“Na te ite maori e noaa ˈi te faaroo”
1 Ia farerei anaˈe tatou i te hoê taata e “haerea fariihia [to ˈna] no te ora mure ore” e titauhia ia haapaari i to ˈna tiaturi i roto i te mau mea o ta ˈna i faaroo. (Ohi. 13:48, MN; Roma 10:17) No te na reira, e tia ia tatou ia hoˈi e farerei i te feia tei rave i te mau vea, no te afai atu i te mau vea hopea e e faahaere â te aparauraa i mua. E nehenehe tatou e pûpû i te tamatahitiraa i te feia e anaanatae ra ma te aau rotahi. Teie râ, ia haamau tatou i te tapao e haamata i te hoê haapiiraa i nia i te buka ra Te ite e aratai i te ora mure ore. E nehenehe teie mau manaˈo i muri nei e tauturu ia tatou:
2 Mai te peu e e hoˈi tatou e farerei i te hoê taata o ta tatou i paraparau atu no nia i te tumu parau ra “E arue anaˈe i te Arii mure ore!,” e nehenehe tatou e haamata mai teie e:
◼ “I ta tâua aparauraa i mairi aˈenei, ua faahiti tâua i te tahi mau haapapuraa e ore e tia ia faahapa e te vai ra te hoê Atua Mana hope. Teie râ, eita e navai noa ia ite e te vai ra o ˈna. E tia ia tatou ia ite i to ˈna iˈoa. Nafea oe ia pii i te Atua? [A vaiiho i te taata ia pahono.] Te pii noa nei e mau mirioni taata ia ˈna ra ‘Fatu’ aore ra ‘Atua.’ E mau tiaraa noa teie no ˈna. Area ra te Atua, te hinaaro nei oia e ia ite tatou i to ˈna iˈoa. [A taio i te Salamo 83:18.] Te haapii maira te Bibilia ia tatou hau atu â no nia i te Atua ra o Iehova; o ta teie buka ïa e faataa ra.” E faaite tatou i te hohoˈa i te api 29 o te buka ra Te ite, e e taio i te pereota i raro aˈe mai i te hohoˈa. I muri iho, e hiˈopoa tatou i na paratarapha matamua e toru o te pene 3; ua haamata ïa tatou i te hoê haapiiraa!
3 Mai te peu e ua faaite tatou i te tumu parau ra “No te aha te mau haapaoraa o te ao nei e mou ai,” e nehenehe tatou e atuatu i te anaanatae ma te parau e:
◼ “I to oe taioraa i te tumu parau, peneiaˈe ua maere oe i te mea e eita ta tatou e nehenehe e manaˈo e hoê â pauroa te mau haapaoraa atoa. Te vai ra te haapaoraa mau e te haapaoraa hape. No reira ïa tatou e uiui ai ma te tano: teihea haamoriraa ta te Atua e farii? Ua horoahia te pahonoraa e Iesu, e te haamatarahia ra i roto i teie buka.” E huri tatou i te buka ra Te ite i te pene 5 e e taio tatou i te paratarapha 4, o te faahiti ra i te Ioane 4:23, 24. E ani tatou i muri iho e: “E hinaaro anei oe e tuatapapa i te Bibilia i to oe fare, ma te tamoni ore?” Mai te peu e te pahonoraa e, E, e huri tatou i te buka i te pene 1 e e haamata anaˈe i te haapiiraa.
4 Mai te peu e ua anaanatae te taata i te “A ara mai na!” o te 8 no eperera, e nehenehe ïa tatou i te farereiraa i muri iho e tamata i teie omuaraa parau no te haamata i te hoê haapiiraa bibilia i nia i te buka ra “Te ite”:
◼ “Te haamanaˈo ra paha oe i ta tâua aparauraa no nia i te mau ravea e itea mai ai i te hoê mahana, i te hoê ao aita e tamaˈi faahou. E mea fifi ia feruri e mai teihea mau na teie huru ao. Teie te tahi hohoˈa. [A faaite i te hohoˈa i te mau api 188-9 o te buka ra Te ite.] E ere anei mea faahiahia roa ia ora i roto i teie huru vahi? [A huri te buka i te mau api 4 e 5, a faaite i te hohoˈa e a taio i te tumu parau tarenihia.] No roto mai te upoo parau o teie buka i te mau parau a Iesu i roto i te Ioane 17:3. [A taio i teie irava.] Mai te peu e e faatia oe, e hinaaro vau e faaite ia oe e nafea ia faaohipa i teie buka e ta oe Bibilia ia noaa mai taua ite faufaa ra.” Mai te peu e e farii te taata, e haamata anaˈe ïa i te haapiiraa i nia i te pene matamua.
5 Mai te peu e ua farerei tatou i te hoê taata e ohipa ta ˈna i to tatou tere matamua, e nehenehe tatou e parau ia ˈna e:
◼ “Ua farerei tâua aita i maoro aˈenei e ua vaiiho mai au i ta matou mau vea Te Pare Tiairaa e te A ara mai na! Te faaitoito nei teie mau vea ia tatou ia faatura i te Bibilia e i ta ˈna mau faaueraa tumu i te pae morare. No te mea hoi, te manaˈo nei au e mea faufaa no tatou tataitahi ia taa i te Parau a te Atua, ua hoˈi faahou mai au no te faaite ia oe i te tahi mea o te tauturu ia oe.” E rave mai tatou i te buka ra Te ite e e faaite tatou i te tabula o te mau tumu parau i te api 3. E ani tatou i te taata teihea pene ta ˈna e anaanatae roa ˈˈe, e huri tatou te buka i taua pene ra e e haamata anaˈe i te haapiiraa.
6 E rahi to tatou oaoa mai te peu e e manuïa tatou i te ‘iriti i te uputa o te faaroo no vetahi ê’ o te aratai i te ora mure ore.—Ohi. 14:27; Ioa. 17:3.