‘E faaite anaˈe eaha mau na to tatou tere’
1 Ua tâpû-aˈena-hia anei outou, a faaineine maite ai outou, e teie mau parau: “A faaite mai eaha mau na to outou tere. Eaha mau na ta outou e hinaaro ra?” E hiˈo anaˈe eaha te haapiiraa ta tatou e nehenehe e huti mai no nia i teie tupuraa.
2 I teie mahana, te ru noa ra te mau taata. Te hinaaro nei ratou e ite o vai tatou e no te aha tatou e haere ai i ǒ ratou. I to ratou iteraa e te hinaaro ra tatou e paraparau ia ratou no nia i te Bibilia, e nehenehe ratou e patoi i te faaroo ia tatou. E ere te taioraa i te Bibilia e te mau tauaparauraa i te pae varua i te mea faufaa i roto i te oraraa o te mau taata e rave rahi i teie mahana. Nafea ia tauturu ia ratou ia paraparau tau minuti iti noa i nia i te hoê tumu parau Bibilia?
3 Te hoê ravea o tei manuïa: Te ravea, o te faaiteraa ïa i te taata ta tatou e paraparau ra e te horoa ra te Bibilia i te tahi mau ravea ohie no te mau fifi e haapeapea ra ia ˈna, e ia na reirahia na roto i te tahi tau parau faataaraa maramarama. Te mau faaiteraa aravihi roa ˈˈe, o te mau faaiteraa ïa o te horoa i te hoê uiraa taa ê no te haaferuri i te taata e o te pahonohia na roto i te hoê irava Bibilia. Peneiaˈe e oaoa outou i te tamata i teie mau manaˈo i muri nei. Ua faaineine-maitai-hia te reira no ‘te faaite-oioi-raa eaha mau na to tatou tere’ ia anaanatae mai te taata ta tatou e paraparau ra.
4 I roto i te mau tuhaa fenua e parau pinepine ai te mau taata e ‘Aita vau e anaanatae ra,’ e ui anaˈe ia ratou i te hoê uiraa o te haaputapû ia ratou iho:
◼ “A piri ai te mileniuma apî, e tiaturiraa anei to oe aore ra e mau feaaraa? [A vaiiho i te taata ia pahono.] Ua faaite te Bibilia i te mau tupuraa maere mau ta tatou e farerei nei i teie mahana, oia atoa râ to ratou faahopearaa.” Taio te Timoteo 2, 3:1, 2, 5 e te Maseli 2:21, 22.
◼ “I to tatou fenua, te haapeapea rahi nei tatou i te faanahoraa i te pae o te oraora-maitai-raa no a muri aˈe. Ua ite anei oe e e faatitiaifaro roa te Atua i te mau fifi i te pae o te oraora-maitai-raa?” Taio te Apokalupo 21:3, 4.
◼ “Te manaˈo ra anei oe e e maitai roa to tatou vahi faaearaa ahiri e e pee pauroa tatou i te mau faaueraa tumu o te Bibilia?” Taio te Mataio 22:37-39.
5 I te mea e e hopoia na tatou te pororaa i te parau apî maitai o te Basileia, e tia ïa ia tatou ia na reira i te mau taime atoa ta tatou e nehenehe, a faaite eaha ta taua Basileia ra e faatupu. E nehenehe tatou e parau e:
◼ “Ua ite anei oe e te tohu ra te buka tahito roa ˈˈe o teie ao, te Bibilia, e faaterehia te ao atoa nei e te hoê anaˈe faatereraa?” Taio te Daniela 2:44.
◼ “Ia manaˈo oe, i roto i teihea mau tupuraa e ora ˈi tatou ahiri e te faatere ra Iesu Mesia i te fenua nei?” Taio te Salamo 72:7, 8.
6 I te mau tuhaa fenua e haapaoraa ta te mau taata, e nehenehe tatou e tamata i teie mau omuaraa parau:
◼ “E rave rahi o te hiˈo-ino-hia nei no te mea e tane aore ra e vahine ratou, no ta ratou haapaoraa anei aore ra no to ratou anei nunaa. Ia manaˈo oe, eaha te manaˈo o te Atua no nia teie mau faainoraa?” Taio te Ohipa 10:34, 35.
◼ “Ua ite taua, o oe e o vau, e ua faatupu Iesu Mesia e rave rahi semeio i to ˈna ra tau. Ahiri e nehenehe ta oe e ani ia ˈna ia faatupu faahou hoê aˈe, eaha ta oe e maiti?” Taio te Salamo 72:12-14, 16.
7 Mai te peu e ua iriti rii te taata i te opani, e nehenehe tatou e haamata i te aparauraa mai teie:
◼ “Ua fiu e rave rahi i te faarooraa i te parau o te mau fifi. Mea au aˈe na ratou ia paraparauhia no nia i te mau ravea. O oe atoa paha. Teie râ, ihea e itehia ˈi te mau ravea mau?” A vaiiho i te taata ia pahono. Taio te Timoteo 2, 3:16, 17.
8 Te hinaaro ra anei outou e tamata? E pinepine e navai noa te hoê uiraa no te faaanaanatae i te taata. Ua titau manihini te hoê vahine, o tei patoi roa hoi i mutaa iho, i ǒ na e piti tuahine, ua ani ra te tahi o raua e: “Ua ite anei oe i te Basileia o ta oe e pure ra i roto i Te Pure a te Fatu?” Ua haamaere teie uiraa i teie vahine, o tei farii i muri iho i te haapii i te Bibilia. I teie mahana, ua pûpû oia ia ˈna no Iehova e ua bapetizohia oia.
9 Ia paraparau tatou i te hoê taata, e aau rotahi to tatou. Ia vaiiho tatou i to tatou mafatu ia paraparau. E farii ohie aˈe te mau taata i ta tatou poroi mai te peu e e faaite tatou e te anaanatae mau ra tatou ia ratou.—Ohi. 2:46, 47.
10 E tautooraa te pororaa i te parau apî maitai i teie mahana. E manaˈo ino vetahi i te mau taata ěê. Te ora nei te tahi atu i te hoê oraraa huehue e mea iti to ratou iho taime. Teie râ, e nehenehe tatou e papu e e nehenehe â tatou e te vai ra â te tahi mau taata au. (Mat. 10:11) E horoa mai te mau tutavaraa ta tatou e rave ra no te imi ia ratou i te mau faahopearaa e rave rahi mai te peu e mea poto ta tatou mau faaiteraa e mai te peu e ‘faaite tatou eaha mau na to tatou tere.’