E farii tatou i te Tamaiti Fanau tahi a Iehova!
1 I te sabati 9 no Nisana no te matahiti 33 i to tatou nei tau, ua faahanahana te hoê nahoa rahi e te mau amaa tamara i roto i te rima i te Tamaiti Fanau tahi a Iehova, te Fatu ra o Iesu Mesia, mai te “Arii i te haerea mai ma te iˈoa o [Iehova] ra!” (Luka 19:38; Heb. 1:6). Ua rahi roa te ohipa i te mau mahana hopea to Iesu vairaa i nia i te fenua nei, te monire 10 e te mahana piti 11 no Nisana, ua rave taatoa oia i te ohipa i roto i ta ˈna taviniraa huiraatira.
2 I to tatou nei mahana, te tuô nei te hoê nahoa rahi atu â, e i roto i te auraa taipe, e mau amaa tamara tei roto i te rima, ma te reo puai e: “Tei to tatou Atua te ora, tei parahi i nia iho i te terono ra, e tei te Arenio.” (Apo. 7:9, 10). I te 26 no mati i mua, e tahoê tatou no te faatupu i te oroa Haamanaˈoraa i te poheraa o te Mesia. I te mea e te piri nei tatou i taua taio mahana ra, e nehenehe anei tatou e faarahi i ta tatou mau tutavaraa i roto i te taviniraa e, no reira, e haapuai i teie pii arueraa o te tuôhia ra na te ao nei?
3 E faarahi tatou i ta tatou ohipa i roto i te taviniraa: E rave rahi feia poro tei opua aˈena i te riro ei mau pionie tauturu i te roaraa o te avaˈe mati. E nehenehe anei outou e na reira atoa? Mai te peu e e, a faaî i ta outou aniraa ma te haamarirau ore. E oaoa te hoê matahiapo i te pahono i te mau uiraa taa ê o ta outou e aniani nei i nia i teie huru taviniraa.
4 Ia riro tatou ei mau pionie tauturu aore ra eita, e e tutava ia tatou i te apiti rahi atu i roto i te taviniraa i te roaraa o te avaˈe mati. E nehenehe paha te amuiraa e faanaho i te mau putuputuraa no te pororaa i te mau mahana atoa i roto i te avaˈe. No reira, e tia ia navai maitai te mau tuhaa fenua.
5 E tia i te mau amuiraa atoa ia faanaho i te hoê putuputuraa no te taviniraa taa ê i te mahana maa 26 no mati. Noa ˈtu e titau te faaineineraa o te oroa Haamanaˈoraa i te hoê ohipa rahi, te faaitoitohia nei râ tatou paatoa ia apiti i te pororaa i te mahana maa poipoi, mai te peu e e nehenehe. Hau atu i te ohipa i tera e tera fare, ia ite maitai tatou e e ravea to te feia ta tatou i titau manihini i te oroa Haamanaˈoraa no te haere mai, e te mau maitai ra ia ratou te hora e te vahi o te putuputuraa.
6 E titau manihini e e faaitoito tatou ia vetahi ê: Ua horoa Iesu i teie aˈoraa i ta ˈna mau pǐpǐ e: “E na reira outou ei manaˈoraa ia ˈu.” (Kor. 1, 11:24) Ua faaroo te mau pǐpǐ faatavaihia a Iesu, o tei haere na nia i to ˈna mau taahiraa avaˈe, i teie aˈoraa. Oia atoa, te titau-manihini-hia ra te mau tavini atoa a Iehova ia tae mai no te faatupuraa i te oroa Haamanaˈoraa. E mea maitai atoa ia titau tatou, hau atu, i te mau melo o to tatou utuafare, te feia e haapii ra i te Bibilia e o tatou e te feia ta tatou i tauaparau i nia i te Bibilia, to tatou mau hoa e ere ratou i te mau Ite no Iehova, e te mau hoa rave ohipa. E nehenehe tatou e hamani i te hoê tabula ia ore ia moehia te hoê taata.
7 E horoahia mai ia tatou te tahi atu mau taime no te faaitoito i te mau taata farii maitai i te po o te oroa Haamanaˈoraa. E ara tatou ia tae oioi mai no te farii i te feia apî o te haere mai no te taime matamua. Mai te peu e e tae mai e rave rahi o ta tatou mau taata haapii, e mea tano ia parahi te tahi atu taata poro i pihai iho i te tahi i rotopu ia ratou i te roaraa o te putuputuraa. E nehenehe tatou e titau manihini i te feia apî ia haere mai i te putuputuraa huiraatira a te amuiraa. E tia ïa i te matahiapo tei maitihia no te hohora i te oreroraa parau huiraatira ia faaineine maitai ia riro ta ˈna tumu parau ei mea faaitoito.
8 A faaoti ai te oroa Haamanaˈoraa, ma te apiti atu i to tatou reo i te himeneraa o te himene 105, “A haamori i te Matahiapo a te Atua!”, ia taio-atoa-hia tatou i roto i te feia e oaoa ra i te haaraa ma te itoito i roto i te taviniraa i te roaraa o te avaˈe, i te arueraa ia Iehova!