Pahonoraa i ta outou mau uiraa

◼ Teihea mau buka e tia ia tatou ia haapii e te feia apî hou to ratou bapetizoraa?

Hou oia e pûpû ai i to ˈna ora no Iehova e e bapetizo ai, e tia ia noaa i te hoê taata e haapii ra i te Bibilia te ite papu. (Ioa. 17:3) E noaa ia ˈna te mau haamaramaramaraa atoa e hinaarohia ma te haapii i te buka rairai ra Eaha ta te Atua e titau ra ia tatou? e te buka ra Te ite e aratai i te ora mure ore. I te rahiraa o te taime, e hiˈopoahia na mua te buka rairai ra Titau. Mai te peu râ e ua haamatahia te buka ra Te ite, e haapiihia ïa te buka rairai ra Titau i muri iho. No te aha e titauhia ˈi te reira?

Te hohora ra te buka rairai ra Titau i te mau haapiiraa tumu o te Bibilia. Ia hiˈopoahia taua buka rairai ra na mua, e maramarama maitai ïa te taata haapii i tei titauhia e mauruuru ai Iehova. Ia haapiihia taua buka rairai ra i muri aˈe, e riro ïa oia ei faahaamanaˈoraa maitai roa i te mau tumu parau o te buka ra Te ite. Noa ˈtu eaha te tupuraa, a faaitoito i te taata haapii ia hiˈo i roto i te Bibilia i te mau irava i faahitihia e ia feruri hohonu i te reira. Eiaha e haamoe i te haamatara i te mau hohoˈa, inaha e mau mauhaa haapiiraa aravihi roa te reira.—Hiˈo Te Pare Tiairaa o te 15 no Tenuare 1997, mau api 16-17.

Ia hope i te taata i te haapii i na buka e piti, e nehenehe paha ïa oia e pahono i te mau uiraa atoa ta te mau matahiapo e ui ia ˈna no te bapetizoraa. Mai te peu e e, aita paha ïa e faufaa ia haapii e o ˈna i te tahi atu buka, e tamau noa râ te taata poro i te anaanatae atu i ta ˈna mau haereraa i mua.—Hiˈo Te Pare Tiairaa o te 15 no Tenuare 1996, mau api 14, 17.