Te mau haamaitairaa o te taviniraa pionie
“Te haamaitairaa a Iehova—na te reira e faaona, e eita oia e apiti atoa mai i te mauiui.”—MASELI 10:22, MN.
1, 2. (a) Eaha ta te hoê pionie i parau no nia i te taviniraa ma te taime taatoa? (b) No te aha o te mau pionie te nehenehe e fanaˈo rahi i te mau oaoaraa o te faariroraa i te taata ei pǐpǐ?
“AITA ˈtu e oaoaraa rahi aˈe maoti râ te iteraa i te hoê taata o ta oe i haapii ia riro mai ei taata arue itoito ia Iehova. E putapû roa oe e e itoitohia to oe faaroo ia ite i te puai o te Parau a te Atua i te turairaa i te taata ia taui i to ratou oraraa no te faaoaoa ia Iehova.” O ta te hoê ïa pionie no Kanada i papai, ua hau atu i te 32 matahiti to ˈna taviniraa ma te taime taatoa. No nia i ta ˈna taviniraa pionie, ua parau oia e: “Aita vau e ite ra i te tahi atu ohipa o ta ˈu e rave. Aita atoa vau e ite ra i te tahi atu ohipa o te horoa mai i te hoê â oaoa.”
2 Te manaˈo atoa ra anei outou e mea oaoa roa ia tauturu i te hoê taata ia haere na nia i te eˈa e aratai i te ora? Parau mau, e ere te mau pionie anaˈe o te fanaˈo nei i teie oaoa. Ua faauehia te mau tavini atoa a Iehova ‘ia faariro i te taata ei pǐpǐ,’ e te tutava nei ratou i te na reira. (Mataio 28:19) Teie râ, no te mea e, e rave rahi hora ta te mau pionie e horoa nei i roto i te aua taviniraa, e pinepine o ratou te fanaˈo rahi nei i te mau oaoaraa o te faariroraa i te taata ei pǐpǐ. Tera râ, te vai atu râ te mau haamaitairaa no roto mai i te taviniraa pionie. A tauaparau atu e te mau pionie, e na ratou e faatia mai e e ravea faahiahia roa te taviniraa pionie no te fanaˈo i ‘te haamaitairaa a Iehova o te faaona.’—Maseli 10:22, MN.
3. Eaha te nehenehe e faaitoito ia tatou a tamau noa ˈi tatou i te tavini ia Iehova?
3 Aita i maoro aˈenei, ua anihia te mau pionie no te mau fenua huru rau o te ao nei, ia faataa mai i te mau haamaitairaa o ta ratou i fanaˈo i roto i te taviniraa ma te taime taatoa. E hiˈo anaˈe na i ta ratou i parau. Eiaha râ e haaparuparu mai te peu e ua taotiahia ta outou taviniraa no te maˈi anei, te ruhiruhiaraa, aore ra vetahi atu mau tupuraa. A haamanaˈo, te mea faufaa roa ˈˈe, o te taviniraa ïa ia Iehova ma te nephe atoa, ia au i te faito e maraa ia outou. E riro râ te faarooraa i te mau parau a te tahi mau pionie i te faarahi i to outou anaanatae i te raveraa i teie ohipa hoona mau mai te peu noa ˈtu e e nehenehe.
Te mauruuru e te oaoa hohonu
4, 5. (a) No te aha te faaiteraa i te parau apî maitai ia vetahi ê e riro ai ei ohipa hoona mau? (b) Eaha te manaˈo o te mau pionie no nia i te taviniraa ma te taime taatoa?
4 “E mea maitai i te horoa ˈtu i te rave mai,” o ta Iesu ïa i parau. (Ohipa 20:35) Oia, e noaa mai te mau haamaitairaa i te horoaraa ma te miimii ore. (Maseli 11:25) E parau mau roa te reira i te pae no te faaiteraa i te parau apî maitai ia vetahi ê. Oia mau, eaha te ô rahi aˈe ta tatou e nehenehe e horoa ˈtu i te hoê taata, maoti râ te tautururaa ia ˈna ia noaa te ite a te Atua, e aratai i te ora mure ore?—Ioane 17:3.
