Te tauturu nei te mau pionie ia vetahi ê
1 Ua parau o Iesu e: “Te rahi mau nei te auhune sitona, te iti nei râ te feia e ooti: e teie nei, e pure outou i te Fatu o te ohipa, ia tono â oia i te rave ohipa ei ooti.” I te mea hoi e mea iti te feia ooti i te senekele matamua e e tuhaa fenua aano ta ratou, e nehenehe hoi ta Iesu e tono ia ratou anaˈe e faaite i te parau apî maitai i te feia atoa ta ratou e farerei. Teie râ, ‘ua tono tatoopiti [oia] ia ratou.’ (Luka 10:1, 2) No te aha e piti?
2 E mau pǐpǐ apî ratou e te aravihi ore. Ia poro amui ratou, e haamatau ïa ratou te tahi i te tahi e e faaitoito ia ratou iho. Mai ta Solomona i parau, “e maitai te taata toopiti i te taata hoê.” (Koh. 4:9‚ 10) I muri aˈe atoa i te niniiraahia mai te varua moˈa i te Penetekose 33 T.T., ua apee o Paulo, o Baranaba e vetahi atu i te feia faaroo i roto i te taviniraa. (Ohi. 15:35) Auê ïa te feia i haapii-roa-hia e teie mau taata aravihi i te fanaˈo e!
3 Te hoê porotarama faaineineraa maitai roa: Mai te amuiraa o te senekele matamua, ua faanahonahohia te amuiraa Kerisetiano i teie mahana no te poro. Te horoa atoa maira oia i te hoê faaineineraa. Ia hinaaro mau ïa tatou e tia ˈi e faaite i te parau apî maitai ma te aravihi atu â. Te pûpûhia ra te tahi tauturu ia aravihi atu â e rave rahi atu feia poro.
4 Ua faaara iho nei te Taiete, i roto i te Haapiiraa o te Taviniraa no te Basileia, e ua haamauhia te hoê porotarama tauturu ta te mau pionie e horoa na vetahi ê i roto i te taviniraa. Te hinaarohia ra anei te tauturu i roto i teie tuhaa? Oia. I teie na matahiti hopea e toru i mairi aˈenei, hau atu i te hoê mirioni taata poro tei bapetizohia, e e rave rahi i rotopu ia ratou e hinaaro ra i te faaineineraa ia aravihi atu â ratou i roto i te pororaa. O vai ïa ta tatou e nehenehe e farerei atu no te haamâha i teie hinaaro?
5 E nehenehe te mau pionie e tauturu mai. Te horoa ra te faanahonahoraa a Iehova ia ratou e rave rahi aˈoraa e te hoê faaineineraa. I roto i na hebedoma e piti o te Haapiiraa no te mau pionie, e fanaˈo ratou i te hoê haapiiraa e tano i to ratou mau hinaaro. E faufaa-atoa-hia ratou i te mau putuputuraa e te mau tiaau haaati e mataeinaa, e i te mau manaˈo tauturu no ǒ mai i te mau matahiapo ra. Parau mau, e ere pauroa te mau pionie i te mea aravihi mai ia Paulo e ia Baranaba, te fanaˈo nei râ ratou i te hoê haapiiraa faufaa roa, e te oaoa nei ratou i te tufa ˈtu na vetahi ê.
6 O vai te faufaahia? O te feia poro apî e te feia i bapetizo-apî-hia anaˈe anei o te hinaaro i te tauturu? Eita roa ˈtu! E mauruuru atoa te mau Kerisetiano apî e vetahi atu feia paari aˈe e mea maoro ratou i roto i te parau mau, ia tauturuhia ratou i roto i te tahi mau tuhaa o te taviniraa. Te opere rahi nei vetahi i te mau papai, e mea maitai roa ïa, teie râ, mea fifi no ratou ia hoˈi faahou e farerei i te taata aore ra ia haamata i te mau haapiiraa Bibilia. Area vetahi ra, mea ohie no ratou ia haamata i te mau haapiiraa Bibilia, te ite nei râ ratou e aita te feia ta ratou e haapii ra e haere ra i mua. Eaha te tapea ra ia ratou? E nehenehe ïa e ani i te mau pionie aravihi ia tauturu mai i roto i taua mau tuhaa ra. Mea ohie no te tahi mau pionie ia atuatu i te anaanatae o te taata, ia haamata i te mau haapiiraa Bibilia e ia aratai i te feia haapii i te faanahonahoraa. E faufaahia to ratou ite i roto i teie porotarama apî.
7 Te manaˈo ra anei outou e no ta outou tabula ohipa, eita ta outou e nehenehe e turu i te mau putuputuraa no te pororaa a te amuiraa mai ta outou e hinaaro? E nehenehe paha ïa te hoê pionie e poro na muri iho ia outou i te mau taime eita te tahi atu feia poro e vatahia.
8 E titauhia te rave-amui-maitai-raa i te ohipa: E piti taime i te matahiti, e rave te mau matahiapo i te mau faanahoraa ia fanaˈo te feia poro e hinaaro i te tauturu taa ê na roto i te arai o te porotarama ra Te tauturu nei te mau pionie ia vetahi ê. Mai te peu e e farii outou, a paraparau atu i te pionie o te haapao ia outou, a haamau i te hoê tabula ohipa ohie no te pororaa e a faatura i te reira. Eiaha ia mairi i te hoê noa ˈˈe faaauraa no te farereiraa. Ia poro anaˈe orua, a tapao i te mau ravea aravihi no te faaite i te parau apî maitai. A feruri i te mau tumu e manuïa ˈi vetahi mau ravea no te paraparau i te taata. A haapao maite i te mau manaˈo tauturu ta te pionie e horoa mai paha no te haamaitai i ta outou mau faaiteraa. Mai te peu e e faaohipa outou i te mau mea ta outou e haapii ra, e ite ïa outou e o vetahi ê i ta outou mau haereraa i mua i roto i te taviniraa. (Hiˈo Timoteo 1, 4:15.) A poro pinepine orua ia nehenehe anaˈe, a apiti i roto i te mau tuhaa atoa o te taviniraa, te pororaa faanaho-ore-hia atoa, na roto râ i te tutavaraa i roto i te tuhaa taa ê ta outou e hinaaro ra i te tauturu.
9 E anaanatae te tiaau no te taviniraa i te mau haereraa i mua i ravehia. E ani tamau oia i te taeae faatere i ta outou haapiiraa buka e eaha te mau haamaitairaa ta outou i huti mai i roto i te porotarama. E tauturu atoa te tiaau haaati ia outou ia haere mai oia i roto i te amuiraa.
10 Te hinaaro ra o Iehova ia haapiihia to ˈna nunaa e ia “[“ineine roa no,” MN] te mau ohipa maitatai atoa ra.” (Tim. 2, 3:17) E faariro anaˈe i te porotarama ra Te tauturu nei te mau pionie ia vetahi ê, mai te hoê faanahoraa maitai roa i faataahia no te tauturu i te feia e hinaaro ra e faaaravihi atu â ia ratou no te poro i te parau. Mai te peu e e apiti atu tatou, e na reira anaˈe ïa ma te mauruuru, te haehaa e te oaoa.