Ia tamau noa tatou i te faaite i te parau mau
1 Ua faaite te mau aposetolo e: “E ore hoi matou e tia ia ore ia parau i ta matou i hiˈo aˈenei, e ta matou i faaroo aˈenei.” (Ohi. 4:20) I teie atoa mahana, e tia ia tatou ia tamau noa i te faaite i te parau mau. Parau mau, ua riro te opereraa i Te Pare Tiairaa e te A ara mai na! ei ravea ia itea mai i te feia e faaroo mai, tera râ, mai te peu e e hinaaro tatou e faaite hau atu â i te taata tei anaanatae i te parau mau, e tia ia tatou ia hoˈi atu e farerei ia ratou.
2 Mai te peu e ua vaiiho tatou i te “A ara mai na!” o te avaˈe mati, “Ereraa i te ohipa—Te vai ra te ravea,” e nehenehe tatou e tamata i teie omuaraa parau ia hoˈi atu tatou e farerei i te taata:
◼ “Te haamanaˈo ra paha oe e ua tauaparau tâua no nia i te ravea no te faatitiaifaro i te ereraa i te ohipa. Ua tuea maitai ïa te reira e te parau tǎpǔ a te Atua i roto i te Isaia 65:21-23. [A taio e a tatara ˈtu i teie irava.] I roto i te Bibilia, e rave rahi atu â mau parau tǎpǔ no nia i te oraraa o te huitaata nei no a muri aˈe.” A faaite atu i te faufaaraa ia haapii tamau i te Bibilia. A pûpû atu i te hoê haapiiraa bibilia i te fare o te taata i nia i te buka ra Te ite.
3 Mai te peu e ua parau atu tatou i te taata e hoˈi mai tatou no te faataa e nafea ia noaa i teie nei iho i te ite mau na roto i te Bibilia, e nehenehe tatou e parau e:
◼ “I to tâua farereiraa i te taime i mairi aˈenei, ua faaite atu vau i te hoê irava o te Bibilia e horoa maira i te tumu papu e tiaturi ai tatou i te oraraa o te taata no a muri aˈe. I teie mahana, te hinaaro nei au e huti i to oe ara-maite-raa i nia i te tahi mea e faaite ra e o vai te nehenehe e horoa mai i te peapea ore i teie nei iho.” A taio i te Salamo 4:8. A tatara i te buka Te ite i te api 168 e a taio i te paratarapha 19. A ani atu: “E hinaaro anei oe e haapii i te Bibilia i to oe iho fare ma te tamoni ore? E faaite papu mai teie haapiiraa ia oe e nafea atoa oe ia fanaˈo i taua peapea ore ra i roto i to oe oraraa.” Mai te peu e e farii oia, a tatara i te buka i te pene 1.
4 Mai te peu e ua vaiiho tatou i te vea taa ê o te “A ara mai na!” no eperera, “Ia ore roa te mau tamaˈi,” e nehenehe tatou e faaineine no te haamata i te hoê haapiiraa bibilia ma te ani e:
◼ “I te taime i mairi aˈenei, ua tauaparau tâua no nia i te mau tamaˈi e te tuhaa a te mau haapaoraa i roto i te mau aroraa na te ao nei. Te haapapu maitai ra teie mau ohipa e te ora nei tatou i te tau ta te Bibilia e parau ra, te mau mahana hopea; ua ite anei oe i te reira? [A rave mai i te buka ra Te ite. A taio i te paratarapha matamua o te pene 11, e a faataa ˈtu i te tumu parau tarenihia i te api 102.] Te tuatapapa ra teie buka i teie tumu parau e e 18 tumu parau ê atu. Teie te tabula tumu parau. [A faaite i te api 3.] Mai te peu e e farii oe, te hinaaro nei au e faaite ia oe nafea teie buka ia tauturu ia oe ia noaa i te maramarama no nia i teie mau uiraa bibilia faufaa roa.” Mai te peu e e farii te taata, a haamata i te haapiiraa i te api 6.
5 E nehenehe tatou e pûpû roa ˈtu i te haapiiraa ia hoˈi atu tatou e farerei i te taata ma te parau e:
◼ “Te opere nei matou i ta matou mau vea na te ao atoa nei no te haamaramarama i te taata atoa no nia i ta te Bibilia e haapii ra. Mai te peu e e farii te hoê taata i teie mau haamaramaramaraa, e pûpû atu matou i te hoê haapiiraa bibilia tamoni ore i to ˈna fare. [A faaite i te tumu parau tarenihia ‘E farii anei outou i te hoê farereiraa?’ i te api hopea o Te Pare Tiairaa.] Te faaohipa nei matou i teie buka, Te ite e aratai i te ora mure ore. Mai te peu e e farii oe, e nehenehe vau e faaite ia oe maa taime iti noa e nafea teie haapiiraa ia faaterehia.”
6 Mai te peu e e tamau noa tatou i te faaite i te parau mau, e papu ia tatou e e itea mai ia tatou i te feia e faaroo mai e te farii popou atoa.—Mar. 4:20.