5 Eita e maerehia ia faahiti pinepine te feia e rave nei i te taviniraa ma te taime taatoa, i te oaoa e te mauruuru rahi o ta ratou e fanaˈo nei na roto i ta ratou taviniraa. “Ua ite au e aita ˈtu e ohipa o tei nehenehe e horoa mai i te mauruuru e noaa mai i te tufaraa i te parau mau na vetahi ê,” o ta te hoê pionie no Beretane ïa, e 64 matahiti to ˈna, e parau ra. Ua faaite te hoê vahine ivi no Zaire i te mea ta te taviniraa pionie i faatupu no ˈna: “Ua riro te taviniraa pionie ei tamǎrûraa mau i muri aˈe i te poheraa ta ˈu tane here. A haere noa ˈi au i roto i te taviniraa no te tauturu ia vetahi ê, ua iti mai to ˈu mauiui. Te tiaturi nei au i te mau parau tǎpǔ a Iehova, e te feruri nei au e nafea vau ia tauturu i te feia o ta ˈu e haapii ra ia taui i to ratou oraraa. I te hopea o te mahana tataitahi, e topa maitai to ˈu taoto, e ua î roa to ˈu mafatu i te oaoa.”
6. Eaha te oaoaraa taa ê ta vetahi mau pionie i fanaˈo?
6 Ua fanaˈo te feia o tei tavini ei pionie e rave rahi ahuru matahiti, i te oaoaraa taa ê e tavini i te mau fenua atea, ma te haamau i te mau amuiraa apî, o tei riro mai a muri aˈe ei mau tuhaa haaati. I Abashiri, i Hokkaido (te motu apatoerau roa no Tapone), te vai nei te hoê tuahine e 33 matahiti to ˈna riroraa ei pionie. Te haamanaˈo ra oia e, i te tairururaa haaati matamua o ta ˈna i haere—no Hokkaido taatoa—e 70 taata anaˈe tei tae mai. E i teie nei? Te vai nei 12 tuhaa haaati i nia i teie motu, e ua hau atu i te 12 000 feia poro taatoa. A feruri na i te oaoa rahi o to ˈna mafatu, ia haere anaˈe oia i te mau rururaa e te mau tairururaa e te mau nahoa feia poro i te Basileia i teie nei motu!
7, 8. Eaha te oaoaraa ta te rahiraa o te feia mea maoro ratou i roto i te taviniraa pionie, i fanaˈo?
7 Ua fanaˈo vetahi atu feia mea maoro ratou i roto i te taviniraa pionie, i te oaoaraa e ite i te mau taata haapii Bibilia ia bapetizohia e ia tapi i te mau hopoia taviniraa rahi aˈe. I Tapone, te haamanaˈo ra te hoê tuahine o tei tavini ei pionie i roto e iva tuhaa taviniraa taa ê mai te matahiti 1957 mai â, e ua vaiiho oia i te hoê A ara mai na! na te hoê vahine apî tei rave i te ohipa i te fare moni. E iva avaˈe i muri iho, ua bapetizohia ˈtura teie vahine apî. I muri iho, ua faaipoipo oia, e ua riro maira oia e ta ˈna tane ei mau pionie taa ê. Ua oaoa roa te tuahine pionie i te taime a haere mai ai te tiaau haaati apî i roto i ta ˈna amuiraa, te toruraa ïa o ta ˈna tuhaa taviniraa, e ta ˈna vahine—o te vahine ïa ta ˈna i haapii i te Bibilia!
