E imi anaˈe na i te mau taata i farii maitai na roto i te pororaa faanaho-ore-hia

¹ Ua faaue Iesu i ta ˈna mau pǐpǐ ia imi i te feia e au ia faaroo i te parau apî maitai o te Basileia (Mat. 10:11). Tera râ, i roto e rave rahi vahi, te fifi noa ˈtura ia farerei i te mau taata i to ratou fare. No reira, nafea ia farerei i te feia e au ia porohia e tei vaiihohia paha i te hiti?

² E nehenehe te pororaa faanaho-ore-hia e riro ei huru raveraa maitai no te farerei i te mau taata ta tatou i ore i ite i roto i te pororaa i tera e tera fare. E nehenehe tatou e poro i te mau vahi tapearaa pereoo mataeinaa, i pihai iho i te mau fare tahua rarahi e tiai-maitai-hia ra, te mau vahi hopuraa miti e te mau vahi e haere-rahi-hia ra e te taata.

³ Te mǎtaˈu rii ra vetahi ia faahitihia te parau o te pororaa faanaho-ore-hia. E nehenehe ratou e tapea ia ratou no te mea mea mamahu ratou aore ra e manaˈo ratou e e auauhia ratou e te feia e ore e au i te poroi o te Basileia. I te rahiraa o te taime, aita teie mau mǎtaˈu i tano. Ua parau te feia i aravihi i roto i taua taviniraa ra e e ere te reira i te mea fifi aˈe i te pororaa i tera e tera fare. Tera râ, ua tapao ratou e ua matau te rahiraa o te mau taata i te haamata i te paraparau no te mau tumu huru rau; mea ohie aˈe no vetahi e aparau aore ra e faaroo, eiaha râ i ǒ ratou. No reira, mai te peu e e ‘itoito’ to tatou no taua ohipa ra, e ite paha tatou i te mau huru tupuraa oaoa.—Tes. 1, 2:2.

⁴ Nafea ia apiti atu i roto i taua ohipa ra ma te manuïa? Mea faufaa ia faaineine maitai ia tatou. Na mua ˈˈe, e taio tatou i te mau vea iti e e maiti tatou hoê aore ra e piti tumu parau o te aparauraa o te nehenehe e faaanaanatae i te mau taata. E tano noa te hoê faaiteraa e 30 tetoni te maororaa. No te mea hoi e te tumu, o te faatupuraa ïa i te taairaa e te taata, e tamata tatou i te hiˈo atu ia ˈna ia paraparau tatou. E faaite anaˈe na i te mahanahana, te auhoa e te huna ore ia haamata tatou i te aparauraa. I te tahi mau taime, mai te peu e e farii mai te taata, e faaau atu tatou i te mau vea iti. Mai te peu e eita o ˈna e hinaaro, e nehenehe tatou e pûpû atu i te hoê api parau iti.

⁵ Ua rau te huru o te mau tumu parau e itehia ra i roto i te mau parau apî o te mau mahana atoa. E tano maitai ia aparauhia ma te au no nia i te mau tamaˈi, te mau patoiraa, te parururaa i te natura. Te manaˈo ra vetahi e e navai noa ia taio i te hoê buka bibilia i te vahi taata e ia tiai na te mau taata e haere mai e uiui. Parau mau, ua tupu aˈena teie mau huru pororaa. E tia râ ia tatou ia haamata i te aparauraa. E tia ia tatou ia ite oioi i te mau mea e faaanaanatae ra i te mau taata e faaroo maira.

⁶ I te rahiraa o te taime, i roto i ta tatou faaiteraa poto, mea au aˈe ia tuu i te hoê uiraa aore ra ia faahiti i te mau parau e huti mai i te ara-maite-raa. Mai te peu e e farii maitai te taata, e tamata tatou i te tapao i to ˈna iˈoa, to ˈna vahi faaearaa e ta ˈna numera niuniu atoa paha no te tapea maite i to ˈna anaanatae. E nehenehe tatou e parau e: “Mai te peu e e hinaaro oe e haapii hau atu â, e oaoa vau i te hoˈi faahou mai e farerei ia oe, aore ra e ani au i te hoê Ite ia haere mai e hiˈo ia oe.”

⁷ I roto i te pororaa faanaho-ore-hia, ua farerei te hoê matahiapo i te hoê vahine tei ore aˈenei i paraparau e te mau Ite i to ˈna fare. Ua rave oia i te hoê buka e ua farii oia ia haere mai te hoê tuahine e farerei ia ˈna, ia au i te hoê hora e tano ia ˈna. Ia poro tatou ma te manuïa, mea papu e e farerei tatou e rave rahi taata e au ia porohia te parau apî maitai e e tauturu atu tatou ia ratou.—Ohipa 17:17.