E hoˈi tatou e farerei no te faaara i te anaanatae
1 E faaitoito te mau hoˈi-faahou-raa e farerei i te tupuraa o te hoê taata, o te riro maine noa ei taata tiaturi. Eaha te mau manaˈo ohie e mea maitai ia tapea mai i roto i te feruriraa ia hoˈi tatou e farerei i te feia tei faaite i te anaanatae?
2 Na mua ˈˈe roa, e faaineine maitai tatou ia tatou. E haamata te faaineineraa i te farereiraa matamua. Nafea te reira? E rave tatou i te mau tapaopaoraa papu. E tapao tatou i te iˈoa o te taata, te tumu parau aparauhia, te huru o te taata tei faaroo mai e te mea ta tatou i vaiiho atu ia ˈna ra. I muri iho, e taio faahou tatou i ta tatou mau tapaopaoraa no tera e tera fare na mua ˈˈe e hoˈi ai e farerei, e e feruri tatou i roto i te pure i te mea ta tatou e parau atu.
3 I teie nei, ua ineine tatou. Eaha te parau atu? Mai te peu e ua vaiiho tatou i te hoê uiraa tei ore i pahonohia i to tatou tere matamua, e rave faahou tatou i taua tumu parau ra ia hoˈi faahou tatou. Mai te peu e, ei hiˈoraa, ua tatara te aparauraa matamua i te mau haamaitairaa ta te Basileia o te Atua e afai mai, e faahiti tatou i te uiraa e “No te aha te Atua e faatia noa ˈi i te ino?”
Ia hoˈi tatou, e nehenehe tatou e parau i muri aˈe i te aroharaa i te taata e:
◼ “I ta tâua aparauraa hopea, ua uiui tâua iho e no te aha te hoê Atua aroha e faatia noa ˈi i taua rahiraa ino rahi ra i teie nei mahana. Ua feruri anei oe i te reira? [A vaiiho i te taata ia pahono.] Ia manaˈo oe, te tapitapi mau ra anei te Atua no te mau taata? [A vaiiho i te taata ia pahono.] A hiˈo na i ta te Bibilia e parau ra i roto i te Ioane 3:16.” I muri aˈe i te taioraa i taua irava ra, e huti tatou i te ara-maite-raa i nia i te mau manaˈo papu o te pene 8 o te buka Te parau mau e aratai i te ora mure ore ra; te faaite ra oia i te mau tumu e faatia noa ˈi te Atua i te ino i to tatou nei tau.
4 Teie te tahi uiraa o te faaara i te feruriraa i te hoê tere matamua: “Mai te peu e ua hinaaro te Atua ia ora te taata e a muri noa ˈtu, no te aha te mau taata e ruau ai e e pohe ai?” Ia hoˈi tatou, e faaite tatou i te taata i te pahonoraa ta te Bibilia e horoa nei i taua uiraa ra i roto i te Roma 5:12. I muri aˈe i te taioraa i te irava, e rave tatou i te paratarapha 26, api 43 o te buka Teie oraraa aita ˈtu anei?, o te faataa ra i te tumu matamua o te ruauraa e o te pohe.
5 Mai te peu e i to tatou tere matamua ua tauaparau tatou i te mau ravea ia ite i te haapaoraa mau e ua vaiiho tatou i te buka Te huitaata i nia i te eˈa o te maimiraa i te Atua, e horoa te uiraa i muri nei i te hoê niu maitai no te hoê hoˈi-faahou-raa e farerei: “Nafea te mau haapaoraa atoa i te faraa mai?” Ia hoˈi tatou, e aparau tatou i nia i te mau manaˈo papu o te pene 2 o teie buka.
6 Tera râ, e haapao maitai tatou. Eiaha tatou e tuu i te mau huru uiraa atoa i te hoˈi-faahou-raa e farerei. Ma te ani e “Ua taio anei oe i te buka ta ˈu i vaiiho atu?” aore ra “Te haamanaˈo ra anei oe ia ˈu?” aore ra “Te haamanaˈo ra anei oe i te mea ta tâua i tauaparau i te taime hopea o to ˈu haereraa mai?”, e nehenehe tatou e faahaama i te taata. I roto i te rahiraa o te tupuraa, aita e faufaa to teie mau uiraa. Ia faaite râ tatou i te huru auhoa, ia faaau ohie e ia haapoto noa. E faahopearaa to teie mau huru maitatai i nia i ta tatou poroi.
7 Maoti i teie mau ravea, e i te tahi atu â, e faaara paha tatou i te anaanatae i roto i te mafatu o te mau taata. No te aha tatou e ore ai e haamau i te tapao e rave e hoê aˈe hoˈi-faahou-raa e farerei i te mau hebedoma atoa? E faaohipa tatou i te mau manaˈo ohie faahitihia i nia nei, e e haamatau tatou i te feia poro aravihi o te tauturu ia tatou. E rahi mai to tatou oaoa mai te peu e e patu tatou i nia i te anaanatae matamua ma te rave i te mau hoˈi-faahou-raa e farerei aravihi mau.