8 Eita e maerehia i te mea e te faariro nei te feia i maiti i te taviniraa pionie ei toroa no ratou, i teie taviniraa mai “te hoê hopoia faufaa rahi te tia ia poiherehia,” ia au i te parau a te hoê taeae e 22 matahiti to ˈna riroraa ei pionie!
Te haapapuraa e te haapao maira o Iehova
9. Ei Aupuru Rahi, eaha ta Iehova i tǎpǔ i ta ˈna mau tavini, e eaha ïa te auraa no tatou nei?
9 Ua tǎpǔ o Iehova, te Aupuru Rahi, e turu oia i ta ˈna mau tavini, ma te haapao ia ratou i te pae varua e i te pae materia. Ua nehenehe mau â te Arii no tahito ra o Davida e parau e: “I vai apî na hoi au, e teie nei ua ruhiruhia; aitâ râ vau i ite i te feia parau-tia i te faarueraahia, e to ˈna ra huaai i te aniraa i te maa.” (Salamo 37:25) Parau mau, aita teie tǎpǔ a te Atua e faaere ra ia tatou i ta tatou hopoia e faaamu i to tatou utuafare i te pae materia, aita atoa hoi e faatia ra ia tatou ia tiaturi noa i nia i te horoa maitai o to tatou mau taeae kerisetiano. (Tesalonia 1, 4:11, 12; Timoteo 1, 5:8) Teie râ, ia ineine tatou i te rave i te mau haapaeraa i roto i to tatou oraraa, no te tavini rahi atu â ia Iehova, eita roa ˈtu oia e faarue mai ia tatou.—Mataio 6:33.
10, 11. Ia au i tei farereihia e ratou, eaha ta te mau pionie e rave rahi i ite no nia i te mana o Iehova no te horoa mai i tei hinaarohia e ratou?
10 Ua ite te mau pionie ati aˈe te ao nei, ia au i tei farereihia e ratou, e e horoa mai iho â Iehova i tei hinaarohia e te feia o tei tuu ia ratou iho i roto i to ˈna rima aupuru. A rave na i te hiˈoraa o teie nau pionie faaipoipohia o tei haere i te hoê oire iti no te tavini i te vahi e hinaaro-rahi-hia ra te feia poro i te Basileia. Tau avaˈe i muri iho, ua varavara te ohipa, e ua pau roa ˈtura ta raua moni. Tae mai nei te hoê tarahu no te paruru pereoo e 81 dala Marite. “Eita e pee ia mâua ia aufau,” o ta te taeae ïa e faatia ra. “Ua pure puai atura mâua i taua po ra.” I te poipoi aˈe, ua tae maira te hoê rata no ǒ mai i te hoê utuafare o tei fifi-atoa-hia i te pae moni. Te faataa ra te rata e ua faahoˈi mai te pu ohi tute i te hoê tino moni, e no te mea e ua hau atu i ta ratou i manaˈo, ua hinaaro teie utuafare e horoa i te tahi na teie nau pionie. Tei roto te hoê parau moni e 81 dala Marite! “Eita roa e moehia ia ˈu taua mahana ra—ua taratara roa to ˈu rouru!” o ta te taeae pionie ïa i parau. “Ua mauruuru roa mâua i te horoa maitai o teie nei utuafare.” Te mauruuru atoa nei o Iehova i teie huru hamani maitai, e tapao hoi no te aau horoa maitai o ta ˈna e faaitoito ra i ta ˈna mau tavini ia faaite.—Maseli 19:17; Hebera 13:16.
11 E rave rahi pionie o te nehenehe e faatia mai i te mau aamu mai teie te huru. A ani atu ia ratou, e na ratou e faatia mai e aita roa ˈtu ratou i ‘faarue-roa-hia.’ Ua haamanaˈo te hoê pionie e 72 matahiti, i na hau atu i te 55 matahiti i roto i te taviniraa ma te taime taatoa, e ua parau oia e: “Aita roa ˈtu o Iehova i faarue ia ˈu.”—Hebera 13:5, 6.
