Ia ite tatou i te huti mai i te ara-maite-raa
1 E rave rahi mau taata ta tatou e farerei nei na roto i te haereraa i tera e tera uputa aita e anaanatae nei i te mau ohipa i te pae varua. Te tapitapi nei paha ratou no to ratou utuafare, te aro ra ratou i te mau fifi i te pae moni aore ra to ratou iho mau fifi. No te haamata i te hoê aparauraa, e mea maitai aˈe ia paraparau i nia i te mau tumu parau o te faaanaanatae ra i te rahiraa o te mau taata o te vahi tei reira outou. E ani tatou i te mau uiraa no te faaara i te anaanatae, i te mea hoi e titau te reira i te taata e faaroo ia faaô atoa mai i roto i te aparauraa. E mea ohie roa te mau uiraa manaˈo o te ore e faahuru ê.
2 E mea papu e horoahia mai ia outou ra te hoê tariˈa faaroo mai te peu e e faaohipa tatou i teie huru omuaraa parau i muri nei:
◼ “Iaorana. O ... to ˈu iˈoa. Te noho nei au i roto i teie vahi. E rave rahi mau taata o ta ˈu i farerei i teie poipoi o te tapitapi nei i te [a faahiti i te hoê ohipa tei tupu aita i maoro i roto i te vahi faaearaa aore ra i te hoê tumu parau anaanatae no te fenua]. Ia manaˈo oe, te hinaaro ra anei te Atua ia ite i te ao ia mou i roto i teie huru tupuraa?” A vaiiho i te taata ia pahono. I taua faito ra, e faaite outou i te api parau iti Te hoê oraraa hau i roto i te hoê ao apî. E faataa poto outou i te hohoˈa o te api matamua e te irava o te mau paratarapha 1-3, mai te peu e e taime. I te taime e faaarahia ˈi te anaanatae, e faaite outou ia ˈna i te buka E ora e a muri noa ˈtu. E nehenehe outou e huti i to ˈna ara-maite-raa i nia i te Salamo 37:9, 10 o te faahitihia ra i te api 157 e e taio atu i roto i te buka. Maoti te mau hohoˈa o te mau api 156 e 157, e faataa outou ia ˈna eaha te mau titauraa tia e vai ra i nia i te fenua taatoa ia faaorehia te ino.
3 Ia ineine noa outou i te pûpû i Te Pare Tiairaa e te A ara mai na! I te mau vahi atoa, te tapitapi nei te mau taata i te oreraa o te mau faaueraa tumu i te pae morare. Ma te taio i te A ara mai na! no te 8 no tiunu, a faahiti i te tahi mau manaˈo o te faaara i te anaanatae o te mau taata o ta outou tuhaa fenua. Ma te ore e faataere i nia i te mau fifi o teie nei tau, a faaite i te taata e faaroo maira ia outou i te tumu parau “E faaino mau anei te upaupa ia oe” e a parau atu ia ˈna ma te aau tae e eaha te mau haamaitairaa ta te mau aˈoraa a te Parau a te Atua e horoa mai. I muri iho i teie avaˈe, ia faaite outou i te A ara mai na! no te 8 no tiunu, a faahiti i te tumu parau “Te ohiparaa ma te puai—Afea e riro ai ei huru taa ê.” A faaite i te mau aˈoraa ta te Bibilia e horoa ra no te ora ma te aifaito. E nehenehe te mau numera o Te Pare Tiairaa e te A ara mai na! apî aore ra tahito e faaitehia i te mau taime atoa taa ê atu i te mau mahana faataahia no te pûpû i te mau vea.
4 Eiaha ia moehia ia tatou e ta tatou tapao o te faaararaa i te anaanatae no te poroi o te Basileia. Ia faaroohia mai tatou, e tia ia tatou na mua ia huti i te ara-maite-raa o te taata e faaroo maira ia tatou e ia turai ia ˈna ia feruri. Na roto i teie ravea, e horoa tatou i te mau “mamoe” i te hinaaro e faaroo i te mea ta te Atua mau ra o Iehova e parau mai no nia i ta ˈna opuaraa no te mau taata. — Sal. 85:8.