E pee anaˈe i to ratou faaroo
1 Ua faataa te aposetolo Paulo i te faaroo mai ‘te tiaturi i te mau mea e tiaihia nei, e te ite i te mau mea aore e hiˈohia nei.’ ‘Aore e faaroo ra e ore roa ïa te Atua e mauruuru,’ o ta ˈna ïa i parau faahou. (Heb. 11:1, 6) Ua aˈo mai Paulo ia tatou ia î, ia faatupu e ia tapi i te faaroo.—Kor. 2, 4:13; Kol. 2:7; Tim. 2, 2:22.
2 E rave rahi hiˈoraa faahiahia o te faaroo i roto i te Bibilia. I roto i te Hebera pene 11, te hohora ra Paulo i te hoê anairaa roa o te mau ite tei tapea i to ratou faaroo i mua i te mau tamataraa atoa. O Abela te tahi, te taata matamua tei haapohehia no to ˈna faaroo. Ua faahitihia o Noa, no te mea, na roto i to ˈna faaroo, ua faaite oia i te mǎtaˈu i te Atua faufaa roa hoi no te faaora i to ˈna utuafare. Ua haamaitaihia o Aberahama no to ˈna faaroo e to ˈna auraro. O Mose atoa, no te mea na roto i to ˈna faaroo, ua mau papu oia i te hiˈoraa ˈtu i Tei ore e itea ia hiˈo. Te na ô ra Paulo e no te rahi o teie mau hiˈoraa e ore e navai te taime ia faatia pauroa mai o ˈna i te mau mea no nia ia ratou. Auê ïa tatou i te mauruuru i te neheneheraa e haapuai i to tatou faaroo na roto i te hiˈopoaraa i teie mau ohipa “haapao maitai” e teie mau ohipa “paieti”!—Pet. 2, 3:11.
3 I te senekele I, ua ani Iesu i teie uiraa: “Ia tae mai râ te Tamaiti a te taata nei, te vai ra anei te faaroo i te fenua nei?” (Luka 18:8) A tae hoi e, te vai ra anei i rotopu ia tatou, i teie mahana, te mau hiˈoraa ora no te faaroo? Te ite ra anei tatou i te mau tane e te mau vahine, apî e ruhiruhia, o te faaite ra i te hoê faaroo aueue ore no Iehova, mai te mau tavini o te Atua atoa i te mau tau Bibilia?
4 Te mau hiˈoraa o te faaroo i teie tau: Aita tatou e erehia ra i te mau hiˈoraa faahiahia o te faaroo na pihai iho ia tatou nei! E tia mau â ia peehia te hiˈoraa o te faaroo o te mau tiaau e aratai nei ia tatou. (Heb. 13:7) Tera râ, e ere o ratou anaˈe te horoa ra i te hoê hiˈoraa maitai o te faaroo. Te vai ra i roto i te mau amuiraa atoa te mau melo haapao maitai o te rohi noa ra i roto i ta ratou taviniraa no Iehova e mea maoro i teie nei, e mea pinepine i roto i te mau haafifiraa.
5 E mea faahiahia atoa to tatou mau tuahine haapao maitai o te faaruru ra, mai te mau matahiti mai â, i te patoiraa a ta ratou mau tane farii ore. Ua amo paha vetahi mau metua tane e vetahi mau metua vahine, o ratou anaˈe, i te hopoia e haapii i ta ratou mau tamarii. Te vai atoa ra te mau vahine ivi ruhiruhia i rotopu ia tatou, o te apiti noa ra i roto i te mau ohipa atoa a te amuiraa, e area no vetahi aita e utuafare no te tauturu ia ratou. (Hiˈo Luka 2:37.) Te maere noa nei tatou i te faaroo o te feia e faaruru ra i te mau maˈi tamau. Te tavini noa ra e rave rahi ma te haapao maitai noa ˈtu eaha te mau taotiaraa o te haafifi ra ia ratou ia fanaˈo i te tahi mau haamaitairaa teotaratia taa ê hau atu â. Ua faatupu vetahi mau taurearea Ite i te faaroo noa ˈtu te patoiraa i te fare haapiiraa. Te rahi noa ˈtura to tatou paieti i te Atua a hiˈo noa ˈi tatou i te mau pionie haapao maitai o te tamau noa ra i tera matahiti e tera matahiti, ma te faaruru i te mau fifi rahi mau. Mai ia Paulo, e ore e navai to tatou taime mai te peu e e tia ia tatou ia faatia pauroa i te oraraa o teie mau taeae e mau tuahine i roto i te taviniraa no te Basileia, te mau ohipa faaroo atoa o ta ratou i rave!
6 Te horoa maira teie mau hiˈoraa o te faaroo i te tamahanahanaraa e te faaitoitoraa. (Tes. 1, 3:7, 8) Ua tano tatou i te peeraa i to ratou hiˈoraa, no te mea “te feia râ e rave i te parau mau ra te au ra [Iehova] ia ratou.”—Mas. 12:22.