‘E ravea maitai roa no te haafatata ˈtu ia Iehova’
12. No te aha te ohipa faaiteraa i te parau apî maitai i riro ai ei hopoia faahiahia?
12 Ua riro to Iehova aniraa mai ia tatou ia faaite i te parau apî maitai o to ˈna Basileia, ei hopoia taa ê roa no tatou. Te faariro nei oia ia tatou—e mau taata tia ore hoi—ei mau “hoa rave ohipa” no ˈna i roto i teie ohipa faaoraraa taata. (Korinetia 1, 3:9; Timoteo 1, 4:16) Ia poro tatou i te Basileia o te Atua ia vetahi ê, ia faaite tatou e e ore te ino, ia faataa ˈtu tatou i te taata i to ˈna here faahiahia i to ˈna horoaraa mai i te hoo, ia iriti tatou i ta ˈna Parau ora e ia haapii tatou i ta ˈna mau parau faufaa rahi i te feia mafatu tia, e haafatata ˈtu iho â tatou i to tatou Poiete ra o Iehova.—Salamo 145:11; Ioane 3:16; Hebera 4:12.
13. Eaha ta vetahi e parau ra no nia i te faahopearaa o ta ratou taviniraa pionie i nia i to ratou mau taairaa e o Iehova?
13 E nehenehe ta te mau pionie e horoa e rave rahi mau hora i te mau avaˈe atoa no te haapii ia ratou iho e no te haapii ia vetahi ê no nia ia Iehova. Nafea te reira ia ohipa i nia i to ratou mau taairaa e te Atua, i to ratou manaˈoraa? “Te taviniraa pionie, e ravea maitai roa ïa no te haafatata ˈtu ia Iehova,” o ta te hoê matahiapo no Farani ïa e pahono ra, hau atu i te ahuru matahiti to ˈna taviniraa ei pionie. Te na ô ra te tahi atu pionie o taua fenua ra, 18 matahiti oia i roto i te taviniraa ma te taime taatoa, e: “Na roto i te taviniraa pionie, e nehenehe tatou e ‘tamata ia ite i te maitai o Iehova,’ e tera mahana i muri aˈe i te tahi, e patu mǎrû noa tatou i te mau taairaa puai e to tatou Poiete.” (Salamo 34:8) Hoê â manaˈo to te hoê tuahine no Beretane o tei tavini e 30 matahiti ei pionie. Te na ô ra oia e: “E tia ia ˈu ia turui i nia i te varua o Iehova no te aratai ia ˈu i roto i ta ˈu taviniraa, e na te reira e haafatata ra ia ˈu ia ˈna. E rave rahi taime to ˈu ite-papu-raa e na te varua o Iehova i aratai ia ˈu i te hoê fare i te taime tano maitai.”—A faaau e te Ohipa 16:6-10.
14. Nafea te mau pionie ia faufaahia i to ratou faaohiparaa i te Bibilia e te mau papai niuhia i nia i te Bibilia i te mau mahana atoa no te haapii ia vetahi ê?
14 E rave rahi pionie o te ite nei e, na roto i te faaohiparaa i te Bibilia e te mau papai niuhia i nia i te Bibilia, i te mau mahana atoa no te tatara e no te haapii i te mau parau mau a te mau Papai, te tauturuhia nei ratou ia tupu i te rahi i roto i te ite i te Parau a te Atua. Te faataa ra te hoê taeae no Paniora, e 85 matahiti to ˈna e e 31 matahiti to ˈna taviniraa ei pionie, e: “Ua tauturu mai te taviniraa pionie ia ˈu ia noaa mai te hoê ite hohonu i te Bibilia, e ite o ta ˈu i faaohipa no te tauturu e rave rahi mau taata ia ite ia Iehova e i ta ˈna mau opuaraa.” Te na ô ra te hoê tuahine no Beretane, e 23 matahiti to ˈna riroraa ei pionie, e: “Ua tauturu mai te taviniraa ma te taime taatoa ia ˈu ia faatupu i te hoê hiaai rahi i te maa pae varua.” E nehenehe te tatararaa ˈtu ia vetahi ê i te tumu o “te tiaturi i roto ia outou na” e haapaari i to outou manaˈo no nia i te mau tiaturiraa o ta outou e haafaufaa nei. (Petero 1, 3:15) Te na ô ra te hoê pionie no Auteralia e: “Te haamaitai nei te taviniraa pionie i to ˈu faaroo ia paraparau anaˈe au ia vetahi ê.”
