E poro anaˈe i te vahi e tei reira te taata
1 I to Paulo fariiraa i te tuhaa i ravehia e te varua o te Atua i roto i ta ˈna taviniraa, ua parau oia e: “Na te Atua râ i faatupu.” E ua farii atoa oia e: “E hoa rave ohipa hoi matou no te Atua.” (Kor. 1, 3:5-9) E haamaitairaa faahiahia mau teie. E nafea râ tatou ia faaite i te mau taata e te mauruuru maitai nei tatou i teie hanahana rahi ia riro ei hoa rave ohipa no te Atua? Na roto ïa i te faaiteraa i te parau apî maitai i te mau taata atoa ta tatou e farerei nei i roto i te pororaa i tera fare e tera fare e i te vahi ê atu.
2 Ua faauehia tatou ia ‘faariro i te taata ei pǐpǐ.’ (Mat. 28:19) Mai te peu e, i roto i te taviniraa, e mea iti te taata ta tatou e paraparau atu, e nehenehe hoi tatou e rohirohi oioi noa ma te manaˈo e e mea iti roa te ohipa e ravehia ra. Tera râ, mai te peu e e manuïa tatou i te farerei e rave rahi taata e i te aparau atu ia ratou, e oaoa rahi ïa te noaa mai ia tatou i roto i te taviniraa. Te titau ra te reira ia tatou te mau tutavaraa, i te mea ra e e tia ia tatou ia haere atu i te vahi e tei reira hoi te taata no te farerei atu ia ratou.
3 Te mau hiˈoraa faaohipahia: E nehenehe tatou e poro i te matete, i roto i te mau aua e i te mau vahi tapearaa pereoo mataeinaa. Ia rave anaˈe tatou i te pereoo mataeinaa, ua faaineine anei tatou no te tauaparau i te taata? I roto i te hoê pereoo mataeinaa î roa i te taata, te haere ra e piti na Ite i te vahi putuputuraa no te pororaa, e ua tauaparau atura raua no nia i te hoê hohoˈa o te buka ra Te Ite no nia i te Paradaiso e te mau parau tǎpǔ a te Atua no te tau a muri atu. Mai ta raua i manaˈo, ua tauaparau atoa maira te hoê taurearea e parahi ra i pihai iho ia raua. Ua putapû aˈera o ˈna i te mea o ta ˈna i faaroo, e hou aˈe i pou atu ai, ua farii oia i te buka e ua ani ia farereihia o ˈna i to ˈna fare.
4 E rave rahi feia poro e oaoa nei i roto i te pororaa faanaho-ore-hia. I te hoê avatea, ua haere te hoê tuahine i te hoê fare toa rahi e ua tauaparau atura i te mau taata e ua oti aˈena i te hoohoo haere, tera râ aita ratou e ru ra no te hoˈi. Ua vaiiho atu o ˈna i te mau buka atoa e vai ra i roto i ta ˈna pute. Ua farii maira te hoê taata e parahi noa ra i roto i to ˈna pereoo ma te oaoa i te mau vea ta ˈna i pûpû atu na ˈna. I haere na o ˈna i te mau putuputuraa i te matamua, e na roto i ta raua aparauraa, ua anaanatae faahou oia.
5 E haamaitairaa rahi mau te arueraa i te iˈoa o Iehova. Na roto i te itoito i roto i te pororaa, e faaite ïa tatou e aita roa tatou i erehia i te tapao o te hamani maitai o te Atua ia tatou nei. “Inaha, teie taua anotau au ra” no te tauturu ia vetahi ê; e haere anaˈe ïa tatou i te vahi tei reira te taata ma te faaite atu ia ratou i te parau no nia i “taua mahana faaoraraa ra.”—Kor. 2, 6:1, 2.