Te mau haamaitairaa o te taviniraa pionie
1, 2. I teihea mau haamaitairaa i taai-piri-hia ˈi te taviniraa pionie, e no te aha?
1 “Ua ite au e aita ˈtu e ohipa e horoa mai i te mauruuru i te tufaraa i te parau mau na vetahi ê,” o ta te hoê ïa pionie i parau. Ua na ô te hoê tuahine pionie e: “I te hopea o te mahana taitahi, e maitai to ˈu taoto, e e î to ˈu aau i te oaoa.” Te faaite nei teie mau pionie i te mau huru aau o te mau taeae e tuahine e rave rahi o te ao atoa nei o tei tamata i te mau haamaitairaa o te taviniraa pionie.—Mas. 10:22.
2 E horoa te tautururaa ia vetahi ê ia noaa te ite faaora o te Parau a te Atua i te mauruuru mau. (Ohi. 20:35; Tes. 1, 2:19, 20) “E mea oaoa e te faaitoito no te faaroo ia ite i te puai o te Parau a te Atua i te turairaa i te taata ia taui i to ratou oraraa,” o ta te hoê ïa taeae pionie taime roa i papai. Inaha, i to ratou haavataraa ia ratou no te tauturu i te mau taata e no te faatere i te mau haapiiraa bibilia, te faatupu ra te mau pionie i te mau ravea e fanaˈo ai ratou i te mau haamaitairaa mai te reira.
3, 4. No te aha te taviniraa pionie e haapii ai i te turui i nia ia Iehova, e nafea te reira e tauturu ai ia paari i te pae varua?
3 E turui i nia ia Iehova: I te mea e te ani nei ratou i te varua o te Atua i te mau mahana atoa no te rave i ta ratou taviniraa, e faahotu ohie aˈe te mau pionie ‘ta te varua e faatupu ra,’ o tei riro atoa ei paruru no ratou. (Gal. 5:16, 22, 23) Hau atu â, i te mea e te faaohipa pinepine nei ratou i te Parau a te Atua, e pinepine te mau pionie i te aravihi i te faaohipa i te mau Papai no te paruru i te parau mau e no te haapuai ia vetahi ê. (Tim. 2, 2:15) Ua parau te hoê taeae pionie e mau ahuru matahiti i te maoro i te taviniraa e: “Ua tauturu te taviniraa pionie ia ˈu ia noaa te hoê ite hohonu i te Bibilia, e ite o ta ˈu i faaohipa no te tauturu e rave rahi taata ia ite ia Iehova e i ta ˈna mau opuaraa.” Tera tei horoa mai i te mauruuru hohonu!
4 E mea tia atoa ia turui te mau pionie tamau i nia ia Iehova i roto i te tahi atu â mau tuhaa. E paari to ratou faaroo ia ite ratou i te haamaitairaa rahi o ta ratou mau tutavaraa e haapao i to ratou mau hinaaro. “Aita roa ˈtu o Iehova i faarue noa ˈˈe ia ˈu,” o ta te hoê ïa taeae e 72 matahiti, e pionie e 55 matahiti i te maoro e haapapu ra. Hau atu â, ma te ora i te hoê oraraa haehaa, te paruru nei te mau pionie ia ratou i te haapeapearaa e rave rahi o te oraraa. E ere anei i te mea hinaarohia?—Mat. 6:22; Heb. 13:5, 6.
5. E nafea te taviniraa pionie e tauturu ai ia haafatata ˈtu ia Iehova?
5 E haafatata i te Atua: E mau mea faufaa aˈe to tatou mau taairaa e o Iehova. (Sal. 63:3) Ia apiti hope tatou i roto i te taviniraa, no to tatou here ia Iehova, e piri roa ˈtu â taua mau taairaa ra. (Iak. 4:8) Ua parau te hoê taeae pionie e hau atu i te 18 matahiti i te maoro e: “E tauturu te taviniraa pionie ia tatou ‘ia tamata e ia ite i te maitai o Iehova,’ e ia faatupu i te mau mahana atoa i te mau taairaa paari aˈe e to tatou Atua Poiete.”—Sal. 34:8.
6. E tia i te mau pionie ia noaa te aha, e o vai, taa ê atu ia ratou, o te huti nei i te mau maitai o te feruriraa ta ratou e faatupu ra?
6 Aita noa te mau pionie i titauhia ia faatano i to ratou tupuraa, e mea titau-atoa-hia râ te hoê faaroo puai, te hoê here mau i te Atua e i to ratou taata-tupu, e ia ineine i te rave i te mau haapaeraa. (Mat. 16:24; 17:20; 22:37-39) Teie râ, te haapapu ra te hohoˈa mata oaoa o te mau pionie e e hau ê te mau haamaitairaa o te taviniraa pionie i te mau mea atoa. (Mal. 3:10) E ere noa no te mau pionie tera mau haamaitairaa: e huti atoa to ratou utuafare e ta ratou amuiraa i te mau maitai rahi o te feruriraa nehenehe ta ratou e faatupu ra.—Phil. 4:23.