15. Eaha ta e rave rahi i ineine i te rave no te haamata e no te rave tamau i te taviniraa pionie, e no te aha?
15 Papu maitai, te tiaturi papu nei teie mau tavini pionie e, ua maiti ratou i te hoê huru taviniraa o te hopoi mai i te mau haamaitairaa faito ore no ǒ mai ia Iehova ra. Eita e maerehia i te mea e e rave rahi tei ineine i te faatano i to ratou oraraa, peneiaˈe ma te faarue i te hoê toroa i roto i teie nei ao e te mau faufaa materia, no te haamata e no te rave tamau i te taviniraa pionie!—Maseli 28:20.
Te hiaai ra anei to outou mafatu i te rave hau atu â?
16, 17. (a) Mai te peu e te uiui ra outou e e nehenehe anei ta outou e riro ei pionie, eaha ta outou e nehenehe e rave? (b) Eaha ta vetahi e manaˈo ra i te mea e eita ta ratou e nehenehe e riro ei pionie?
16 I muri aˈe i te tuatapaparaa eaha ta te mau pionie e parau ra no nia i te mau haamaitairaa o te taviniraa pionie, peneiaˈe te uiui ra outou e e tano anei no outou ia rave i te taviniraa pionie. Mai te peu e e, no te aha e ore ai e paraparau atu i te hoê pionie o tei manuïa i roto i te taviniraa ma te taime taatoa? Peneiaˈe, e tauturu-atoa-hia outou na roto i te paraparauraa ˈtu i te hoê matahiapo o te amuiraa, te tahi taata o tei matau maitai ia outou—i to outou oraora-maitai-raa, to outou mau otia, e ta outou mau hopoia utuafare. (Maseli 15:22) E nehenehe te mau manaˈo huna ore o vetahi ê e tauturu ia outou ia faito maitai e e nehenehe anei ta outou e rave i te taviniraa pionie. (A faaau e te Luka 14:28.) Mai te peu e e nehenehe ta outou e riro ei pionie, e fanaˈo mau ïa outou i te mau haamaitairaa rahi.—Malaki 3:10.
17 Eaha râ no te rahiraa feia poro haapao maitai i te Basileia, eita ta ratou e nehenehe e rave i te taviniraa pionie, noa ˈtu e te hinaaro mau ra ratou e rave hau atu â i roto i te taviniraa? Ei hiˈoraa, teie te manaˈo o te hoê tuahine kerisetiano o te tutava nei i te faaamu i ta ˈna e maha tamarii o ˈna anaˈe iho. Te na ô ra oia e: “Te peapea nei au, no te mea e pionie tamau vau na mua ˈˈe, i teie nei râ, no to ˈu nei huru tupuraa, eita ta ˈu e nehenehe e haere e poro mai ta ˈu i matau na.” Te here nei teie tuahine i ta ˈna mau tamarii e te hinaaro nei oia e aupuru ia ratou. I te hoê â taime, te hiaai nei oia i te rave hau atu â i roto i te pororaa. “Mea au roa na ˈu te taviniraa,” o ta ˈna ïa e faataa ra. Tera atoa te huru manaˈo o te tahi atu mau Kerisetiano itoito e turaihia nei e to ratou here i te Atua, ia hinaaro e tavini ia Iehova ‘ma to ratou mafatu atoa.’—Salamo 86:12, MN.
