E haamauruuruhia te taiva-ore-raa
1 I roto i te Hebera 11:6, te taio nei tatou e, o te Atua “te [“haamauruuru,” MN] i te feia i imi papu ia ˈna ra.” Oia mau, e haamauruuru o ˈna i ta ˈna mau tavini itoito o tei ‘haapao maitai i tena na taoˈa iti haihai’ na roto i te ‘faatiaau atu i nia iho i te mea rahi.’ (Mat. 25:23) I te tahi atu parau, no te haamauruuru i ta ˈna mau Ite taiva ore no ta ratou ohipa maitai i rave na, e pinepine o Iehova i te horoa faahou atu na ratou i te mau haamaitairaa apî o te taviniraa.
2 No te haamauruuru ia ˈna i to ˈna taiva-ore-raa, ua horoahia maira i te aposetolo Paulo te hoê taviniraa o tei aratai ia ˈna i te mau oire e te mau oire rii no Europa e no Asia iti. (Tim. 1, 1:12) Noa ˈtu ta ˈna mau tutavaraa rahi no te rave faahope roa i teie taviniraa, ua haafaufaa rahi o Paulo i te haamaitairaa i horoahia mai ia ˈna. (Roma 11:13; Kol. 1:25) Na roto i ta ˈna taviniraa itoito mau, ua faaite papu mai o ˈna e te faaohipa ra oia i to ˈna faaroo. Te faaitoito maira to ˈna hiˈoraa ia tatou e ia haafaufaa rahi tatou i ta tatou mau haamaitairaa o te taviniraa.
3 Ua horoa mai o Iehova ia tatou te hoê taviniraa: Nafea tatou ia faaite e te faaau nei tatou i teie haamauruururaa, aore ra teie haamaitairaa, mai ia Paulo atoa? E imi ïa tatou i te mau ravea atoa no te faarahi i ta tatou nei tuhaa i roto i teie taviniraa. E imi atoa tatou i te mau tupuraa no te faaite i te parau i te taime faanaho-ore-hia e i tera fare e tera fare. E hoˈi faahou tatou e farerei i te mau taata aita i te fare, e e hoˈi atoa e farerei i te mau taata i anaanatae mai. Oia atoa, e faatura tatou i te mau taime farereiraa i faanahohia no te mau haapiiraa Bibilia.
4 No te parau o te taviniraa, te faaitoito nei o Paulo e: “Ia onoono maite â.” (Tim. 2, 4:2) Te parau no te onoono-maite-raa, mai te tuuraa ïa i te tapao i nia i te hoê mea. Te tuu ra anei tatou i te tapao i nia i te taviniraa ei tuhaa matamua o to tatou oraraa nei? Ei hiˈoraa, eita tatou e vaiiho i te mau peu faaanaanataeraa e vetahi atu â mau ohipa o te hopea hebedoma ia rave i te taime faanahohia no te pororaa. No te mea e ua papu ia tatou e te oioi mai nei te hopea o teie faanahoraa o te mau mea, e papu atoa ia tatou e, o te pororaa i te parau apî maitai o te Basileia te ohipa faufaa roa ˈˈe te tia ia tatou ia rave.
5 E itehia to tatou taiva-ore-raa i te Atua na roto i te tamau-noa-raa i te rave i te ohipa i faauehia mai ia tatou nei. E rave faahope roa anaˈe i ta tatou taviniraa e na Iehova e haamauruuru rahi mai i to tatou taiva-ore-raa.