atua o te haere ra na to ˈna mau eˈa? A paraparau ïa i te tiaau peretiteni a ta outou amuiraa o te rave i te mau faanahoraa e titauhia.
A faaoti maite eiaha e mairi i teie tairururaa haaati faahiahia. Eiaha e haamâuˈa i te hoê noa ˈˈe tuhaa iti o na mahana tairururaa e piti; oia mau, “e ao to te taata atoa i mǎtaˈu ia Iehova; o tei haapao i to ˈna ra mau eˈa.”—Sal. 128:1.