18. (a) Eaha ta Iehova e ani maira ia tatou? (b) No te aha eita e tia ia tatou ia haaparuparu mai te peu e te taotia nei te mau huru tupuraa i te mea ta tatou e nehenehe e rave?
18 A haamanaˈo, te mea ta Iehova e ani maira ia tatou, o te taviniraa ïa ma te nephe atoa. Te faito e horoahia, tei te huru ïa o tera nephe e tera nephe. E nehenehe vetahi e faatano i ta ratou mau ohipa no te tavini ei mau pionie tamau. E rave rahi o te rave nei i te taviniraa pionie tauturu i tera e tera avaˈe aore ra ma te faaea ore, ma te horoa e 60 hora i te avaˈe i roto i te taviniraa. Area te rahiraa o te mau tavini a Iehova, te rave nei ïa ratou i te pororaa e te haapiiraa i te taata ma te nephe atoa ei feia poro o te amuiraa. No reira, mai te peu e ua taotia-mau-hia outou e te maˈi, te ruhiruhiaraa, te mau hopoia utuafare, aore ra vetahi atu mau tupuraa, eiaha e haaparuparu. Mai te peu e te horoa ra outou i ta outou tuhaa maitai roa ˈˈe, e mea faufaa ïa ta outou taviniraa i te aro o te Atua, mai ta te feia atoa e rave nei i te taviniraa ma te taime taatoa.
E nehenehe tatou pauroa e faaite i te huru feruriraa pionie
19. Eaha mau na te huru feruriraa pionie?
19 Noa ˈtu e eita paha outou e nehenehe e riro ei pionie, e nehenehe râ outou e faaite i te huru feruriraa pionie. Eaha mau na te huru feruriraa pionie? Ua faataa Te taviniraa o te Basileia no Tiurai 1988 e: “E nehenehe e faaauhia i te hoê haerea itoito i mua i te faaueraa e poro e e faariro i te taata ei pǐpǐ, ma te hinaaro mau e faaite i te here e te tapitapi no te taata, te raveraa i te mau haapaeraa, te oaoaraa i te pee-maite-raa i te Fatu, e te mauruururaa i te mau taoˈa pae varua, eiaha râ to te pae materia.” Nafea outou ia faaite i te huru feruriraa pionie?
20. Nafea te mau metua e nehenehe ai e faaite i te huru feruriraa pionie?
20 Mai te peu e e metua outou e e tamarii nainai ta outou, e nehenehe outou e faaitoito ia ratou ma te aau tae, ia feruri i te maiti i te taviniraa pionie ei toroa no ratou. Na roto i to outou haerea itoito i mua i te taviniraa, e taa maitai ia ratou i te faufaaraa o te faariroraa i te taviniraa a Iehova ei mea faufaa roa ˈˈe i roto i to ratou oraraa. E nehenehe outou e titau manihini i te mau pionie e te mau tiaau ratere e ta ratou mau vahine i to outou fare, ia nehenehe ta outou mau tamarii e faufaahia i te hiˈoraa o te feia o tei oaoa i roto i te taviniraa ma te taime taatoa. (A faaau e te Hebera 13:7.) I roto atoa i te mau utuafare amahamaha i te pae faaroo, e nehenehe te mau metua faaroo e tauturu i ta ratou mau tamarii, na roto i te parau e te hiˈoraa, ia faariro i te taviniraa ma te taime taatoa ei fa na ratou i roto i te oraraa.—Timoteo 2, 1:5; 3:15.
21. (a) Nafea tatou paatoa ia turu i te mau pionie? (b) Eaha ta te mau matahiapo e nehenehe e rave no te faaitoito i te mau pionie?
