E tauturu tatou ia vetahi ê ia farii i te faufaaraa o ta tatou mau buka
1 “E mea ora hoi te parau a te Atua, e te puai rahi.” (Heb. 4:12) I te mea hoi e te tauturu ra ta tatou mau buka bibilia i te mau taata ia fanaˈo i te puai o te Parau a te Atua, te faaohipa nei tatou i teie mau buka neneihia no te faarahi i to ratou anaanatae no te Bibilia ia poro tatou ma te faanaho-ore-hia aore ra ia haere tatou i tera e tera fare.
2 I te avaˈe tenuare, e pûpû tatou i te mau buka atoa e 192 api te rearea ra te api parau aore ra te mahea ˈtura, aore ra te mau buka atoa tei neneihia hou te matahiti 1980. Mai te peu e te vai ra teie mau buka i roto i ta outou amuiraa, a faaineine i ta outou faaiteraa o te poroi o te Basileia no te aratai i nia i te hoê manaˈo papu o te buka ta outou e faaohipa. Nafea ia rave i te reira?
3 Nafea ia faaineine: Na mua roa, a maiti i roto i te buka ta outou e faaohipa i te hoê noa tuhaa o te tapea mai i te ara-maite-raa o te feia aau rotahi o ta outou tuhaa fenua. I muri iho, a haamanaˈo i te hoê ohipa i tupu aore ra i te hoê tumu parau anaanatae-rahi-hia o ta outou e nehenehe e tauaparau poto noa e te taata e faaroo ra hou e huti ai i to ˈna ara-maite-raa i nia i te tuhaa ta outou i maiti i roto i te buka. Peneiaˈe, te vai ra te hoê irava bibilia faahitihia ei faahororaa i roto i taua tuhaa ra aore ra i te taatoaraa e o ta outou e nehenehe e taio, i roto i te Bibilia anei aore ra i roto i te buka, no te haapapu i ta outou mau parau. A vaiiho i te taata ia rave i te buka i roto i to ˈna rima e ia hurihuri i te tahi mau api, ia ara to ˈna anaanatae, e pûpû ïa outou i te buka. I taua taime ra, a faataa ia ˈna na roto i te tahi noa mau parau e te pûpû nei tatou i teie buka no te hoê tino moni no te mau haamâuˈaraa o te neneiraa. I roto i te mau tupuraa atoa, a tamata i te vaiiho i te hoê uiraa aore ra i te hoê manaˈo ma te ore e pahono, o ta outou e faaohipa ei omuaraa i te farereiraa i mua.
4 E rave rahi mau amuiraa te vai ra ta ratou te tahi mau buka Votre jeunesse—Comment en tirer le meilleur parti e Faaroo i te Orometua Rahi. Mai te peu e te vai ra ta outou teie mau buka, no te aha outou e ore ai e faaineine i te hoê aparau e te mau taurearea o to outou tuhaa fenua? A faaitoito ia ratou ia taio i te hoê o teie mau buka maitatai roa. Mai te peu e e pûpû outou i te buka ra Te parau mau e aratai i te ora mure ore ra, e nehenehe outou e faatano i te ravea faahitihia na mua ˈˈe e e faaineine ia outou no te aparau i nia i te mau haapiiraa bibilia tumu vauvauhia i roto i teie buka faaohipahia no te hoê haapiiraa faahiahia roa.
5 A pûpû i te buka ra Te huitaata i nia i te eˈa o te maimiraa i te Atua: E haamata paha outou i te hoê aparauraa ma te huti i te ara-maite-raa i nia i te hoê parau apî o te haapapu ra i te faaôraa te mau haapaoraa i roto i te mau ohipa o teie nei ao anei aore ra o te faaite ra i te mana o te haapaoraa i roto i te oraraa o te mau taata.
I muri iho, a ani i te hoê uiraa, mai teie:
◼ “Ia manaˈo oe, eaha te manaˈo o te Atua i nia i teie mau faanahoraa faaroo o te faatere ra i te mau ohipa a te mau taata i teie nei mahana? [A vaiiho i te taata ia pahono.] E maere anei oe ia ite e e fatata e hoê â mau haapiiraa tumu a teie mau haapaoraa atoa e mea taa ê ratou i te mau haapiiraa a te Bibilia?” Mai te peu e e hinaaro te taata e faaroo, a faaite ia ˈna i te tabula tumu parau, e a faataa poto noa ia ˈna e tei raro aˈe te feia faaroo mai te feia aita e tiaturi ra i te mau mana faaroo puai mau. A faaite ia ˈna e nehenehe oia e ite e no te aha te mau taata, na roto i te imiraa i te Atua, i rave ai i te mau eˈa taa ê e aita i haapii e nafea ia ite e teihea roa te haapaoraa mau.
6 I te tahi mau taime, e mea maitai ia pûpû i te mau vea aore ra te hoê api parau iti. Te vai ra ia tatou te mau tumu atoa no te faaitoito ia vetahi ê ia taio i taua mau buka ra ma te itoito e te aau tae ia ite ratou i te ohipa o te Parau a te Atua i roto i to ratou oraraa ma te farii i ta ˈna aratairaa.