Te porotarama o te rururaa haaati i mua nei

“E tapea maite anaˈe i roto i te feruriraa te mahana o Iehova,” o te upoo parau ïa o te mau rururaa haaati i mua nei e haamata i te avaˈe Setepa. (Pet. 2, 3:12) Ua faaineinehia no te turai ia tatou ia ohipa. Fatata roa, e faatupuhia te mau haavaraa a Iehova i nia i te feia o te fenua nei. O vai te ora ˈtu i “taua mahana rahi o te Atua Puai hope ra”? O te feia anaˈe ïa o te vai ara noa i te pae varua e ua î to ratou oraraa i te mau ohipa “haapao maitai e te paieti.”—Apo. 16:14; Pet. 2, 3:11.

No te ora ˈtu i te mahana o Iehova, e mea titauhia ia bapetizo. (Pet. 1, 3:21) Te feia poro e hinaaro ra e bapetizo i teie rururaa, a faaara ˈtu ïa i te tiaau peretiteni, na ˈna e rave i te mau faanahoraa e titauhia.

E faaite papu mai te oreroraa parau e maha tuhaa, oia hoi “Te huru taata te tia ia tatou ia riro,” e eaha te tia ia rave no te tapea maite noa i roto i te feruriraa te vairaa mai o te mahana o Iehova. E vauvau mai te oreroraa parau huiraatira, oia hoi “A ohipa ma te paari a fatata mai ai te mahana o Iehova,” e eaha te auraa ‘e imi ia Iehova, i te parau-tia e i te haehaa’ no te ora ˈtu.—Zeph. 2:3.

E hope te rururaa haaati na roto e piti oreroraa parau faaitoito mau e vauvauhia mai e te mau tiaau ratere, oia hoi “Ua niuhia anei to outou oraraa i nia i te parau mau?” e “E faanahonaho anaˈe ia tatou ma te mahana o Iehova i roto i te feruriraa.” E tauturu teie mau oreroraa parau ia tatou ia feruri i nia i to tatou oraraa e ia rave i te mau tauiraa e titauhia. Te haapapu nei te mau parau tohu a te Bibilia e te mau ohipa e tupu ra na te ao nei e, ua fatata roa mai te mahana o Iehova. E turai te porotarama o teie rururaa ia tatou ia “haapao maitai, e [ia] faaitoito.” (Pet. 1, 5:8) E rave anaˈe ïa i te mau faanahoraa papu no te tae atu i te rururaa.