Te mau hoˈi-faahou-raa e farerei o te faaora i te mau taata
1 Te hinaaro o te Atua, oia hoi ‘ia ora te mau huru taata atoa e ia noaa ia ratou te hoê ite papu o te parau mau.’ (Tim. 1, 2:4) Eaha ta tatou e nehenehe e rave no te tauturu atu? A hoˈi faahou e farerei i te taata e te tapao e haapii atu i te parau mau. Nafea ïa tatou? E nehenehe te mau manaˈo i muri nei e tauturu ia tatou.
2 Ia hoˈi faahou tatou e farerei i te hoê taata o tei farii i te buka “Te hau e te ino ore mau—No hea mai ïa?” e nehenehe tatou e faaite faahou i te hohoˈa o te api 4 e e ani atu i te taata o ta tatou e aparau ra e:
◼ “I teie nei e ua taio oe i te buka o ta ˈu i vaiiho atu ia oe e ua ite oe e ua tǎpǔ te Atua e e haamau oia i te Paradaiso i nia i te fenua, eaha to oe mau manaˈo hohonu no nia i teie mau parau tǎpǔ faahiahia tei ravehia no te huitaata?” A haapao i te pahonoraa a te taata e a tauaparau poto noa no nia i te reira, e a huti i te ara-maite-raa i nia i te mau pene 2 e te 3. A parau atu i muri iho e e hiˈopoa tatou e o ˈna i te tumu i ore ai te mau tutavaraa a te taata (e tae noa ˈtu a te feia o te haafaufaa nei i te faaroo) no te haamau i te hau e te ino ore i manuïa.
3 Mai te peu e e hoˈi faahou tatou e farerei i te hoê taata o ta tatou i vaiiho atu i te tere na mua ˈtu i te hoê uiraa no nia i te tumu e faatia noa ˈi te Atua i te ino, e nehenehe tatou e haamata i te tauaparauraa mai teie:
◼ “Ua au roa vau i ta tâua tauaparauraa i te taime i mairi aˈenei, e ua hoˈi faahou mai au no te ite eaha to oe manaˈo no nia i te tumu e faatia noa ˈi te Atua i te mau arepurepu e te haavîraa uˈana e tupu ra i roto i teie nei ao. [A vaiiho i te taata ia pahono. A tatara i te buka “Te hau e te ino ore mau—No hea mai ïa?” i te api 57, e a taio i te paratarapha 26, e faahiti ra i te Petero 2, 3:9.] A tapao e te faahiti ra te pene i muri iho i teie uiraa: ‘Aita anei te Atua e rave ra i te hoê noa ˈˈe ohipa?’ Peneiaˈe e nehenehe tâua e tauaparau no nia i teie uiraa ia hoˈi faahou mai au.”
4 Ia hoˈi faahou tatou e farerei i te hoê taata o tei vaiihohia ˈtu te buka “Nafea ia faatupu i te hoê oraraa utuafare oaoa,” e nehenehe tatou e parau e:
◼ “I to ˈu farereiraa ia oe i te taime i mairi aˈenei, ua haaputapû to oe haapeapearaa e aupuru i to oe utuafare ia ˈu. I te mea e te ora nei tatou i te mau mahana hopea o te hoê faanahoraa o te mau mea ino, mea faufaa roa e ia faaineine te mau utuafare i to ratou oraraa no a muri aˈe. No te reira, te aˈo puai nei te buka o ta ˈu i vaiiho atu ia oe, ‘Nafea ia faatupu i te hoê oraraa utuafare oaoa,’ ia faatupu i te mau tauaparauraa bibilia tamau i te fare. [A taio i te paratarapha 10 i te mau api 184-5.] Mai te peu e e faatia oe, te hinaaro nei au e faaite atu ia oe no te tahi tau minuti e nafea te mau taata, i roto tau 200 fenua o te ao nei, e hiˈopoa ˈi i te Bibilia i to ratou fare, e to ratou utuafare.” Mai te peu e e taimehia, a faaohipa i te mau tumu parau i raro aˈe i te upoo parau iti o te api 71 no te faaite e nafea te hoê haapiiraa ia faaterehia.
5 E nehenehe tatou e atuatu i te anaanatae faatupuhia e te buka “Te ino ore no te ao atoa nei” mai teie:
◼ “Ua hoˈi faahou mai au no te horoa ˈtu ia oe i te mau haamaramaramaraa hau atu â no nia i te opuaraa a te Atua no te fenua.” A faaite i te hohoˈa i te mau api 172-3, a taio i te Apokalupo 21:3, 4, e a faataa poto atu e nafea te Basileia o te Atua e faatupu ai i teie parau tǎpǔ. A pûpû atu i te hoê haapiiraa bibilia tamoni ore i to ˈna iho fare.
6 A haamanaˈo e te tapao o ta tatou e imi ra i roto i te mau hoˈi-faahou-raa e farerei, o te haamataraa ïa i te mau haapiiraa bibilia. Ua faanaho-taa-ê-hia te buka apî, Te ite e aratai i te ora mure ore (farani), no te faatere i te mau haapiiraa bibilia. Ia haamata tatou i te mau haapiiraa bibilia i muri aˈe i te vaiihoraa i te mau buka tahito, mea maitai ia huti i te ara-maite-raa o te mau taata i nia i teie buka apî. E oaoa rahi tatou ia ite tatou e te haapii ra te feia e haapii ra i te arue i te iˈoa o Iehova, e no to ratou hoi ora.—Ohi. 2:21.