E faaohipa anaˈe e rave rahi vea iti i roto i te pororaa
1 Te anaanatae ra te mau taata e ora ra i teie nei tau i te mau huru tumu parau atoa. Ia haere anaˈe tatou e poro i te avaˈe tiurai, e afai tatou e rave rahi mau vea iti no te faaohipa hoê o te faaanaanatae i te mau taata o ta tatou tuhaa fenua. E tamata anaˈe hoê o teie mau faaiteraa:
2 No te pûpûraa o teie vea iti “Te faatereraa o te haamau i te Paradaiso,” e ani tatou e:
◼ “I to oe manaˈoraa, eaha te huru o teie nei ao ahiri e o Iehova noa te faatere? [E vaiiho tatou i te taata ia pahono.] Ia faahiti anaˈe tatou i te pure ra to Matou Metua, o ta Iesu Mesia i haapii ia tatou, te ani nei iho â tatou e ia faatere mai te Atua i te fenua nei. [E hohora tatou i te vea iti i te api 3 e e taio tatou i te paratarapha 1, o te faahiti ra i te Mataio 6:10.] Mai te peu e te hinaaro nei oe e ora i roto i te hoê ao mai teie atoa, e tia ia oe ia taio i teie vea iti.” I muri iho a pûpû atu.
3 Manaˈo tauturu no te pûpû i te vea iti “Ia pohe tei herehia e outou na”:
◼ “E tiaturi anei oe e ia tae i te hoê mahana e ore roa te hoê taata e taˈi faahou no te hoê taata herehia o tei pohe? [E vaiiho tatou i te taata ia pahono.] Ua tamahanahana aˈena teie vea iti o tei papai-maitai-hia i te mau mirioni taata, no te mea te faataa ra oia e te fatata maira taua mahana ra e o te hoê parau tǎpǔ papu teie no roto mai i te Bibilia. [E hohora tatou i te vea iti i te api 5 e e taio tatou i te paratarapha 5, i te Korinetia 1, 15:21, 22 iho â râ. E faaite tatou i muri iho i te hohoˈa i te api 30.] I ǒ nei ua tuu te taata peni hohoˈa i te manaˈo i nia i te oaoa o ta tatou e nehenehe e ite ma te farii i to tatou mau taata herehia tei moe ia faatia-faahou-hia mai ratou. Tera râ ihea roa teie ohipa oaoa e tupu ai? E ite oe i te pahonoraa a te Bibilia i roto i teie vea iti.” Mai te peu e e farii te taata i ta tatou pûpûraa, e parau faahou tatou e: “Te hinaaro nei au e hoˈi mai no te haamaramarama atu â ia oe i teie tumu parau.”
4 Peneiaˈe e hinaaro tatou e faaite i te vea iti “Inaha, te faaapî nei au i te mau mea atoa nei” na roto i te pûpû-roa-raa ˈtu i te hoê haapiiraa bibilia:
◼ “Te uiui nei e rave rahi taata no nia i te Bibilia. Ua ô aˈena paha te hoê o te mau uiraa i roto i to oe feruriraa. [E hohora tatou i te vea iti i te api 30.] E rave rahi o te faaea i nia i te uiraa hopea: ‘Nafea outou e nehenehe ai e faaineine i te ora i roto i te Paradaiso e a muri noa ˈtu?’” Ia faataa anaˈe tatou i te mau paratarapha 57 e 58 i te mau api 29 e 30 e e taio tatou i te Apokalupo 21:3, 4, te tuu nei ïa tatou i te niu o te hoê haapiiraa bibilia. E faaoti tatou ma te pûpû atu i te vea iti e ma te faanaho i te hoê farereiraa no te hiˈopoa i te tahi atu â mau uiraa.
5 Aore ra e tamata tatou i teie faaiteraa ohie o te vea iti “Te iˈoa o te Atua e vai noa e a muri noa ˈtu”:
◼ “Te ohipa matamua o ta ˈu i haapii i roto i te Bibilia oia hoi te iˈoa o te Atua. Ua ite anei oe? [E vaiiho tatou i te taata ia pahono.] Te hinaaro nei au e faaite ia oe. E itehia te reira ei hiˈoraa i roto i te Salamo 83:18. [E taio tatou i te irava.] Te faaite nei teie vea iti e mea nafea te iˈoa o te Atua ra, o Iehova, e iteahia ˈi i roto i te mau huru reo. [E faaite tatou i te tabula api 8.] Mai te peu e e hinaaro oe e ite hau atu â no nia ia Iehova e ta ˈna mau opuaraa, a taio ïa i teie vea iti.” E horoa anaˈe na te taata e faaroo maira.
6 Na roto i teie mau vea iti faahiahia mau, ua ineine maitai ïa tatou no te “faaite i te parau oaoa i te aau mǎrû ra.”—Isa. 61:1.