E hoˈi faahou tatou e hiˈo i te mau taata atoa o tei farii i te hoê vea iti
1 Ua haapopou te aposetolo Paulo i to Philipi no te mea ‘ua faatupu faahou ratou i to ratou mau manaˈo no ˈna.’ (Phil. 4:10.) Mai te peu e e pee tatou i to ratou hiˈoraa i roto i te pororaa, e ‘faaoraora faahou tatou i to tatou mau manaˈo’ no te mau taata o ta tatou e poro atu e e turaihia tatou ia hoˈi faahou e farerei ia ratou.
2 Mai te peu e ua vaiiho tatou i te vea iti “Te faatereraa o te haamau i te Paradaiso,” e nehenehe tatou e parau e:
◼ “Ua feruri na vau i nia i ta tâua aparauraa i tera mahana ra, e e piti ïa irava bibilia o ta ˈu i tapea mai i roto i to ˈu feruriraa. Te hinaaro nei au e faaite atu ia oe. Peneiaˈe e te haamanaˈo ra oe: Ua tauaparau tâua no nia i te faatereraa a te Atua i nia i te fenua. Te tǎpǔ nei o Iehova e e tupu mau iho â te reira, o ta te Bibilia ïa e faaite ra. [E taio tatou i te Daniela 2:44.] Ia manaˈo anaˈe oe e tupu mau iho â anei te reira? [E vaiiho tatou i te taata ia pahono.] A faaroo mai na i ta te Atua e parau ra no nia i to ˈna aravihi e faatupu i ta ˈna mau parau tǎpǔ. [E taio tatou i te Isaia 55:11.] Aita anei teie irava e faaitoito ra ia tatou ia tuu i to tatou tiaturiraa i roto i te Basileia a te Atua? Teie nei râ, afea te Atua e faatupu ai i ta ˈna mau parau tǎpǔ?” E parau atu tatou e e pahono tatou i teie uiraa ia farerei faahou tatou.
3 Mai te peu e e hoˈi faahou tatou e farerei i te hoê taata o tei farii i te vea iti “Ia pohe tei herehia e outou na,” e nehenehe tatou e tamata i teie omuaraa parau:
◼ “I te mea hoi e ua tauaparau tâua i tera mahana ra no nia i te pohe o te hoê taata herehia, ua rave au i te hoê tutavaraa taa ê no te hoˈi faahou mai e farerei ia oe.” E faaite tatou i te hohoˈa i te api 30 ma te parau atu e: “Te haamanaˈo ra anei oe i teie tupuraa oaoa, e te ite nei tâua i te feia tei faatiahia mai ia farerei faahou i te feia ta ratou e here nei? Ua ani au ia oe ihea roa e tupu ai te reira, i nia i te raˈi aore ra i nia i te fenua nei. Ua ite paha oe, i te api 26 o teie vea iti, o ta te Bibilia e pahono ra.” E tuatapapa tatou i te mau manaˈo matamua i roto i te mau paratarapha 3 tae atu i te 5, e e faaite tatou i te Ioane 5:21, 28, 29. Mai te peu e e taime to tatou, e taio tatou hoê irava horoahia i roto te api 26.
4 Ua haamata anei tatou i te haapii teie vea iti “Inaha, te faaapî nei au i te mau mea atoa nei”? Ia hoˈi faahou tatou, e nehenehe tatou e na ô e:
◼ E rave faahou tatou i te api 30 e e faahiti tatou i teie uiraa: “I teihea pae e buka faahiahia roa te Bibilia?” E hohora tatou i te vea iti i te mau api 3 e te 4 e e hiˈo faahou tatou i te mau paratarapha 1 e tae noa ˈtu i te 4, e te hohoˈa o te api matamua. E taio tatou hoê aore ra e piti irava i faahitihia i roto i te nota o te paratarapha 4. E parau tatou e ua riro te Bibilia ei buka hoê o te horoa nei i te hoê tiaturiraa faahiahia mau. E rave tatou i te mau faanahoraa no te farereiraa i mua nei. I muri iho i te toruraa o te farereiraa, mai te peu e te manaˈo nei tatou e e haere te haapiiraa i mua, e nehenehe ïa tatou e tapao i nia iho i ta tatou tabula.
5 E nehenehe tatou e faahaere â i te hoê aparauraa no nia iho i te vea iti ra “Te iˈoa o te Atua e vai noa e a muri noa ˈtu” mai teie te huru:
◼ “I te taime matamua, ua faaite au ia oe i te iˈoa o te Atua i roto i te Bibilia. Te iteraa te iˈoa o Iehova e te faaohiparaa i taua iˈoa ra e tuhaa faufaa roa ïa te reira no ta tatou nei haamoriraa.” E hohora tatou i te vea iti i te api 31, i roto i na paratarapha hopea e maha, e e taio atu tatou i te taata i te mau irava ra Ioane 17:3 e te Mika 4:5. E parau tatou e te pûpû nei tatou i te hoê haapiiraa bibilia o te haapii ia ˈna e e faaraahia te iˈoa o te Atua e e ora te mau taata ma te oaoa i nia i te hoê fenua o te faarirohia ei paradaiso.
6 E faaoraora faahou tatou i to tatou mau manaˈo no te feia ta tatou i farerei. E tia ia tatou ia hoˈi faahou e farerei ia ratou ma te tuutuu ore e ia faaineine ia tatou no te faaite atu ia ratou i te mau manaˈo faaitoito. No reira, e riro ïa tatou ei mau kerisetiano ‘o te horoa mai i te hotu’ i roto i te ohipa e faariro i te mau taata ei pǐpǐ apî.—Mat. 13:23.