Ia riro tatou ei taata faaitoito
1 No te mea hoi e te ora nei tatou i te “anotau hopea,” e hinaaro paatoa tatou i te mau faaitoitoraa (Tim. 2, 3:1). Ua ite aˈena o Paulo i taua hinaaro ra i to ˈna ra tau, ua ara noa o Paulo ia riro ta ˈna mau amuimuiraa e te mau taeae ei taime “mahanahana.” Ua aˈo o ˈna ia ratou ia ‘titau i te mau mea faaitoito apipiti.’ (Roma 1:11, 12; 14:19.) Ua nehenehe taua mau tutavaraa ra e ‘faaitoito i te aau o te mau pǐpǐ, e te aˈoraa ˈtu ia mau papu maite â i roto i te faaroo.’ (Ohi. 14:22.) Te hinaaro rahi nei tatou i teie huru faaitoitoraa i teie mahana.
2 E nehenehe ta tatou mau parau e faaitoito i te tahi ê e, parauhia i te taime mau ra, e riro “mai te lemoni auro i roto i te vairaa ario ra.” (Mas. 25:11.) Na roto i te haereraa i te mau putuputuraa, e ‘faaitoito noa tatou ia tatou iho.’ (Heb. 10:25.) E mea maitai ia faaohipa i to tatou nei arero no te faatia i te mau tupuraa i roto te pororaa, no te haapopou ia vetahi ê aore ra no te paraparau no nia i te mau ohipa pae varua. Te paraparauraa mai te reira ‘mea maitai ïa no te faaitoito, e maitai ai te feia e faaroo ra.’—Eph. 4:29.
3 E paraparau anaˈe no nia i te mau parau faaitoito: I roto i te Philipi 4:8, ua horoa o Paulo te mau aˈoraa ohie no te faaite e mea nafea ia paraparau maitai: huti i to tatou ara-maite-raa i nia i te mau mea haavare ore ra, te mau mea au maitai ra, te mau mea tia ra, te mau mea viivii ore ra, te mau mea popouhia ra, te mau mea roo maitai ra, te vai ra te tahi maitai e te tahi mea haamaitai ra. E nehenehe tatou e papu maitai e o ta tatou e parau atu e mea tano e te faaitoito atoa mai te peu e no roto mai te reira i te Parau a te Atua ra. (Ioane 17:17). Te pûpûraa tatou ia tatou iho no te Atua ra, o ta tatou e haapii nei i te mau putuputuraa a te amuiraa, te itoito o ta tatou e faaite nei i roto i te taviniraa e te tahi atu â mau ohipa e e tia ïa ia haamaitai â. E tauturu mau te mau paraparauraa no nia i te mau ture e te mau faaueraa tumu a te Parau a te Atua ia tatou ia riro ei feia ‘paari e tae noa ˈtu i te ora.’ (Tim. 2, 3:15.) E faaite anaˈe to tatou mauruuru no te haerea maitai o te mau melo o te faanahonahoraa viivii ore a Iehova. E haamaitai anaˈe i te mau ohipa maitatai roa a to tatou mau taeae (Ioane 13:34, 35). I roto i te mau mea viivii ore te vai atoa ra te mau huru kerisetiano maitai oia hoi te faaroo, te oaoa, te hau e te faaoromai, o te mau hotu ïa teie e itehia nei i nia i te mau taeae. E mea ‘maitai’ ia paraparau no nia i te mau tumu parau maitatai e te tura no te ‘faaitoito’ ia vetahi ê.—Roma 15:2.
4 Mea paruparu roa ia aro i te mau mahana atoa i te mau fifi o te ao nei. Auê hoi e te maitai e ia vaiiho i teie mau mea i te hiti e no te fanaˈo i te here autaeae! Ua riro te mau taime maitatai atoa ta tatou paatoa e fanaˈo nei ei hoê taoˈa faufaa roa o te tia ia tatou ia here. Mai te peu e e taata faaitoito e te turu noa tatou, e nehenehe mau â vetahi ê e parau no nia ia tatou e: “‘Ua haamahanahana mai ratou i to ˈu aau.’—Kor. 1, 16:18.