Te mau tiaau o te aratai nei ia tatou: te tiaau no te taviniraa
1 E anaanatae rahi te tiaau no te taviniraa i te mau haereraa i mua o te ohipa poro evanelia i roto i te tuhaa fenua a te amuiraa. E tuhaa faufaa ïa ta ˈna e rave no te tauturu ia tatou ia amo i ta tatou hopoia e poro i te parau apî maitai. E faanahonaho teie taeae poro evanelia itoito i te mau ohipa atoa i taaihia i te pororaa. I te mea hoi e e taata aravihi oia no te horoa i te haapiiraa, e tauturu ïa oia i te feia poro ia riro ei feia aravihi atu â i roto i te taviniraa.—Eph. 4:11, 12.
2 Na teie matahiapo e tiaau i te mau ohipa i horoahia i te mau tavini tauturu haapao i te mau buka, te mau vea e te mau tuhaa fenua. E tia ia ˈna ia ara i te mau avaˈe atoa e ia navai maitai ta tatou mau buka, mau vea e te tahi atu mau papai no te pororaa. Hoê taime i te matahiti, e hiˈopoa oia i roto i te haapueraa tuhaa fenua e teihea mau vahi ua opanihia ia haere, e e ani oia i te mau taeae aravihi ia haere i reira.
3 E tia i te tiaau no te taviniraa ia faanahonaho i te mau huru taa ê o te pororaa, te pororaa iho â râ i te mau vahi raveraa ohipa, i roto i te aroâ e na roto i te niuniu paraparau. E ara oia i te faanaho i te mau putuputuraa ohie no te pororaa i te hebedoma, e tae noa ˈtu i te mau tau faaearaa haapiiraa. E anaanatae rahi oia i te mau haapiiraa Bibilia. E tutava oia i te horoa i te tauturu i te pae varua i te feia aita e haere tamau ra aore ra aita e ohipa faahou ra i roto i te taviniraa. E anaanatae rahi oia i te taviniraa a te mau pionie e e faatere oia i te porotarama ra Te tauturu nei te mau pionie ia vetahi ê.
4 I te mea hoi e e melo atoa oia no te tomite no te taviniraa a te amuiraa, e pûpû te tiaau no te taviniraa i te mau tauiraa e titauhia ra i roto i te mau pǔpǔ haapiiraa buka. Ia haere mai oia i roto i ta tatou haapiiraa buka, eiaha tatou e mairi e e poro tatou na muri iho ia ˈna.
5 E tia i te mau melo atoa o te amuiraa ia turu amui ma te aau tae i te mau faanahoraa i ravehia e te tiaau no te taviniraa. E riro te reira i te faaaravihi atu â ia tatou i roto i te ohipa e faariro i te taata ei pǐpǐ e i te ite i te oaoa rahi atu â i roto i ta tatou taviniraa.