E tauturu tatou i te mau “mamoe” ia patu i nia i te hoê niu etaeta
1 O te hinaaro e patu i te hoê fare e tia ia feruri maitai e ia horoa i te mau tutavaraa e rave rahi. Ia oti te papaihia te mau hohoˈa fare, e tia ia ˈna ia faaineine i te fenua, e i muri iho e tuu i te hoê niu etaeta. Ma te haere maine, e tupu mai te opuaraa, e tae noa ˈtu i to ˈna hopearaa. Hoê â huru atoa, e tia ia tatou ia tauturu i te mau “mamoe” ia haapii maine i te parau mau. Te tutava nei tatou no te faaara i to ratou anaanatae i te aparauraa matamua. I muri iho, e hoˈi faahou tatou e farerei ia ratou i reira tatou e haamau ai i te hoê niu ma te haapii ia ratou i te mau parau mau faufaa no nia i te Atua e no nia i ta ˈna mau opuaraa no te huitaata nei. — Luka 6:48.
2 Hou râ e tuu ai i te niu, e tia ia faaineinehia te fenua, ma te aniani ia ˈna iho no nia i te taata. Eaha te tumu parau ta tatou i aparau aˈena? Eaha te mau irava ta tatou i taio na? Eaha te huru o te taata? Eaha te buka ta tatou i vaiiho ia ˈna ra? Ia hoˈi tatou e farerei ia ˈna, ia vai mai i roto i te feruriraa te mau manaˈo papu e ia patu maine tatou i nia i te niu i haamauhia. I muri aˈe i te tahi tau hoˈi-faahou-raa e farerei, e rahi mai te ite o te taata e to ˈna faaroo atoa i te Atua.
3 Mai te peu e ua vaiiho tatou i te hoê buka “E ora e a muri noa ˈtu”, e nehenehe tatou e parau e:
◼ “Te oaoa nei au i te farereiraa ia oe i ô nei. Te haamanaˈo ra paha oe i ta tatou aparauraa hopea: ua parau tâua e i roto i to tâua fenua, te iti maira te anaanatae o te mau taata no nia i te Atua. Te faaite maramarama maitai ra te Bibilia e te haapao mai nei te Atua i te mau taata e e haamaitaihia te feia parau-tia maoti to ˈna Basileia. [Taio Mataio 6:9, 10.] E haamau taua Basileia ra i te parau-tia.” E taio tatou i te Isaia 11:3-5, e i muri iho e huti mai tatou i te ara-maite-raa o te taata e faaroo maira i nia i na paratarapha matamua o te pene 1 o te buka E ora e a muri noa ˈtu. E faaite tatou ia ˈna e nafea ia haapii.
4 Mai te peu e i te taime matamua, ua vaiiho tatou i te api parau iti Te hoê oraraa hau i roto i te hoê ao apî, e hiˈo faahou tatou i te mau manaˈo o tei faahiti-aˈena-hia no nia i te faufaaraa o te mau tupuraa maitatai roa ˈˈe e te mau parau tohu i roto i te Bibilia. E haapapu tatou e, no te ora i roto i te ao apî, e tia ia noaa mai te ite mau. E taio tatou i te Ioane 17:3. E faataa tatou e i muri aˈe i te noaaraa mai taua ite ra, e tia ia rave i te hinaaro o te Atua. E taio tatou i te Ioane 1, 2:17. E huti tatou i te ara-maite-raa o te taata i nia i te mau manaˈo papu o te api 5 o te api parau iti.
5 Mai te peu e ua tauaparau tatou no nia i te oraraa utuafare i te taime matamua, i to tatou vaiihoraa i te buka “E ora e a muri noa ˈtu”, e nehenehe tatou e parau e:
◼ “I te taime hopea to ˈu haereraa mai, ua tauaparau tâua no nia i te oraraa utuafare. Ua farii tâua i te parau e, mai te peu e e hinaaro tatou i te hoê oraraa utuafare oaoa, e tia ia apee i te mau aˈoraa a te Bibilia. I to oe manaˈoraa, eaha te mea titauhia ia manuïa to tatou faaipoiporaa?” E vaiiho tatou i te taata ia pahono mai. E faahiti tatou i te mau manaˈo papu i rotopu i te mau manaˈo i te mau api 243-246 o te buka E ora e a muri noa ˈtu. E ani tatou i te taata e faaroo maira ia faataa i te mau hohoˈa e ia hiˈopoa i te mau manaˈo ta tatou i maiti, mai te peu e e nehenehe. E tuu tatou i te tapao i nia i te faufaaraa ohie o te mau faaueraa tumu bibilia.
6 Mai te peu e ua vaiiho tatou i te api parau iti Te hoê oraraa hau i roto i te hoê ao apî, e hiˈo faahou tatou i te mau faaueraa tumu bibilia rahi i faahitihia i te mau api 4 e 5. Mai te peu e te faaite ra te taata i te anaanatae, e pûpû tatou ia ˈna te buka E ora e a muri noa ˈtu. E tuu tatou na mua i te pene 29, “Nafea ia faatupu i te hoê oraraa utuafare fetii oaoa?, e faaite tatou i te taata te ravea ia hiˈopoa i te reira e o ˈna e to ˈna utuafare.
7 E tia ia tatou paatoa ia rave tamau i te mau hoˈi-faahou-raa e farerei. E apee tatou i te feia atoa ineine maitai ma te raveraa i te mau hoˈi-faahou-raa e farerei aravihi i te avaˈe setepa.