21 I roto i te amuiraa, e nehenehe tatou paatoa e turu ma te aau tae i te feia o te nehenehe e tavini ei pionie. Ei hiˈoraa, e nehenehe anei outou e tutava taa ê no te poro e te hoê pionie, i te mau taime iho â râ o ˈna anaˈe i roto i te taviniraa? Oia mau, e fanaˈo outou i “te hoê aitauiraa i te faaitoitoraa.” (Roma 1:11, 12, MN) Mai te peu e e matahiapo outou, e nehenehe outou e rave hau atu â no te faaitoito i te mau pionie. Ia putuputu anaˈe te tino matahiapo, e tia ia ratou ia hiˈopoa tamau i te mau mea e hinaarohia ra e te mau pionie. Ia paruparu anaˈe te hoê pionie aore ra ia farerei oia i te tahi mau fifi, eiaha ia parau oioi noa ˈtu ia ˈna ia faaea i ta ˈna taviniraa pionie. Parau mau, i roto i te tahi mau huru tupuraa, e nehenehe e faahiti i teie nei ravea, tera râ, eiaha ia moehia e ua riro te taviniraa pionie ei haamaitairaa faufaa rahi ta te tavini ma te taime taatoa e poihere rahi ra paha. Peneiaˈe te mea e hinaarohia ra, o te tahi noa ïa faaitoitoraa e te tahi aˈoraa tano maitai, aore ra te tahi tauturu. Ua papai te amaa a te Taiete i Paniora e: “Ia faaitoito anaˈe te mau matahiapo i te taviniraa pionie, ia turu ratou i te mau pionie i roto i te aua taviniraa, e ia farerei tamau ratou ia ratou, e rahi atu te oaoa o te mau pionie, e taa ia ratou e mea faufaa ratou, e e hinaaro ratou e tamau noa noa ˈtu te mau haafifiraa.”
22. I teie nei anotau fifi o te aamu taata nei, eaha te tia ia tatou ia opua papu i te rave?
22 Te ora nei tatou i te hoê anotau fifi o te aamu taata nei. Ua horoa mai o Iehova i te hoê ohipa faaoraraa taata ia rave. (Roma 10:13, 14) Noa ˈtu e e nehenehe ta tatou e apiti i roto i teie ohipa ma te taime taatoa ei pionie aore ra eita, e faaite anaˈe i te huru feruriraa pionie. Ia taa ia tatou e e tau ru teie, e e faaite anaˈe i te huru feruriraa haapae ia tatou iho. Ia opua papu tatou e horoa na Iehova i te mea o ta ˈna e ani maira ia tatou—te taviniraa ravehia ma te nephe atoa. E ia haamanaˈo noa tatou e, ia horoa tatou i te mea atoa ta tatou e nehenehe e horoa, e au i na moni iti a te vahine ivi aore ra i te monoˈi moni rahi a Maria, e taviniraa ma te nephe atoa ta tatou e rave ra, e te haafaufaa nei o Iehova i ta tatou taviniraa ravehia ma te nephe atoa!
Te haamanaˈo ra anei outou?
◻ No te aha te taviniraa ma te taime taatoa e faatupu ai i te mauruuru e te oaoa?
◻ Ia au i tei farereihia e ratou, eaha ta te mau pionie e rave rahi i ite no nia i te mana o Iehova no te haapao i ta ˈna mau tavini?
◻ Te manaˈo nei te mau pionie e te faatupu ra ta ratou taviniraa i teihea mau faahopearaa i nia i to ratou mau taairaa e o Iehova?
◻ Nafea outou e nehenehe ai e faaite i te huru feruriraa pionie?
[Hohoˈa i te api 23]
E oaoa rahi to te mau pionie i te faariroraa i te taata ei pǐpǐ
[Hohoˈa i te api 23]
E nehenehe ta outou mau tamarii e faufaahia i te amuimuiraa ˈtu e te feia poro i te Basileia ma te taime taatoa
[Hohoˈa i te api 23]
E nehenehe te mau matahiapo e faaitoito i te mau pionie i roto i te aua taviniraa