Porotarama no te tairururaa haaati apî
1 I te avaˈe setepa, te upoo parau o te mau tairururaa haaati oia hoi “E faaroo e e haapii anaˈe ia faaohipa i te Parau a te Atua.” Te tuea maitai ra teie upoo parau niuhia i nia i te Deuteronomi 31:12, 13 e te porotarama, o te haafaufaa ra i te mau haapiiraa o te tia ia tatou ia haapii e ia faaohipa.
2 Noa ˈtu e te faaroo nei te rahiraa o te mau taata i teie mahana i te mau parau haavare, e mea faufaa roa no tatou tataitahi ia faaroo i te Parau a te Atua e ia haapii i te faaohipa (Luka 11:28; Tim. 1, 4:1). Ua faaineinehia te mau tumu parau o te tairururaa haaati na roto i teie fa no te faaitoito e no te tauturu i te mau taata poro, te mau utuafare, te mau matahiapo e te mau pionie. I te mahana maa e hohorahia te hoê oreroraa parau vahihia i roto e maha tuhaa i nia i te upoo parau ra “E faaruru anaˈe i to tatou mau fifi na roto i te faarooraa i te Parau a te Atua.” E i te sabati poipoi, te tahi atu tumu parau “Te aˈo nei te mau Papai i roto i te parau-tia.” Te vai ra te mau faaitoitoraa i te pae varua i roto i te taatoaraa o te porotarama o ta outou e to outou utuafare e ore roa e tia ia ere.
3 E horoahia i te mahana maa e te sabati te mau manaˈo tauturu ohie no te pororaa, turuhia mai e te mau faahiˈoraa. E faaroo atoa outou i te tahi mau uiuiraa e te mau faatiaraa faaitoito e o te nehenehe e haapii mai atoa ia tatou. No reira, na roto i te taeraa mai e te faarooraa ma te fa e te tapao e faaohipa i te mea ta outou e haapii, e hau atu â ïa outou i te auraro i te mau ture a te Parau a te Atua.
4 E riro te bapetizoraa o te feia o tei pûpû ia ratou no te Atua aita i maoro aˈenei ei taime faufaa roa o te tairururaa haaati. Na mua roa i te faaiteraa i mua i te taata i te pûpûraa ia ˈna iho, e tia i te mau taata o te hinaaro e bapetizo ia haere e farerei i te tiaau-peretiteni, na ˈna ïa e rave i te mau faanahoraa ia paraparau te mau matahiapo ia ratou.
5 Te tumu parau o te oreroraa parau huiraatira o teie mau tairururaa teie ïa “No te aha e vaiiho ia arataihia e te Bibilia?” A titau manihini i te mau taata e anaanatae ra. No te mau faaitoitoraa e te tauturu ta outou e ta to outou utuafare e fanaˈo, a faaineine ia outou ia haere i te mau rururaa atoa.